ଉମରକୋଟ, ୯।୬(ଡି.ଏନ୍.ଏ.):କାଳବୈଶାଖୀ ଉଡ଼ାଇ ନେଲା ଘର ଛପର। ପଲିଥିନ ତଳେ ମୁଣ୍ଡ ଗୁଞ୍ଜୁଛନ୍ତି ଚାରିପ୍ରାଣୀ। ପୂର୍ବରୁ ଆବାସ ଯୋଜନାରେ ଘରଟିଏ ପାଇଁ ବାରମ୍ବାର ଆବେଦନ କରିଥିଲେ ମଧ୍ୟ ଏଯାବତ୍ ମିଳିନାହିଁ। ଏବେ ପଲିଥିନ୍ ଛପର ଘର ହିଁ ଆମ ସାହାରା ବୋଲି କହିଛନ୍ତି ଉମରକୋଟ ବ୍ଲକ ବେନରା ପଞ୍ଚାୟତ ସିଲାଟି ୟୁଭି-୧୫ ଗ୍ରାମର ବିଧୁ ସରକାର। ସ୍ତ୍ରୀ ଓ ଦୁଇ ପୁଅଙ୍କୁ ନେଇ ବିଧୁଙ୍କ ପରିବାର। ପନିପରିବା ବ୍ୟବସାୟ କରି ବିଧୁ ପରିବାର ଚଳାଇଥାନ୍ତି। ବିଧୁଙ୍କର ଏକ ଝାଟିମାଟି ଛପର ଘର ଥିଲା। କିନ୍ତୁ ଗତ ଗୁରୁବାର ଆସିଥିବା କାଳବୈଶାଖୀ ପ୍ରଭାବରେ ତାଙ୍କ ଘରର ଛପର ଉଡିଯାଇଥିଲା। ଆର୍ଥିକସ୍ଥିତି ସ୍ବଚ୍ଛଳ ନ ଥିବାରୁ ଘର ଛପର କରିବା ତାଙ୍କ ପାଇଁ କଷ୍ଟକର ହୋଇପଡୁଛି। ୨୦୧୭-୧୮ ଆର୍ଥିକ ବର୍ଷରେ ବିଜୁ ପକ୍କା ଘର ଯୋଜନା ପାଇଁ ବିଧୁ ଆବେଦନ କରିଥିଲେ। ପଞ୍ଚାୟତ ପକ୍ଷରୁ ତାଙ୍କୁ ଘର ନିର୍ମାଣ ପାଇଁ ପ୍ରତିଶ୍ରୁତି ମିଳିଥିଲା। କିନ୍ତୁ କୌଣସି କାରଣରୁ ବିଧୁଙ୍କୁ ଏଥିରେ ସାମିଲ କରାଗଲା ନାହିଁ। ବାରମ୍ବାର ପଞ୍ଚାୟତଠାରୁ ଆରମ୍ଭ କରି ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଦୌଡିଦୌଡି ବିଧୁଙ୍କୁ କେବଳ ପ୍ରତିଶ୍ରୁତି ମିଳିଛି। ମୋଠାରୁ ଆର୍ଥିକ ସ୍ବଚ୍ଛଳ ପରିବାରକୁ ଯୋଜନାରେ ସାମିଲ କରାଯିବା ସହ ମୋତେ ଅଣଦେଖା କରାଯାଇଛି ବୋଲି ବିଧୁ ଅଭିଯୋଗ କରିଛନ୍ତି। ବିଧୁଙ୍କୁ ତୁରନ୍ତ ସହାୟତା ସହ ବିଜୁ ପକ୍କାଘର ଯୋଜନାରେ ସାମିଲ କରାଇବାକୁ ଗ୍ରାମର ଦେବାଶିଷ ସରକାର, ମିଲନ୍ ସରକାର, ଅଶୋକ ସରକାର, ଫନି ମସ୍ତ୍ରୀ, ବିଜୟ ରାଓ, ଦିବାକର ସାମଲ, କାର୍ତ୍ତିକ ମଣ୍ଡଳ ଓ ପ୍ରଣବ ବୈଦ୍ୟ ପ୍ରମୁଖ ଦାବି କରିଛନ୍ତି।
