ଯୋଡ଼ା,୨୦।୧୦(ଡି.ଏନ୍.ଏ.): ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବି ନେଇ ପଦଯାତ୍ରା ଆରମ୍ଭ କରିଥିବା ଜଗତସିଂହପୁର ଜିଲା ବାଲିକୁଦା ବ୍ଲକ ଭଗବାନସିଂଘ ଗ୍ରାମର ସତ୍ୟବ୍ରତ ଦାସ ରବିବାର କେନ୍ଦୁଝର ଜିଲା ଯୋଡ଼ାଠାରେ ପହଞ୍ଚିଛନ୍ତି। ଯୋଡ଼ାରେ ବୁଦ୍ଧିଜୀବୀ ମହଲରୁ ତାଙ୍କୁ ସମ୍ବର୍ଦ୍ଧନା ଦିଆଯାଇଛି। ସତ୍ୟବ୍ରତ କହିଛନ୍ତି, ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା, ମହାନଦୀ ଜଳ ସମସ୍ୟା ଓ ପୋଲାଭରମ ପ୍ରକଳ୍ପ ବିବାଦରେ ନ୍ୟାଯ୍ୟ ଦାବି ମିଳିବା ଲକ୍ଷ୍ୟରେ ସେ ୨୦୧୯ ଜୁଲାଇ ୧୦ ତାରିଖରୁ ଓଡ଼ିଶାର ୩୧୪ ବ୍ଲକ ପରିକ୍ରମା ଉଦ୍ଦେଶ୍ୟରେ ପଦଯାତ୍ରା ଆରମ୍ଭ କରିଛନ୍ତି। ପ୍ରଥମେ ବଡ଼ଚଣା ବ୍ଲକରୁ ପଦଯାତ୍ରା ଆରମ୍ଭ କରି ୧୦୩ ଦିନ ମଧ୍ୟରେ ସେ ୭୭ଟି ବ୍ଲକରେ ପହଞ୍ଚି ପ୍ରତି ବିଡିଓଙ୍କ ମାଧ୍ୟମରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି। ଏହି ମର୍ମରେ ସେ ଯୋଡ଼ା ବିଡିଓ ଦାୟିତ୍ୱରେ ଥିବା ବଡ଼ବିଲ ତହସିଲଦାରଙ୍କୁ ମଧ୍ୟ ଏକ ଦାବିପତ୍ର ପ୍ରଦାନ କରିବେ ବୋଲି ରବିବାର ସୂଚନା ଦେଇଛନ୍ତି। ଅଦ୍ୟାବଧି ସେ ପ୍ରାୟ ୨ ହଜାର କିମି ପଦଯାତ୍ରା କରିସାରିଥିବା କହିଛନ୍ତି। ଦେଶର ପ୍ରତ୍ୟେକ ନାଗରିକ ବର୍ଷକ ୩୬୫ଦିନ ମଧ୍ୟରୁ ଗୋଟିଏ ଦିନ ଦେଶ କିମ୍ବା ରାଜ୍ୟ ପାଇଁ ସମୟ ଦେଲେ ଉତ୍ତମ ସୁସ୍ଥ ସମାଜ ଗଠନ ହେବା ସହିତ ରାଜ୍ୟର ଅଗ୍ରଗତି ହୋଇପାରନ୍ତା ବୋଲି ସେ ‘ଧରିତ୍ରୀ’ ମାଧ୍ୟମରେ ରାଷ୍ଟ୍ରର ନାଗରିକମାନଙ୍କୁ ନିବେଦନ କରିଛନ୍ତି। ଏହା ପରେ ସେ ଯୋଡ଼ା ବ୍ଲକରୁ ସୁନ୍ଦରଗଡ଼ ଜିଲା କୋଇଡା ବ୍ଲକକୁ ପଦଯାତ୍ରାରେ ବାହାରିବେ ବୋଲି ସୂଚନା ଦେଇଛନ୍ତି।
