ବେଙ୍ଗାଲୁରୁ ସହରର ଜନସଂଖ୍ୟା ବୃଦ୍ଧି ଯୋଗୁ ପ୍ରାକୃତିକ ଜଳଉତ୍ସ ପ୍ରଦୂଷିତ ହେବା ସହ ଭୂତଳ ଜଳ ମଧ୍ୟ ନିମ୍ନଗାମୀ ହେଉଛି। ସହରର ଜଳ ସଙ୍କଟ ଉକତ୍ଟ ରୂପ ନେବାରେ ଲାଗିଛିି। ଏଭଳି ସ୍ଥିତିରେ ଏହି ସମସ୍ୟା ଦୂର କରିବାରେ ଉମା ମାହେଶ୍ୱରଙ୍କ ପ୍ରୟାସ ପ୍ରଶଂସନୀୟ। ବର୍ଷାଜଳ ସଂରକ୍ଷଣ କରି ତାହାକୁ ଲୋକମାନେ କିଭଳି ଉପଯୋଗ କରିପାରିବେ ସେଥିପାଇଁ ବାଟ ଦେଖାଇ ଏହି ସିଷ୍ଟମ୍ରେ ବେଙ୍ଗାଲୁରୁରେ ଲକ୍ଷ ଲକ୍ଷ ଲିଟର ପାଣି ବଞ୍ଚାଇବାରେ ସେ ସଫଳ ହୋଇଛନ୍ତି। ଉମା ବେଙ୍ଗାଲୁରୁ ଓ୍ବାଟର ସପ୍ଲାଏ ଏବଂ ସ୍ବେରେଜ ବୋର୍ଡର ପ୍ଲମ୍ବିଂ ଠିକାଦାର ଭାବେ କାର୍ଯ୍ୟ କରନ୍ତି। ବେଙ୍ଗାଲୁରୁରେ ଲୋକମାନେ ଜଳାଭାବର ଶିକାର ହେବା ଦେଖିବା ପରେ ସେ ବ୍ୟକ୍ତିଗତ ପ୍ରଚେଷ୍ଟାରେ ତାହା ଦୂର କରିବାକୁ ଲାଗି ପଡ଼ିିଛନ୍ତି। ଗତ ୧୩ ବର୍ଷ ମଧ୍ୟରେ ସହରରେ ସେ ୧ ହଜାରରୁ ଊର୍ଦ୍ଧ୍ୱ ରେନ୍ ହାର୍ଭେଷ୍ଟିଂ ଓ୍ବାଟର (ଆର୍ଡବ୍ଲ୍ୟୁଏଚ୍) ସିଷ୍ଟମ୍ ଲାଗାଇଛନ୍ତି। ଉମା ଏହି କାର୍ଯ୍ୟ ୨୦୦୭ରୁ ଆରମ୍ଭ କରିଥିଲେ। ୨୦୦୯ ଯାଏ ଏହାକୁ ସେ ପୂରା ମାଗଣାରେ ବସାଉଥିଲେ। ଏବେ କିନ୍ତୁ କିଛି ଦେୟ ନେଉଛନ୍ତି, ହେଲେ କୌଣସି କାରଣରୁ ଏହା ଖରାପ ହୋଇଗଲେ ତାହାକୁ ସେ ମାଗଣାରେ ସଜାଡୁଛନ୍ତି। ଏଭଳି ସିଷ୍ଟମ୍ ଦ୍ୱାରା ଲୋକମାନେ ଉପକୃତ ହେବା ସହ ପରିବେଶକୁ ଉପକାର ବି ହେଉଛି। ଲୋକମାନେ ବର୍ଷକୁ ଯେତିକି ଟ୍ୟାଙ୍କର ପାଣି କିଣୁଥିଲେ ଏବେ ତାହା ଅପେକ୍ଷା କମ୍ କିଣୁଛନ୍ତି ଓ ଲକ୍ଷାଧିକ ଟଙ୍କା ବଞ୍ଚାଇ ପାରୁଛନ୍ତି।
