ଭୁବନେଶ୍ୱର, ୧୭ ।୬(କ୍ରୀଡ଼ା ପ୍ରତିନିଧି)-
ଭାରତୀୟ ଯୁବ ଫୁଟବଲର ଥୋଇବା ସିଂ ମୋଇରାଙ୍ଗଥେମ୍ ଓଡ଼ିଶା ଏଫସି ଦଳରେ ଯୋଗ ଦେଇଛନ୍ତି। ଇଣ୍ଡିଆନ ସୁପରଲିଗ୍(ଆଇଏସଏଲ)ର ୭ମ ସଂସ୍କରଣ ପୂର୍ବରୁ ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ୧୭ ବର୍ଷୀୟ ସେଣ୍ଟ୍ରାଲ ମିଡ୍ଫିଲ୍ଡରଙ୍କ ସହ ୩ ବର୍ଷିଆ ଚୁକ୍ତି କରିଛି। ମଣିପୁରର ଏହି ଫୁଟବଲ ପ୍ରତିଭା ଭାରତୀୟ ଦଳ ପକ୍ଷରୁ ବିଭିନ୍ନ ବୟସବର୍ଗର ପ୍ରତିଯୋଗିତା ଖେଳିଛନ୍ତି। ଏହା ବ୍ୟତୀତ ସେ ଆଇ-ଲିଗ୍ ଦଳ ମିନର୍ଭା ପଞ୍ଜାବ ପକ୍ଷରୁ ଗତ ୨ ସିଜନ ଧରି ଖେଳି ଆସୁଥିଲେ। ମିନର୍ଭା ପକ୍ଷରୁ ଖେଳିବା ଅବସରରେ ସେ ଗତବର୍ଷ ଏଏଫସି କପ୍ରେ ସର୍ବକନିଷ୍ଠ ଖେଳାଳିଭାବେ ଏକ ଗୋଲ ଦେବାରେ ସକ୍ଷମ ହୋଇଥିଲେ। ନୂଆ ଚୁକ୍ତି ସମ୍ପର୍କରେ ସୂଚନା ଦେଇ କ୍ଲବ ସଭାପତି ରୋହନ ଶର୍ମା କହିଛନ୍ତି ଯେ, ”ଥୋଇବା ଜଣେ ଆଗ୍ରହୀ ଖେଳାଳି ଏବଂ ବହୁ ପ୍ରତିଭାର ଅଧିକାରୀ। ସେ ଓଡ଼ିଶା ଏଫସି ଦଳରେ ସାମିଲ ହୋଇଥିବାରୁ ମୁଁ ବହୁତ ଖୁସି। ସେ ଜଣେ କମ୍ ବୟସର ଖେଳାଳି ହୋଇଥିଲେ ହେଁ ଭାରତୀୟ ଯୁବ ଦଳରେ ଏବଂ ଆଇ-ଲିଗ୍ରେ ଖେଳିବାର ଅଭିଜ୍ଞତା ରଖିଛନ୍ତି। ତାଙ୍କ ମେଣ୍ଟର ଭିନିତ କ୍ଲବର ବିଚାରଧାରା ଅନୁସାରେ ତାଙ୍କୁ ଆଗକୁ ବଢ଼ିବାରେ ଏବଂ ଅଭିଜ୍ଞ ହେବାରେ ସହଯୋଗ କରିବେ। ଚଳିତ ବର୍ଷ ଶ୍ରେଷ୍ଠ ପ୍ରଦର୍ଶନ ସହ ଭବିଷ୍ୟତରେ ସେ ଜଣେ ଉତ୍ତମ ଖେଳାଳି ହେବା ଆଶା ରହିଛି“। ଆଇଏସଏଲ ଖେଳିବା ପାଇଁ ଥୋଇବା ମଧ୍ୟ ବ୍ୟଗ୍ରତା ପ୍ରକାଶ କରିଛନ୍ତି। ”ଓଡ଼ିଶା ଏଫସି ପକ୍ଷରୁ ଖେଳି ଆଇଏସଏଲ କ୍ୟାରିୟର ଆରମ୍ଭ କରିବାକୁ ମୁଁ ବ୍ୟଗ୍ର। ସେଠାରେ ଉତ୍ତମ ପ୍ରଦର୍ଶନ ସହ ମୁଁ ଭାରତୀୟ ଦଳରେ ମଧ୍ୟ ସ୍ଥାନ ପାଇବାକୁ ଆଶା ରଖିଛି। ଭାରତର ଅନେକ ଯୁବ ଖେଳାଳିଙ୍କୁ ନେଇ ଓଡ଼ିଶା ଏଫସି ସମୃଦ୍ଧ। ଏହାର ଏକ ସଦସ୍ୟ ହୋଇଥିବାରୁ ମୁଁ ଅତ୍ୟନ୍ତ ଆନନ୍ଦିତ। ଏହି ଦଳ ପକ୍ଷରୁ ଖେଳି ଜ୍ଞାନ ଆହରଣ ସହ ଉନ୍ନତି କରିବା ନେଇ ମୁଁ ଦୃଢ଼ନିଶ୍ଚିତ“ ବୋଲି ନିଜ ପ୍ରତିକ୍ରୀୟାରେ ଥୋଇବା ପ୍ରକାଶ କରିଛନ୍ତି।
