ଭୁବନେଶ୍ୱର, ୨୧-୭(ବ୍ୟୁରୋ): ଓମ୍ ଜୟ ଇଭି ଲିମିଟେଡ ରାଜ୍ୟରେ ବ୍ୟାଟେରି ଚାଳିବ ସ୍କୁଟର ନିର୍ମାଣ କରିବ। ଯାଜପୁର ଜିଲାର ବଡଚଣାଠାରେ ୧୦ ଏକର ପରିମିତ ସ୍ଥାନରେ କମ୍ପାନୀ ଏଥି ଲାଗି ଏକ ଷ୍ଟେଟ୍ ଅଫ୍ ଆର୍ଟ ମାନୁଫାକଚରିଂ ଫାସିଲିଟି ନିର୍ମାଣ କରୁଛି। ଏଥିରେ ବ୍ୟାଟେରି ଏବଂ ଚେସିିସ୍ ମଧ୍ୟ ପ୍ରସ୍ତୁତ କରାଯିବ। ବର୍ତ୍ତମାନ ସୁଦ୍ଧା ୟୁନିଟ୍ରେ ୮୦ କୋଟି ଟଙ୍କା ବିନିଯୋଗ କରାଯାଇଛି। ଆଗାମୀ ଦିନରେ ଏଥିରେ ୧୨୦ କୋଟି ଟଙ୍କା ନିବେଶ ହେବ ବୋଲି କମ୍ପାନୀର ନିର୍ଦ୍ଦେଶକ ହର୍ଷବର୍ଦ୍ଧନ ଦିଦ୍ଓ୍ବାନିଆ ସୂଚନା ଦେଇଛନ୍ତି।
ଶନିବାର କମ୍ପାନୀ ପକ୍ଷରୁ ପ୍ରସ୍ତୁତ ୪ ମଡେଲକୁ ବଜାର ପ୍ରବେଶ କରାଇ ସେ କହିଛନ୍ତି ଯେ, ଚଳିତ ଆର୍ଥତ୍କ ବର୍ଷ ଶେଷ ସୁଦ୍ଧା ୨୦,୦୦୦ ଯାନ ବିକ୍ରି କରିବାକୁ ଯୋଜନା ରହିଛି। ସେହିଭଳି ଶୀଘ୍ର ଆଉ ୧୦ ନୂଆ ମଡେଲ୍ ଆସିବ। ୟୁନିଟ୍ରୁ ଶୀଘ୍ର କମର୍ସିଆଲ ଉତ୍ପାଦନ କରାଯିବାକୁ ଲକ୍ଷ୍ୟ ରଖାଯାଇଛି। ଗଣେଷ ପୂଜା ବେଳକୁ ଯାନଗୁଡିକ ବଜାରକୁ ଆସିବ। ୟୁନିଟର ବାର୍ଷିକ ଉତ୍ପାଦନ କ୍ଷମତା ୨.୫ ଲକ୍ଷ ୟୁନିଟ ରହିଛି। ପ୍ରାଥମିକ ପର୍ଯ୍ୟାୟରେ ୮୦ ଲୋକଙ୍କୁ ନିଯୁକ୍ତ କରାଯାଇଛି। ପ୍ଲାଣ୍ଟ ପୂର୍ଣ୍ଣ କ୍ଷମତା ବ୍ୟବହାର ସ୍ଥିତିକୁ ଆସିଲେ ୪୫୦ ପ୍ରତ୍ୟକ୍ଷ ଏବଂ ୩ ହଜାର ପରୋକ୍ଷ ନିଯୁକ୍ତି ସୃଷ୍ଟି ହେବ ବୋଲି ସେ ସ୍ପଷ୍ଟ କରିଛନ୍ତି।
ଡିଲର ନେଟଓ୍ବର୍କ ସମ୍ପ୍ରସାରଣ ଉପରେ ଏକ ପ୍ରଶ୍ନର ଉତ୍ତରରେ ସେ କହିଛନ୍ତି,ପ୍ରାଥମିକ ପର୍ଯ୍ୟାୟରେ ୨୫୦ ଡିଲର ନିଯୁକ୍ତି କରାଯିବାକୁ ଯୋଜନା ରହିଛି। ପଶ୍ଚିମବଙ୍ଗ, ଝାଡଖଣ୍ଡ, ଓଡ଼ିଶା, ଆସାମ ଏବଂ ମେଘାଳୟ ଭଳି ଅନ୍ୟ ରାଜ୍ୟରେ ଏ ନେଇ ପ୍ରକ୍ରିୟା ଆରମ୍ଭ ହୋଇଛି। ଓଡିଶାରେ ୮ ଡିଲର ନିଯୁକ୍ତ କରାଯାଇଛି। ଏବେ ମଡେଲଗୁଡିକର ଘଣ୍ଟାପ୍ରତି ବେଗ ୨୫ କିମି ରହିଛି। ଏହା ଲିଡ୍ ଏସିଡ ଏବଂ ଲିଥିୟମ ଆୟନ ବ୍ୟାଟେରି ସହ ଆସୁଛି। ଲିଥିୟମ ଆୟନ ବ୍ୟାଟେରି ମଡେଲର ବଜାର ଦର ୫୫-୬୫ ହଜାର ଏବଂ ଲିଡ୍ ଏସିଡ ମଡେଲର ବଜାର ଦର ୪୫-୫୦ ହଜାର ରହିବ ବୋଲି ଅନୁମାନ କରାଯାଉଛି। ନୂଆ ମଡେଲଗୁଡିକ ଦ୍ୱାରା ଗ୍ରାହକ ବାର୍ଷିକ ୩୦ ହଜାର ଟଙ୍କା ସଞ୍ଚୟ କରିପାରିବେ। ଏହାର ମେଣ୍ଟେନାନ୍ସ ଖର୍ଚ୍ଚ ମଧ୍ୟ କମ୍ ବୋଲି ସେ ସୂଚନା ଦେଇଛନ୍ତି। କାର୍ଯ୍ୟକ୍ରମରେ କମ୍ପାନୀର ନିର୍ଦ୍ଦେଶକ ଜୟପ୍ରକାଶ ଦିଦଓ୍ବାନିଆ ଉପସ୍ଥିତ ଥିଲେ।
କମ୍ପାନୀର ବିଭିନ୍ନ ମଡେଲ…
୪ୟୁ
ମୋଟର ୨୫୦ ଓ୍ବାଟ, ୬୦ ଭୋଲଟ ୨୦ ଏଏଚ୍ ଲିଥିୟମ ବ୍ୟାଟେରି, ଟପ୍ ସ୍ପିଡ ୨୫ କିମି, ରେଞ୍ଜ ୬୦-୭୦ କିମି; ଚାର୍ଜିଂ ସମୟ ୪ରୁ ୬ ଘଣ୍ଟା, ବୋସ୍ ମୋଟର, କିଲେସ୍ ଏଣ୍ଟ୍ରି, ଆଣ୍ଟି ଥେପ୍ଟ ଲକ୍, ୟୁଏସ୍ବି ପୋର୍ଟ, ଡିଟାଚେବଲ ବ୍ୟାଟେରି, ଏଚ୍ଏଲ୍ ଏଲ୍ଇଡି ଲାଇଟିଂ, ଡୁଆଲ ଡିକ୍ସ ବ୍ରେକ।
ଜେନିଆ
ବୋସ ମୋଟର, କିଲେସ ଏଣ୍ଟ୍ରି, ଆଣ୍ଟି ଥେପ୍ଟ ଲକ୍, ୟୁଏସ୍ବି ପୋର୍ଟ, ଡିଟାଚେବଲ ବ୍ୟାଟେରି, ଏଚ୍ଏଲ୍ ଏଲଇଡି ଲାଇଟିଂ, ଡୁଆଲ ଡିକ୍ସ ବ୍ରେକ,ମୋଟର ୨୫୦ ଓ୍ବାଟ, ୬୦ ଭୋଲଟ ୨୦ ଏଏଚ୍ ଲିଥିୟମ ବ୍ୟାଟେରି, ଟପ୍ ସ୍ପିଡ ୨୫ କିମି, ରେଞ୍ଜ ୬୦-୭୦ କିମି; ଚାର୍ଜିଂ ସମୟ ୪ରୁ ୬ ଘଣ୍ଟା।
ଓ୍ବିଣ୍ଡ୍
ମୋଟର ୨୫୦ ଓ୍ବାଟ, ୬୦ ଭୋଲଟ ୨୦ ଏଏଚ୍ ଲିଡ ଏସିଡ, ଟପ୍ ସ୍ପିଡ ୨୫ କିମି, ରେଞ୍ଜ ୫୦-୬୦ କିମି; ଚାର୍ଜିଂ ସମୟ ୭ରୁ ୮ ଘଣ୍ଟା, କିଲେସ ଏଣ୍ଟ୍ରି, ଆଣ୍ଟି ଥେପ୍ଟ ଲକ୍, ୟୁଏସ୍ବି ପୋର୍ଟ, ଡିସ୍କ ବ୍ରେକ, ଏଚ୍ଏଲ୍ ଏଲ୍ଇଡି ଲାଇଟିଂ।
ୟୋର୍
କିଲେସ ଏଣ୍ଟ୍ରି, ଆଣ୍ଟି ଥେପ୍ଟ ଲକ୍, ୟୁଏସ୍ବି ପୋର୍ଟ, ଡିସ୍କ ବ୍ରେକ, ଏଚ୍ଏଲ୍ ଏଲ୍ଇଡି ଲାଇଟିଂ, ମୋଟର-୨୫୦ ଓ୍ବାଟ, ୬୦ ଭୋଲଟ ୨୦ ଏଏଚ୍ ଲିଡ ଏସିଡ ବ୍ୟାଟେରି, ଟପ୍ ସ୍ପିଡ ୨୫ କିମି, ରେଞ୍ଜ ୫୦-୬୦ କିମି; ଚାର୍ଜିଂ ସମୟ ୭ରୁ ୮ ଘଣ୍ଟା।
