କଟକ ଜିଲା ବାଙ୍କୀ ବ୍ଲକ ଅନ୍ତର୍ଗତ ସୁବର୍ଣ୍ଣପୁର ଗ୍ରାମରେ ୧୯୩୮ ଡିସେମ୍ବର ୨୧ରେ ଜନ୍ମଗ୍ରହଣ କରିଥିଲେ ବିଶିଷ୍ଟ ଓଡ଼ିଶୀ କଣ୍ଠସଙ୍ଗୀତ ଶିଳ୍ପୀ ଡ. ଶ୍ୟାମାମଣୀ ଦେବୀ। ସେ ପିଲାବେଳେ ଘର ପିଣ୍ଡାରେ ବସି ପାଲାଗୀତ ଶୁଣିଶୁଣି ସଙ୍ଗୀତ ପ୍ରତି ଆକୃଷ୍ଟ ହୋଇଥିଲେ। ୧୨ ବର୍ଷ ବୟସରେ ସେ ଆକାଶବାଣୀ କେନ୍ଦ୍ରରେ କାମ କରିବା ଆରମ୍ଭ କରିଥିଲେ। ଶ୍ୟାମାମଣୀଙ୍କ ବଡ଼ବାପା ହେଉଛନ୍ତି କବିଚନ୍ଦ୍ର କାଳିଚରଣ ପଟ୍ଟନାୟକ। କଳା ପ୍ରତି ରୁଚି ରଖିଥିଲେ ମଧ୍ୟ ପିଲାବେଳେ ଅନେକ ବିରୋଧର ସେ ସମ୍ମୁଖୀନ ହୋଇଥିଲେ। ହେଲେ ତାଙ୍କର ଯାତ୍ରା ଅଟକି ନ ଥିଲା। ପ୍ରାୟ ୭ ଦଶନ୍ଧି ଧରି ଓଡ଼ିଶୀ ସଙ୍ଗୀତରେ କଣ୍ଠଦାନ କରି ଦେଶ ବିଦେଶରେ ସେ ପ୍ରସିଦ୍ଧି ଲାଭ କରି ସାରିଲେଣି। ୧୯୫୮ରେ ଦେଶର ପ୍ରଥମ ରାଷ୍ଟ୍ରପତି ଡ. ରାଜେନ୍ଦ୍ର ପ୍ରସାଦଙ୍କ ଠାରୁ ପୁରସ୍କୃତ ହୋଇଥିବା ଶ୍ୟାମାମଣୀ ଏବେସୁଦ୍ଧା ଅନେକ ପୁରସ୍କାରର ଅଧିକାରୀ ହୋଇସାରିଲେଣି। ଓଡ଼ିଶା ସଙ୍ଗୀତ ନାଟକ ଏକାଡେମୀର ୨୦୧୭ ବର୍ଷ ନିମନ୍ତେ ସର୍ବୋଚ୍ଚ ସମ୍ମାନ ତଥା ‘କବି ସମ୍ରାଟ ଉପେନ୍ଦ୍ର ଭଞ୍ଜ ସମ୍ମାନ’ ପାଇବାକୁ ସେ ମନୋନୀତ ହୋଇଛନ୍ତି। ଡ.ଶ୍ୟାମାମଣୀଙ୍କ ସହ ଧରିତ୍ରୀର ସ୍ବତନ୍ତ୍ର ସାକ୍ଷାତକାର।
ରାଜ୍ୟର ଏକ ମର୍ଯ୍ୟାଦାଜନକ ସମ୍ମାନ ପାଇବାକୁ ମନୋନୀତ ହୋଇଛନ୍ତି। କିପରି ଅନୁଭବ ହେଉଛି?
-ଖୁସି ଲାଗୁଛି। ହେଲେ ଅତ୍ୟଧିକ ଖୁସି ନୁହେଁ। ପିଲାବେଳୁ ମୋ ଗୁଣ ହିଁ ସେମିତି। ଖୁସି ଖବରରେ ଅଧିକ ଖୁସି ହୁଏନି କିମ୍ବା ଦୁଃଖ ଖବର ମୋତେ ଅଧିକ ମ୍ରିୟମାଣ କରେନି। ତଥାପି କଳା ପାଇଁ ପୁରସ୍କୃତ ହେବା ଜଣେ କଳାକାର ପାଇଁ ବଡ଼ କଥା। ରାଜ୍ୟବାସୀଙ୍କର ଭଲପାଇବା ପାଇଲି। ଆଜିପର୍ଯ୍ୟନ୍ତ ମିଳିଥିବା ସମସ୍ତ ସମ୍ମାନକୁ ମୁଁ ସମ୍ମାନ ଜଣାଏ।
ସଙ୍ଗୀତ ଦୁନିଆରେ ଏତେ ବର୍ଷର ଯାତ୍ରା କିପରି ରହିଛି?
