ରୋମ,୨୨।୩- ଜୁଭେଣ୍ଟସ ସୁପରଷ୍ଟାର ଫୁଟବଲ ଖେଳାଳି ପଲ ଡିବାଲା ମାରାତ୍ମକ ଭାଇରସ କରୋନାରେ ପୀଡ଼ିତ ଥିବା ସ୍ବୀକାର କରିଛନ୍ତି। ଇଟାଲିଆନ ଚାମ୍ପିୟନ ଜୁଭେଣ୍ଟସ ଦଳର ତୃତୀୟ ଖେଳାଳି ଭାବେ ଡିବାଲା ଆକ୍ରାନ୍ତ ହୋଇଛନ୍ତି। ସେହିଭଳି ଏସି ମିଲନ ଡିଫେଣ୍ଡର ପାଉଲୋ ମାଲଡିନି ପ୍ରକାଶ କରିଛନ୍ତି ଯେ, ମୋ ସହ ପୁଅ ମଧ୍ୟ କରୋନାରେ ପୀଡ଼ିତ। ସମସ୍ତଙ୍କୁ ଜଣାଇ ଦେବାକୁ ଚାହୁଁଛି ଆମ କୋଭିଡ୍-୧୯ ଟେଷ୍ଟର ରିପୋର୍ଟ ଆସିଛି। ସାବାଷ୍ଟିଆନ, ତାଙ୍କ ମହିଳା ବନ୍ଧୁ ଓ ମୋର ପଜେଟିଭ ଆସିଛି। ଭାଗ୍ୟବଶତଃ ଆମେ ପୂରା ଠିକ୍ ଅଛୁ ବୋଲି ଡିବାଲା ଟୁଇଟ୍ କରିଛନ୍ତି। ସେ ବୁଧବାରଠାରୁ ସେଲ୍ଫ ଆଇସୋଲେଶନରେ ରହିଛନ୍ତି। ତାଙ୍କୁ ଡାକ୍ତରଙ୍କ ତତ୍ତ୍ୱାବଧାନରେ ରଖାଯାଇଛି। ତାଙ୍କ ନିକଟରେ ଲକ୍ଷଣ ଦେଖାଯାଉ ନାହିଁ ବୋଲି କ୍ଲବ ପକ୍ଷରୁ ବିବୃତିରେ କୁହାଯାଇଛି। ମିଲନ ଟେକନିକାଲ ଡିରେକ୍ଟର ମାଲଡିନି ଓ ୧୮ ବର୍ଷର ପୁଅ ତଥା ଯୁବ ଦଳର ଖେଳାଳି ଡାନିଏଲ ମାରାତ୍ମକ ଭାଇରସ ସହ ସଂଘର୍ଷ କରୁଛନ୍ତି। ଦୁହେଁ ଘରେ ଦୁଇ ସପ୍ତାହ ହେଲା ସେଲ୍ଫ ଆଇସୋଲେଶନ ଶେଷ କରିସାରିଛନ୍ତି। କିନ୍ତୁ ମେଡିକାଲ ପକ୍ଷରୁ ଫିଟ୍ ଘୋଷଣା କରାଯିବା ପୂର୍ବରୁ ସେମାନେ ଆହୁରି କ୍ୱାରାଣ୍ଟାଇନରେ ରହିବେ ବୋଲି ଏସି ମିଲନ ପକ୍ଷରୁ କୁହାଯାଇଛି। ଦଳର ଅନ୍ୟତମ ଶ୍ରେଷ୍ଠ ଡିଫଣ୍ଡେର ଥିଲେ ୫୧ ବର୍ଷୀୟ ମାଲଡିନି। ସେ ଦଳ ପାଇଁ ୬୪୭ ମ୍ୟାଚ୍ ଖେଳିଥିଲେ। ତାଙ୍କ ପ୍ରତିନିଧିତ୍ୱରେ ଦଳ ୫ ଚାମ୍ପିୟନ୍ସ ଟ୍ରଫି ହାସଲ କରିଥିଲା। ଜୁଭେଣ୍ଟସ ଦଳୀୟ ସାଥୀ ଡାନିଏଲ ରୁଗାନି ଓ ବ୍ଲାଇସେ ମାଟୁଡିଙ୍କ କୋଭିଡ୍-୧୯ ଟେଷ୍ଟ ରିପୋର୍ଟ ପଜେଟିଭ ଆସିଛି। ଇଟାଲିରେ କରୋନା ଭାଇରସ ଆତଙ୍କ ଖେଳାଇ ରଖିଛି। ଦେଶର କରୋନା ଜନିତ ମୃତ୍ୟୁ ସଂଖ୍ୟା ଚାଇନାକୁ ଅତିକ୍ରମ କରିସାରିଛି।
