ନୂଆଦିଲ୍ଲୀ,୧୮।୮: ଦେଶ ପ୍ରଥମ ଚିଫ୍ ଅଫ୍ ଡିଫେନ୍ସ୍ ଷ୍ଟାଫ୍ ପଦବୀରେ କିଏ ବସିବ ସେ ନେଇ ନାନା କଳ୍ପନା ଜଳ୍ପନା ଆରମ୍ଭ ହୋଇଛି। ଦୌଡ଼ରେ ସ୍ଥଳସେନା ପ୍ରମୁଖ ଜେନେରାଲ ବିପିନ୍ ରାଓ୍ବତ ଆଗରେ ରହିଛନ୍ତି। ତେବେ ଭାରତୀୟ ସ୍ଥଳସେନା, ବାୟୁସେନା ତଥା ନୌସେନା ପ୍ରମୁଖଙ୍କ ମଧ୍ୟରେ ବାୟୁସେନା ପ୍ରମୁଖ ବି.ଏସ୍. ଧନୋଓ୍ବା ବରିଷ୍ଠ। ଧନୋଓ୍ବା ସେପ୍ଟେମ୍ବରରେ ଅବସର ନେବେ। ଏହାପରେ ରାଓ୍ବତ ୩ ସେନା ପ୍ରମୁଖଙ୍କ ମଧ୍ୟରେ ବରିଷ୍ଠ ହେବେ। ସେ ଏହି ପଦବୀରେ ୨୦୧୯ ଡିସେମ୍ବର ପର୍ଯ୍ୟନ୍ତ ରହିବେ। ଚିଫ୍ ଅଫ୍ ଡିଫେନ୍ସ୍ ଷ୍ଟାଫ୍ ପଦବୀରେ ନିଯୁକ୍ତି ପାଇଁ ସୁପାରିଶ୍ ପ୍ରତିରକ୍ଷା ମନ୍ତ୍ରଣାଳୟର କମିଟି କରିବେ। ଏହାକୁ ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଗଠିତ କ୍ୟାବିନେଟ୍ କମିଟି ଅନୁମୋଦନ କରିବେ। ନିୟମ ଅନୁସାରେ ୩ ସେନା ପ୍ରମୁଖଙ୍କ ମଧ୍ୟରେ ବରିଷ୍ଠଙ୍କୁ ଏହି ପଦବୀ ମିଳିବ। ଧନୋଓ୍ବା ୧୯୭୮ ଜୁନ୍ରେ କମିଶନ ଅଫିସର ଭାବେ ନିଯୁକ୍ତ ହୋଇଥିଲେ। ୨୦୧୭ ଜାନୁୟାରୀ ୧ଠାରୁ ସେ ବାୟୁସେନା ପ୍ରମୁଖ ଅଛନ୍ତି। ସେହିପରି ରାଓ୍ବତ ୧୯୭୮ ଡିସେମ୍ବରରେ କମିଶନ ଅଫିସର ହୋଇଥିଲେ। ସେ ୨୦୧୬ ଡିସେମ୍ବର ୩୧ଠାରୁ ସ୍ଥଳସେନା ପ୍ରମୁଖ ଭାବେ କାର୍ଯ୍ୟ କରୁଛନ୍ତି। ଅପରପକ୍ଷରେ ନୌସେନା ପ୍ରମୁଖ ଆଡମିରାଲ କରମବୀର ସିଂ ୧୯୮୦ ଜୁଲାଇରେ କମିଶନ ଅଫିସର ହୋଇଥିଲେ। ୨୦୧୯ ମେ ୩୧ଠାରୁ ସେ ନୌସେନା ପ୍ରମୁଖ ଭାବେ କାର୍ଯ୍ୟ କରୁଛନ୍ତି।
