ଭୋପାଳ,୧୦।୩: ମଧ୍ୟପ୍ରଦେଶରେ ମୁଖ୍ୟ କମଲନାଥଙ୍କ ସରକାର ଉପରେ ସଙ୍କଟ ଘନେଇ ଆସୁଛି। କଂଗ୍ରେସରେ ଲାଗି ରହିଥିବା କନ୍ଦଳରୁ ଭାଜପା ଫାଇଦା ମାରିବାର ଉଦ୍ୟମ କରୁଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। କଂଗ୍ରେସର ଯୁବନେତା ଜ୍ୟୋତିରାଦିତ୍ୟ ସିନ୍ଧିଆ ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି। ସାକ୍ଷାତ୍ ପରେ ରାଜ୍ୟର ରାଜନୈତିକ ସମୀକରଣରେ କିଛି ପରିବର୍ତ୍ତନ ହେବାର ସମ୍ଭାବନା ଥିବା ନେଇ ଚର୍ଚ୍ଚା ହେଉଛି। ସିନ୍ଧିଆଙ୍କୁ ବାଡ଼ ଡିଆଁଇବା ପାଇଁ ଭାଜପାର ପ୍ରୟାସ ଜାରି ରଖିଛି। ସିନ୍ଧିଆଙ୍କୁ କେନ୍ଦ୍ରୀୟ ମନ୍ତ୍ରୀ ମଣ୍ଡଳରେ ସ୍ଥାନ ଦେବାକୁ ଭାଜପା ପକ୍ଷରୁ ପ୍ରତିଶ୍ରୁତି ଦିଆଯାଇଥିବା ମଧ୍ୟ କୁହାଯାଉଛି। ତେବେ କଂଗ୍ରେସ ହାଇ କମାଣ୍ଡ ଅସନ୍ତୁଷ୍ଟ ସିନ୍ଧିଆଙ୍କୁ ବୁଝାଇବା ଉଦ୍ୟମ ଅବ୍ୟାହତ ରହିଛି। ତାଙ୍କୁ ମଧ୍ୟପ୍ରଦେଶରୁ କଂଗ୍ରେସର ପ୍ରଥମ ପସନ୍ଦ ପ୍ରାର୍ଥୀ ଭାବେ ରାଜ୍ୟ ସଭାକୁ ପଠାଇବା ଲାଗି ହାଇକମାଣ୍ଡ ଚିନ୍ତା କରୁଛନ୍ତି। ସୂଚନାଯୋଗ୍ୟ, ମଧ୍ୟପ୍ରଦେଶ ବିଧାନସଭାରେ ୨୩୦ ବିଧାୟକଙ୍କ ମଧ୍ୟରୁ ୨ ଜଣଙ୍କ ମୃତ୍ୟୁ ପରେ ଏବେ ସଦସ୍ୟ ସଂଖ୍ୟା ୨୨୮ ରହିଛି। ସିନ୍ଧିଆଙ୍କୁ ସମର୍ଥନ କରୁଥିବା ୨୦ କଂଗ୍ରେସ ବିଧାୟକଙ୍କ ଇସ୍ତଫା ମଞ୍ଜୁର ହେଲେ ରାଜ୍ୟ ବିଧାନସଭାରେ ବିଧାୟକଙ୍କ ସଂଖ୍ୟା ୨୦୮ରେ ପହଞ୍ଚିବ। ସେହିପରି କଂଗ୍ରେସ ଦଳ ୧୦୧ ସଦସ୍ୟଙ୍କ ମଧ୍ୟରେ ସୀମିତ ରହିବାର ସମ୍ଭାବନା ଦେଖାଦେଇଛି। ଏଭଳିସ୍ଥଳେ ଭାଜପା ସରକାର ଗଠନ ପାଇଁ ଦାବି ଉପସ୍ଥାପନ କରିବ। ସମ୍ପ୍ରତି ଭାଜପା ପାଖରେ ୧୦୭ ବିଧାୟକ ରହିଛନ୍ତି। ସରକାର ଗଠନ ପାଇଁ ଆବଶ୍ୟକ ୧୦୫ ମ୍ୟାଜିକ୍ ନମ୍ବର ଭାଜପା ସହଜରେ ହାସଲ କରିପାରିବ। ଏଭଳି କାମ କରିଥିବା ଯୋଗୁ ଭାଜପାରେ ଜ୍ୟୋତିରାଦିତ୍ୟଙ୍କୁ ସମ୍ମାନ ମିଳିବା ସହିତ ରାଜ୍ୟ ସଭାରୁ ପ୍ରାର୍ଥୀ କରାଯାଇ ମନ୍ତ୍ରୀପଦ ମଧ୍ୟ ମିଳିବ ବୋଲି କୁହାଯାଉଛି।