-ବହୁତ ଲମ୍ବା ଯାତ୍ରା। ସ୍ବର୍ଗତ ଅକ୍ଷୟ ମହାନ୍ତିଙ୍କ ଠାରୁ ଆରମ୍ଭ କରି ବମ୍ବେ ଯାଇ ଅନେକ ନାମୀଦାମୀ ସଙ୍ଗୀତକାରଙ୍କ ସହ କାର୍ଯ୍ୟ କରିଛି। ବିଭିନ୍ନ ଭାଷାର ଗୀତରେ କଣ୍ଠଦାନ କରିଛି। ଓଡ଼ିଆ ଚଳଚ୍ଚିତ୍ରରେ ମଧ୍ୟ ଗୀତ ଗାଇବାର ସୁଯୋଗ ପାଇଛି। ଏପରି କି ପାରାଦୀପ ପୋର୍ଟ, ହୀରାକୁଦ ଡ୍ୟାମ୍, ରାଉରକେଲା ଷ୍ଟିଲ ପ୍ଲାଣ୍ଟଠାରୁ ଆରମ୍ଭ କରି ଓଡ଼ିଶାର ଅନେକ ପ୍ରମୁଖ ସ୍ଥାନର ଉଦ୍ଘାଟନୀ ଉତ୍ସବରେ ଗୀତ ଗାଇଛି।
ସବୁଠାରୁ ସ୍ମରଣୀୟ ମୁହୂର୍ତ୍ତ କ’ଣ?
– ଯେବେ ଦେଶର ଶ୍ରେଷ୍ଠ କଣ୍ଠଶିଳ୍ପୀ ଲତା ମଙ୍ଗେସକରଙ୍କୁ ଭେଟିଥିଲି, ତାହା ମୋ ପାଇଁ ସବୁଠାରୁ ସ୍ମରଣୀୟ ମୁହୂର୍ତ୍ତ। ତାଙ୍କ ପାଦ ଛୁଇଁବା ମୋ ପାଇଁ ସ୍ବପ୍ନ ଭଳି ଥିଲା। ସବୁବେଳେ ତାଙ୍କ ପାଦ ଛୁଇଁବାକୁ ସୁଯୋଗ ଖୋଜୁଥିଲି। ହେଲେ ଦିନେ ତାଙ୍କୁ ତାଙ୍କ ବାସଭବନରେ ଭେଟିବାର ଅପୂର୍ବ ସୁଯୋଗ ମିଳିଲା। ସେଦିନ ତାଙ୍କ ପାଦ ଛୁଉଁଛୁଉଁ ଭୋଭୋ କରି କାନ୍ଦି ଉଠିଥିଲି।
ଓଡ଼ିଶୀ ଗୀତ ଗାଉଥିବା ଆଗାମୀ ପିଢ଼ିର କଣ୍ଠଶିଳ୍ପୀଙ୍କ ପାଇଁ ବାର୍ତ୍ତା କ’ଣ ଦେବେ?
-ଏବେ ଗୀତ ପ୍ରତି ରୁଚି ରଖୁଥିବା ଯୁବପିଢ଼ି ଦ୍ୱନ୍ଦ୍ୱରେ ରହୁଛନ୍ତି। ଗୀତ ଦୁନିଆ ଏବେ ବିଶାଳ ହେଲାଣି। ବିଭିନ୍ନ ପ୍ରକାରର ଗୀତ ତିଆରି ହେଉଛି। ଫ୍ୟୁଜନ କରାଯାଉଛି। ହେଲେ ଯିଏ ଯେଉଁ ଗୀତ ଗାଉନା କାହିଁକି ଓଡ଼ିଶାର ମୂଳ ପରମ୍ପରାକୁ ଭୁଲି ନ ଯାଉ। ଏହା ହିଁ ଆମର ପରିଚୟ।
