ପରିବେଶକୁ ଭଲ ପାଇ ସାରା ଜୀବନ ତା’ ସୁରକ୍ଷାରେ ନିଜକୁ ସମର୍ପିତ କରୁଥିବା ବ୍ୟକ୍ତି ଖୁବ୍ କମ୍ ଦେଖିବାକୁ ମିଳନ୍ତି। ଏମାନଙ୍କ ମଧ୍ୟରେ ଉତ୍ତରାଖଣ୍ଡର ସେଜା ଉର୍ହା ଅନ୍ୟତମ। ମସୁରିରେ ସେ ୧୧୦ ଏକର ପଡିଆ ଜମିକୁ ଜଙ୍ଗଲରେ ପରିଣତ କରିଦେଇଛନ୍ତି। ଏହି ଜଙ୍ଗଲର ନାମ ଜବାରଖେଟ ନେଚର ରିଜର୍ଭ। ଏହା ୨୦୧୫ରୁ ଲୋକାମାନଙ୍କ ପାଇଁ ଖୋଲାଯାଇଛି। ସେଜାଙ୍କୁ ବର୍ତ୍ତମାନ ବୟସ ୫୬। ୩୫ ବର୍ଷ ହେବ ସେ ପରିବେଶ ସୁରକ୍ଷା ଦିଗରେ କାର୍ଯ୍ୟ କରି ଆସୁଛନ୍ତି। ସେ ତାଙ୍କ ଭାଉଣୀଙ୍କ ସାଙ୍ଗ ଭିପୁଲ ଜୈନଙ୍କ ସହଯୋଗରେ ସୃଷ୍ଟି କରିଛନ୍ତି ଏହି ଜଙ୍ଗଲ। ଭିପୁଲ ମୁମ୍ବାଇରେ ବ୍ୟବସାୟ କରନ୍ତି। ମସୁରିରେ ଥିବା ଭିପୁଲଙ୍କ ଜମିରେ ଏହି ଜଙ୍ଗଲ ଠିଆ ହୋଇଛି। ଏବେ ଏହି ଜଙ୍ଗଲରେ ୩୫୦ ପ୍ରକାର ଫୁଲ ଗଛ ରହିଛି। ଏହା ମଧ୍ୟ ୧୪୫ ପ୍ରଜାତିର ପକ୍ଷୀଙ୍କ ଆବସସ୍ଥଳୀ ପାଲଟିଛି। ୨୦ ପ୍ରଜାତିର ପ୍ରାଣୀ ବି ରହୁଛନ୍ତି ଏଠାରେ। ଏହି ଜଙ୍ଗଲ ପାଖରେ ଥିବା ଗ୍ରାମବାସୀଙ୍କ ସହଯୋଗରେ ଏହାର ସୁରକ୍ଷା କରାଯାଉଛି।
