କରୋନା ସହାୟତା: ରିଜିଜୁ ଦେଲେ ଗୋଟିଏ ମାସର ଦରମା
12:36 pmMarch 29, 2020 / 02

ନୂଆଦିଲ୍ଲୀ,୨୮।୩(ପି.ଟି.): କୋଭିଡ-୧୯ ମୁକାବିଲା ପାଇଁ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ଶନିବାର ତାଙ୍କର ଗୋଟିଏ ମାସର ଦରାମା ଦାନ କରିଛନ୍ତି। ଦେଶର ସ୍ବାସ୍ଥ୍ୟବସ୍ଥାର ଉନ୍ନତି ପାଇଁ ଅର୍ଥଦାନ ଦେବା ଏବେ ଅପରିହାର୍ଯ୍ୟ ହୋଇପଡିଛି ଓ ଏଥିପାଇଁ ଗୋଟିଏ ମାସର ଦରମା ପ୍ରଦାନ କରିଛି ବୋଲି ରିଜିଜୁ ତାଙ୍କ ଫେସ୍‌ବୁକ୍‌ ପେଜ୍‌ରେ ଉଲ୍ଲେଖ କରିଛନ୍ତି। କରୋନା ଭାଇରସ ବିପକ୍ଷରେ ଲଢେଇ ପାଇଁ ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଜେପି ଏମ୍‌ପି ମାନଙ୍କୁ ସେମାନଙ୍କ ଏମ୍‌ପିଲାଡରୁ ୧ କୋଟି ଟଙ୍କା ଲେଖାଏ ଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ଏ ଦୃଷ୍ଟିରୁ ଦେଖିବାକୁ ଗଲେ ରିଜିଜୁ ତାଙ୍କ ଏମ୍‌ପିଲାଡରୁ ମଧ୍ୟ ଗୋଟିଏ କୋଟି ଟଙ୍କା ପ୍ରଦାନ କରିବେ। ଏ ନେଇ ସେ ତାଙ୍କ ଜିଲ୍ଲା ପ୍ରଶାସନ ସହ ଯୋଗାଯୋଗ କରିଛନ୍ତି ବୋଲି ରିଜିଜୁ କହିଛନ୍ତି। ସବୁ ସକ୍ଷମ ଲୋକଙ୍କୁ ଅର୍ଥ ଦାନ କରିବା ପାଇଁ ରିଜିଜୁ ଆହ୍ବାନ୍ନ କରିଛନ୍ତି। ଉଲ୍ଲେଖଥାଉ କି, କୋଭିଡ- ୧୯ ସଂକ୍ରମଣ ରୋକିବା ପାଇଁ ଦେଶରେ ୨୧ ଦିନିଆ ଲକ୍‌ଡାଉନ ଜାରି ହୋଇଛି। ଏହି ଭାଇରସ୍‌ କାରଣରୁ ବିଶ୍ୱରେ ୩୦, ୦୦୦ ଓ ଭାରତରେ ୧୯ଜଣ ଲୋକ ପ୍ରାଣ ହରାଇଲେଣି।