ଇଚ୍ଛାଶକ୍ତି ଥିଲେ ବୟସ ବାଧକ ହୋଇପାରେ ନାହିଁ, ଯାହା ପ୍ରମାଣିତ କରିଛନ୍ତି ମନୀଷା ଗୋସାଇଁ ଓ ତାଙ୍କ ଭଉଣୀ ନମିତା ନେଗି। କେବଳ ସେତିକି ନୁହେଁ ପରିବାର ତଥା ସମାଜ ପାଇଁ ଗୃହିଣୀଙ୍କ ଅବଦାନର ମହତ୍ତ୍ୱକୁ ପ୍ରତିପାଦିତ କରିଛନ୍ତି। ଉଭୟଙ୍କ ବୟସ ୪୦ ଟପିଯାଇଥିଲେ ବି ସେମାନେ କେବଳ ଘର କାମରେ ସୀମିତ ନ ରହି ଚାଷ କରୁଛନ୍ତି। ରହୁଛନ୍ତି ଉତ୍ତରାଖଣ୍ଡର ଡେରାଡୁନ୍ରେ। ମନୀଷାଙ୍କ ସ୍ବାମୀ ଜଣେ ଅବସରପ୍ରାପ୍ତ କର୍ନେଲ ବିକାଶ ଗୋସାଇଁ ଏବଂ ନମିତାଙ୍କ ସ୍ବାମୀ ବିନିତ ସିଂ ନେଗି। ସେମାନେ ଗୁଜବେରି ଚାଷ କରି ବର୍ଷକୁ ୧୧ ଲକ୍ଷ ଟଙ୍କା ରୋଜଗାର କରୁଛନ୍ତି। ସେମାନଙ୍କ ଫାର୍ମର ନାମ ଦେଇଛନ୍ତି ଡୁନ୍ ଗୁଜବେରି ଫାର୍ମ। ସେମାନେ ଗୁଜବେରି ବ୍ୟତୀତ ଟମାଟୋ, ବାଇଗଣ, କଖାରୁ, ପୋଇ ଆଦି ପରିବା ମଧ୍ୟ ଚାଷ କରୁଛନ୍ତି। ଚାଷରେ ଉଭୟଙ୍କ ସ୍ବାମୀ ସେମାନଙ୍କୁ ସାହାଯ୍ୟ କରୁଛନ୍ତି। ଦୁଇ ଭଉଣୀ ଏତିକିରେ ଅଟକି ଯାଇନାହାନ୍ତି, ଅଁଳା, ଆମ୍ବ, ହଳଦୀ, ଲେମ୍ବୁ ଏବଂ ଟମାଟୋରୁ ବିଭିନ୍ନ ଉପତ୍ାଦ ପ୍ରସ୍ତୁତ କରି ତାହାକୁ ମଧ୍ୟ ବିକ୍ରି କରୁଛନ୍ତି। ଏହିସବୁ କାର୍ଯ୍ୟରେ ସେମାନେ ମହିଳାମାନଙ୍କୁ ମଧ୍ୟ ନିଯୁକ୍ତ କରିଛନ୍ତି।
