ରସୁଲପୁର, ୧।୪ (ଡି.ଏନ୍.ଏ.): ରସୁଲପୁର ବ୍ଲକ ଅନ୍ତର୍ଗତ ଅର୍ଥଗାଁ, ସାମନ୍ତରାପୁର, ମଙ୍ଗରାଜପୁର, ଝାଲପଡ଼ା, ଅତଲାପୁର, ବ୍ରହ୍ମବରଦା, ମହେଶ୍ୱରପୁର, ବରୁଆଁ ଭଳି ୧୫ରୁ ଊର୍ଦ୍ଧ୍ୱ ପଞ୍ଚାୟତରେ ଶତାଧିକ ଏକର ଜମିରେ ଆଖୁଚାଷ ହୋଇଥିବା ବେଳେ ଏବେ ଏହା ଅମଳକ୍ଷମ ହୋଇଛି। ଆଖୁ କଟା ହୋଇ ବିଲମୁଣ୍ଡରେ ଗଦା ହୋଇ ରହିଥିଲେ ବି ଲକ୍ଡାଉନ୍ ଯୋଗୁ ଆଖୁ ନେବାକୁ କମ୍ପାନୀ ଲୋକେ ଆସୁନାହାନ୍ତି। ଏଭଳି ସ୍ଥିତିରେ ୨୦୦ଟନ୍ରୁ ଊର୍ଦ୍ଧ୍ୱ ଆଖୁ ରାସ୍ତାକଡରେ ପଡ଼ି ରହିଛି। ଯେତେ ଖରା ଅଧିକ ହେବ, ଆଖୁ ଅମଳ ସେତେ ପ୍ରଭାବିତ ହେବ। ଦିନକୁ ଦିନ ତାପମାତ୍ରା ବୃଦ୍ଧି ଘଟୁଥିବାରୁ ବହୁ କ୍ଷତି ସହିବାକୁ ପଡ଼ିବ ବୋଲି ଚାଷୀମାନେ ଆଶଙ୍କା ବ୍ୟକ୍ତ କରିଛନ୍ତି।
ଉକ୍ତ ବ୍ଲକ ଅଞ୍ଚଳରେ ପ୍ରାୟତଃ ୧୦୦୦ ଏକର ଜମିରେ ଆଖୁଚାଷ ହୋଇଛି। ଆଖୁ ଚାଷୀଙ୍କୁ ପ୍ରୋତ୍ସାହିତ କରିବା ପାଇଁ ବ୍ଲକ ପକ୍ଷରୁ ୧୫୮ଜଣଙ୍କୁ ଆଖୁଚାଷ ପ୍ରଦର୍ଶନୀ ପାଇଁ ସହାୟତା ଯୋଗାଇ ଦିଆଯାଇଛି। ଏଥିସହ ଶକ୍ତି ସୁଗାର୍ସ ପକ୍ଷରୁ ଚାଷୀମାନଙ୍କୁ ବିଭିନ୍ନ ସୁବିଧା ସୁଯୋଗ ଯୋଗାଇ ଦିଆଯାଇଛି। ଆଖୁ ଚାଷ ଆରମ୍ଭଠାରୁ ଅମଳ ପର୍ଯ୍ୟନ୍ତ କମ୍ପାନୀ ପକ୍ଷରୁ ସମସ୍ତ ସହାୟତା ପ୍ରଦାନ କରାଯିବା ସହ ଆଖୁ କ୍ରୟକରି ଚାଷୀମାନଙ୍କୁ ସେମାନଙ୍କ ପାଉଣା ଯୋଗାଇ ଦିଆଯାଉଛି। ପ୍ରତିବର୍ଷ ଆଖୁଚାଷୀମାନଙ୍କ ସହ କମ୍ପାନୀ ମଧ୍ୟରେ ଏହିଭଳି କାରବାର ହୋଇଆସୁଛି। ଚଳିତବର୍ଷ କରୋନା ପ୍ରଭାବରେ କମ୍ପାନୀ ବନ୍ଦ ଥିବାରୁ ଆଖୁ ସଂଗ୍ରହ କରାଯାଇ ପାରୁନାହିଁ। ଚାଷୀମାନେ ଆଖୁ ଅମଳ କରି ରାସ୍ତାକଡ଼ରେ ଗଦା କରି ରଖିଛନ୍ତି। ଚାଷୀର ଉତ୍ପାଦିତ ଦ୍ରବ୍ୟକୁ ପରିବହନ କରିବାରେ କୌଣସି ଅସୁବିଧା ନ ଥିଲେ ବି କମ୍ପାନୀ କର୍ମଚାରୀମାନେ ଫୋନ ଉଠାଉନାହାନ୍ତି ବୋଲି ଚାଷୀ ନରେନ୍ଦ୍ର ସାହୁ, ସରୋଜ ପାଢୀ, ଗୌତମ ନାୟକ, ପର୍ଶୁରାମ ମୁଦୁଲି, ଭିକାରୀ ଘଡେଇ, ନୀଳମଣି ମହାଳିକ, ସନାତନ ନାୟକ, କାଶୀନାଥ ବିଶ୍ୱାଳ, କାର୍ତ୍ତିକ ରାଉତ, ଗଦାଧର ମଲିକ, ସନାତନ ଦାସ, ତ୍ରୈଲୋକ୍ୟ ନାୟକ ପ୍ରମୁଖ କହିଛନ୍ତି। ଆଖୁ ବିକ୍ରି ହୋଇ ନ ପାରିବାରୁ ଏହା ଖରାରେ ଶୁଖି ଜାଳ ହୋଇଗଲାଣି। ଏହାଛଡା ବିଲରେ ଥିବା ଆଖୁ ଅମଳ ହେବାରେ ବିଳମ୍ବ ହେଉଥିବାରୁ ଉତ୍ପାଦନ କମିବା ସହ ଚାଷୀଙ୍କର ବହୁତ କ୍ଷତି ହେବା ଆଶଙ୍କା ଦେଖାଦେଇଛି। କ୍ଷତିଗ୍ରସ୍ତ ଚାଷୀଙ୍କ ସମସ୍ୟା ପ୍ରତି କାହାରି ନଜର ନାହିଁ। କ୍ଷତିଗ୍ରସ୍ତ ଚାଷୀମାନଙ୍କୁ ସରକାରୀ ସହାୟତା ଯୋଗାଇ ଦେବା ସହ କମ୍ପାନୀ ପକ୍ଷରୁ କ୍ଷତିପୂରଣ ପ୍ରଦାନ କରିବାକୁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ରସୁଲପୁର ବ୍ଲକ ସହକାରୀ କୃଷି ଅଧିକାରୀ ଭାଗ୍ୟଧର ସାହୁଙ୍କୁ ପଚାରିବାରେ, ସେ ଏ ସମ୍ପର୍କରେ ଅବଗତ ନାହାନ୍ତି। ଏ ନେଇ ଚାଷୀଙ୍କଠାରୁ ଅଭିଯୋଗ ଆସିଲାପରେ ସରକାରୀ ନିୟମ ଅନୁଯାୟୀ ଯାହା ପଦକ୍ଷେପ ନିଆଯିବ ବୋଲି ପ୍ରକାଶ କରିଛନ୍ତି। ଏ ଦିଗରେ କମ୍ପାନୀର କେନ୍ ଅଫିସରଙ୍କୁ ଫୋନ୍ ଯୋଗେ ଯୋଗାଯୋଗ କରାଯାଇଥିଲେ ବି ସେ ଫୋନ୍ ଉଠାଇ ନ ଥିବାରୁ ତାଙ୍କ ପ୍ରତିକ୍ରିୟା ନିଆଯାଇପାରିନାହିଁ।
