ଲଣ୍ଡନ,୩।୫: ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ କିଛିଦିନ ହେବ କରୋନାରେ ପୀଡ଼ିତ ଥିବା ବେଳେ ଏବେ ସେ ସମ୍ପୂର୍ଣ୍ଣ ସୁସ୍ଥ ହୋଇ ଯାଇଛନ୍ତି। ହେଲେ ସେ ଯେତେବେଳେ କରୋନାରେ ପୀଡ଼ିତ ହୋଇ ଚିକତ୍ସିତ ହେଉଥିଲେ ସେହି ସମୟର ଅନୁଭୂତିକୁ ସେ ଏକ ସାକ୍ଷାତ୍କାରରେ ବର୍ଣ୍ଣନା କରିଛନ୍ତି। ୫୫ ବର୍ଷୀୟ ଜନସନ କହିଛନ୍ତି ଯେତେବେଳେ ସେ ଆଇସିୟୁରେ ଚିକିତ୍ସିତ ହେବାକୁ ଭର୍ତ୍ତି ହୋଇଥିଲେ ସେତେବେଳେ ତାଙ୍କ ସ୍ବାସ୍ଥ୍ୟରେ କୌଣସି ଉନ୍ନତି ପରିଲକ୍ଷିତ ହେଉ ନ ଥିଲା। ବେଳକୁ ବେଳ ତାଙ୍କ ସ୍ବାସ୍ଥ୍ୟ ବିଗିଡିବାରେ ଲାଗିଥିଲା। ଲିଟର ଲିଟର ଅକ୍ସିଜେନ୍ ଦେବା ସତ୍ତ୍ୱେ ବି ତାଙ୍କ ସ୍ବାସ୍ଥ୍ୟରେ କୌଣସି ପରିବର୍ତ୍ତନ ଲକ୍ଷ୍ୟ କରାଯାଉ ନ ଥିଲା। ଡାକ୍ତରମାନେ ସମସ୍ତ ଚେଷ୍ଟା ଜାରି ରଖିଥିଲେ ମଧ୍ୟ ଶେଷକୁ ସେମାନେ ବୋରିସଙ୍କ ମୃତ୍ୟୁ ଘୋଷଣା କରିବାକୁ ପ୍ରସ୍ତୁତ ହୋଇଥିଲେ ବୋଲି ସେ କହିଛନ୍ତି। କାରଣ ସେତେବେଳେର ସମୟ ଏତେ କଠିନ ଥିଲା ଯେ ଡାକ୍ତରମାନେ ସବୁ ପ୍ରକାର ପ୍ରସ୍ତୁତିରେ ଥିଲେ ଯଦି କିଛି ଅଘଟଣ ଘଟେ ତେବେ କ’ଣ କରାଯିବ। ଏପ୍ରିଲ ପ୍ରଥମ ସପ୍ତାହରେ ସେ କରୋନା ସଂକ୍ରମିତ ଥିବା ଜଣାପଡିବା ସହ ଖୁବ୍ କମ୍ ସମୟ ମଧ୍ୟରେ ତାଙ୍କ ସ୍ବସ୍ଥ୍ୟାବସ୍ଥା ଅଧିକ ବିଗିଡି ଯାଇଥିଲା ବୋଲି ସେ କହିଛନ୍ତି। ି ଯେତେବେଳେ ଜୀବନ ମୃତ୍ୟୁର ଅଧାବାଟରେ ଥିବା କଥା ମୁଁ ଜାଣିପାରିଲି ସେତେବେଳେ ଭାବିଥିଲି ଯେଉଁ ରୋଗର କୌଣସି ଔଷଧ ନାହିଁ, କିଛି ଚିକିତ୍ସା ନାହିଁ ସେଥିରୁ କ’ଣ ମୁଁ ବଞ୍ଚି ପାରିବି। ତେବେ ଡାକ୍ତରଙ୍କ ଅକ୍ଳାନ୍ତ ଚେଷ୍ଟା ଫଳରେ ମୁଁ ବଞ୍ଚିଯାଇଛି। ବୋରିସ ସୁସ୍ଥ ହେବା ପରେ ତାଙ୍କ ପ୍ରେମିକା କୈରି ସାଇମଣ୍ଡସ ଅଳ୍ପଦିନ ମଧ୍ୟରେ ଏକ ପୁତ୍ର ସନ୍ତାନ ପ୍ରସବ କରିଛନ୍ତି। ଆଉ ସେହି ସନ୍ତାନର ମିଡିଲ ନେମ ରଖାଯାଇଛି ନିକୋଲସ। ଏହା ପଛର ରହସ୍ୟ ହେଉଛି ପ୍ରଧାନମନ୍ତ୍ରୀ ବୋରିସଙ୍କୁ କୋଭିଡ କବଳରୁ ବଞ୍ଚାଇବାରେ ମୁଖ୍ୟ ଭୂମିକା ଥିଲା ଡାକ୍ତର ନିକୋଲସ ପ୍ରାଇସ ଓ ଡାକ୍ତର ନିକୋଲସ ହାର୍ଟଙ୍କର। ଏମାନଙ୍କ ଅକ୍ଳାନ୍ତ ପରିଶ୍ରମ ଯୋଗୁ ବୋରିସ ବଞ୍ଚିଯାଇଥିବାରୁ ଏହି ଡାକ୍ତରଙ୍କ ନାମ ଅନୁଯାୟୀ ସେ ତାଙ୍କ ପୁତ୍ର ସନ୍ତାନର ମିଡିଲ ନେମ ନିକୋଲସ ରଖିଥିବା କହିଛନ୍ତି।
