ଭୁବନେଶ୍ୱର,୩ା୧(ବ୍ୟୁରୋ): ଓଡ଼ିଶାରେ ଅଲ୍ ଇଣ୍ଡିଆ ଫରେଷ୍ଟ ସ୍ପୋଟର୍ସ-୨୦୨୦ ଆୟୋଜନ କରାଯିବ। ଏନେଇ ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଅଧ୍ୟକ୍ଷତାରେ ଗୁରୁବାର ଏକ ଉଚ୍ଚସ୍ତରୀୟ ବୈଠକ ହୋଇଥିବା ଜଣାପଡ଼ିଛି। ଭୁବନେଶ୍ୱରକୁ ଦେଶର କ୍ରୀଡ଼ା ରାଜଧାନୀ କରିବାରେ ଏହି ପ୍ରତିଯୋଗିତା ସହାୟକ ହେବ ବୋଲି କୁହାଯାଇଛି। ତେଣୁ ଏହି ପ୍ରତିଯୋଗିତାକୁ ଗୁଣାତ୍ମକ ଦୃଷ୍ଟିକୋଣରୁ ଅଧିକ ସଫଳତାର ସହ ଆୟୋଜନ କରିବା ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି।
ଏହି କ୍ରୀଡ଼ା ପ୍ରତିଯୋଗିତାର ସଫଳ ଆୟୋଜନ ପାଇଁ କ୍ରୀଡ଼ା ଓ ଯୁବସେବା ବିଭାଗ, ଜଙ୍ଗଲ ଓ ପରିବେଶ ବିଭାଗକୁ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ସହ ମିଳିତଭାବେ କାର୍ଯ୍ୟ ଆରମ୍ଭ କରିବା ପାଇଁ ନିର୍ଦ୍ଦେଶ ଦେଇଛନ୍ତି। କ୍ରୀଡ଼ାବିତ୍, ସହାୟକ, ସେମାନଙ୍କ ପରିବାର ରହିବା ବ୍ୟବସ୍ଥା ସହ ସେହି ସମୟରେ ପର୍ଯ୍ୟଟନ ବିଭାଗ ପକ୍ଷରୁ ସ୍ବତନ୍ତ୍ର ପ୍ୟାକେଜ ପ୍ରସ୍ତୁତ ଉପରେ ଗୁରୁତ୍ୱ ଦିଆଯାଇଛି। ଆସନ୍ତା ମାର୍ଚ୍ଚ ୩ରେ ରାଜଧାନୀରେ ଥିବା କଳିଙ୍ଗ ଷ୍ଟାଡିୟମରେ ଏହାର ଶୁଭାରମ୍ଭ କରାଯିବ। ୫ ଦିନ ଧରି ଏହି କ୍ରୀଡ଼ା ପ୍ରତିଯୋଗିତା ଚାଲିବ। ମାର୍ଚ୍ଚ ୭ରେ ଏହାର ଉଦ୍ଯାପନୀ ସମାରୋହ ଅନୁଷ୍ଠିତ ହେବ। ପିସିସିଏଫ୍ ସନ୍ଦୀପ ତ୍ରିପାଠୀ କହିଛନ୍ତି ଯେ, ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରୁ ୪୫ଟି ଦଳ ପ୍ରତିଯୋଗିତାରେ ଭାଗନେବେ। ପ୍ରାୟ ୨୬୦୦ ପ୍ରତିଯୋଗୀ ନିଜର କ୍ରୀଡ଼ା ଦକ୍ଷତା ପ୍ରତିପାଦନ କରିବାର ସୁଯୋଗ ପାଇବେ। ୫୦୦ ସ୍ଥାନୀୟ ସହାୟକ କାର୍ଯ୍ୟକ୍ରମର ସୁପରିଚାଳନାରେ ସହଯୋଗ କରିବେ ବୋଲି ତ୍ରିପାଠୀ କହିଛନ୍ତି। ୨୩ କ୍ରୀଡ଼ାରେ ୨୩୦ଟି ଇଭେଣ୍ଟର ଆୟୋଜନ କରାଯିବ। ଏହି କ୍ରୀଡାକୁ ପରିଚାଳନା କରିବାକୁ ଥିବା ରେଫରି କଳିଙ୍ଗ ଷ୍ଟାଡିୟମ୍, କ୍ରୀଡ଼ା ନିର୍ଦ୍ଦେଶାଳୟ ଏବଂ ରାଜ୍ୟର ପ୍ରମୁଖ ମାନ୍ୟତାପ୍ରାପ୍ତ କ୍ରୀଡ଼ା ସଂଘରୁ ମନୋନୀତ ହେବେ। କ୍ଷେତ୍ରସ୍ତରୀୟ କ୍ରୀଡ଼ା, ଭଲିବଲ, ବାସ୍କେଟବଲ, ସ୍କ୍ବାଶ, ଟେବୁଲ ଟେନିସ୍ , ହକି, କ୍ରିକେଟ, ବ୍ୟାଡ୍ମିଣ୍ଟନ, ଲନ୍ ଟେନିସ, ତୀରଚାଳନା, ଭାରୋତ୍ତୋଳନ, ଗଲ୍ଫ, କ୍ୟାରମ୍, ଚେସ୍, ବିଲିୟାଡର୍ସ ଇତ୍ୟାଦି ପ୍ରତିଯୋଗିତା ଆୟୋଜନ କରାଯିବ। କଳିଙ୍ଗ ଷ୍ଟାଡିୟମ ସମେତ କଳିଙ୍ଗ କିଟ୍, ସାଇ ଇଣ୍ଟରନ୍ୟାଶନାଲ, ଉତ୍କଳ ବିଶ୍ୱବିଦ୍ୟାଳୟ ଏବଂ ଗଲ୍ଫ କୋର୍ସରେ ଖେଳାଯିବ। ଅନ୍ୟମାନଙ୍କ ମଧ୍ୟରେ ଏହି ବୈଠକରେ ଉନ୍ନୟନ କମିଶନର ସୁରେଶ ମହାପାତ୍ର, ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଡକ୍ଟର ମୋନା ଶର୍ମା, ଅର୍ଥ ପ୍ରମୁଖ ସଚିବ ଅଶୋକ ମୀନା, ଗୃହ ପ୍ରମୁଖ ସଚିବ ସଞ୍ଜୀବ ଚୋପ୍ରା ଏବଂ କ୍ରୀଡ଼ା ସଚିବ ବିଶାଳ ଦେବ ଉପସ୍ଥିତ ରହିଥିଲେ।
