ଭୁବନେଶ୍ୱର, ୫।୯(ବ୍ୟୁରୋ): ରାଜ୍ୟ ମାନବାଧିକାର କମିଶନ (ଓଏଚ୍ଆର୍ସି) ଅଧ୍ୟକ୍ଷ ଭାବେ ବୁଧବାର ଦାୟିତ୍ୱ ଗ୍ରହଣ କରିଛନ୍ତି ଅବସରପ୍ରାପ୍ତ ବିଚାରପତି ଜଷ୍ଟିସ ବିମଲ ପ୍ରସାଦ ଦାସ। ସେହିଭଳି କମିଶନ ସଦସ୍ୟ ବିଶିଷ୍ଟ ଆଇନଜୀବୀ ଅସୀମ ଅମିତାଭ ଦାସ ମଧ୍ୟ କାର୍ଯ୍ୟରେ ଯୋଗଦେଇଛନ୍ତି। ଗତ ୨୨ ତାରିଖରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଉଭୟଙ୍କୁ ନୂଆ ନିଯୁକ୍ତି ଦେଇଥିଲେ। ତେବେ ବିଚରାଧୀନ ମାମଲାଗୁଡିକର ତ୍ୱରିତ ତଦନ୍ତ କରି ନ୍ୟାୟ ପ୍ରଦାନକୁ ପ୍ରଥମ ପ୍ରାଧାନ୍ୟ ଦେବେ ବୋଲି ଦାୟିତ୍ୱ ଗ୍ରହଣ ପରେ ଜଷ୍ଟିସ ବି.ପି. ଦାସ କହିଛନ୍ତି। ଗତ ୬ ବର୍ଷ ୭ ମାସ ଧରି ଓଏଚ୍ଆର୍ସିର କୌଣସି ନିୟମିତ ଅଧ୍ୟକ୍ଷ ନ ଥିଲେ। ତେବେ ଜଷ୍ଟିସ ଦାସଙ୍କ ଯୋଗଦାନ କମିଶନଙ୍କ କାର୍ଯ୍ୟଧାରାକୁ ତ୍ୱରାନ୍ବିତ କରିବ ବୋଲି ଆଶା କରାଯାଉଛି।
ଜଷ୍ଟିସ ଦାସ ୧୯୫୦ ନଭେମ୍ବର ୧୫ରେ କଟକ ଜିଲା ସାଲେପୁର ବ୍ଲକ ଅନ୍ତର୍ଗତ ଧର୍ମଗତପୁର ଗାଁରେ ଜନ୍ମ ଗ୍ରହଣ କରିଥିଲେ। କଟକ ଖ୍ରୀଷ୍ଟ କଲେଜରୁ ବିଦ୍ୟାଳୟ ଶିକ୍ଷା ଓ ରେଭେନ୍ଶା କଲେଜରୁ ସ୍ନାତକ ଶେଷ କରିବା ପରେ ୧୯୭୨ରେ ଉତ୍କଳ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ସ୍ନାତକୋତ୍ତର ପାସ୍ କରିଥିଲେ। ୧୯୭୪ରେ କଟକସ୍ଥିତ ମଧୁସୂଦନ ଲ’ କଲେଜରୁ ଏଲଏଲବି ଡିଗ୍ରୀ ହାସଲ କରିଥିଲେ। ୧୯୭୪ରୁ ୧୯୭୯ ପର୍ଯ୍ୟନ୍ତ ପରବର୍ତ୍ତୀ ସମୟରେ ଓଡିଶା ହାଇକୋର୍ଟର ଆଇନଜୀବୀ ଭାବେ କାର୍ଯ୍ୟ କରିଥିଲେ। ୧୯୯୬ରୁ ୧୯୯୭ ପର୍ଯ୍ୟନ୍ତ ରାଜ୍ୟ ବାର କାଉନ୍ସିଲର ସଦସ୍ୟ ଥିଲେ। ୧୯୯୯ରେ ସେ ହାଇକୋର୍ଟର ମୁଖ୍ୟ ବିଚାରପତି ଭାବେ ନିଯୁକ୍ତି ପାଇଥିଲେ। ପୁରୀ ଶ୍ରୀମନ୍ଦିର ସୁରକ୍ଷା ଓ ଭକ୍ତଙ୍କ ସୁବିଧା ଦର୍ଶନ ପାଇଁ ରାଜ୍ୟ ସରକାର ୨୦୧୬ ଜାନୁୟାରୀରେ ଶ୍ରୀମନ୍ଦିର ସଂସ୍କାର କମିଶନ ଭାବେ ଜଷ୍ଟିସ ବି.ପି. ଦାସଙ୍କୁ ନିଯୁକ୍ତ କରିଥିଲେ।
