ମଣିଷ ଆଧୁନିକ ଜୀବନଶୈଳୀକୁ ଆପଣାଇ ନେଉଥିବା ବେଳେ ହରିୟାଣା ପାନିପଥର ଏକ ଗାଁରେ ଏବେ ସୁଦ୍ଧା ଟେଲିଭିଜନ ଦେଖିବା ଉପରେ କଟକଣା ଲଗାଯାଇଛି। କେବଳ ଏତିକି ନୁହେଁ ଶିକ୍ଷା ଅଭାବରୁ ଗାଁର ସ୍ଥିତି ସମ୍ପର୍କରେ ଜାଣିଲେ ଆଶ୍ଚର୍ଯ୍ୟ ହୋଇଯିବେ। ଗାଁର ନାମ ଜଲାଲପୁର-୨। ଏହି ମୁସଲମାନ ବହୁଳ ଗାଁରେ ୧୫୦ ପରିବାର ରହୁଛନ୍ତି। ଟିଭି ଦେଖିବା ଇସଲାମ୍ ବିରୋଧୀ କହି ଗାଁରେ ଟିଭି ଦେଖିତ୍ବା ବନ୍ଦ କରାଯାଇଛି। ୨୦୧୫ ପାଞ୍ଚାୟତ ନିର୍ବାଚନରେ ଜିତିଲେ ପ୍ରାର୍ଥୀ ମୁଜାହିର୍ ଟିଭି ଲଗାଇବା ଲାଗି ଘୋଷଣା କରିଥିଲେ ଓ ନିର୍ବାଚନ ଜିତିବା ପରେ ପଞ୍ଚାୟତ କାର୍ଯ୍ୟାଳୟରେ ଟିଭି ଲଗାଇଥିଲେ। କିନ୍ତୁ ତାହାକୁ କିଛି ଦିନ ମଧ୍ୟରେ ବନ୍ଦ କରିଦିଆଗଲା। ୨୦୦୯ରେ ପୂର୍ବତନ ସରପଞ୍ଚଙ୍କୁ ବି ସରକାରଙ୍କ ତରଫରୁ ଏକ ଟିଭି ମିଳିଥିଲା, କିନ୍ତୁ ତାହା ଦିନଟିଏ ବି ଚାଲିପାରି ନ ଥିଲା। ଏହି ଗାଁରେ ଥିବା ଅଙ୍ଗନଓ୍ବାଡ଼ି କର୍ମୀ ଆବିଦା କେବଳ ଏକମାତ୍ର ମହିଳା ଯିଏ କି ଦଶମ ଯାଏ ପଢିଛନ୍ତି। ନବମରେ ପଢୁଥିବାବେଳେ ତାଙ୍କର ବହାଘର ହୋଇଥିଲା। ପରେ ୨୦୦୬ରେ ତାଙ୍କୁ ଅଙ୍ଗନଓ୍ବାଡ଼ିରେ ନିଯୁକ୍ତି ମିଳିଥିଲା। ସେ ପ୍ରଥମ ମହିଳା ଯିଏ ତାଙ୍କ ପିଲାଙ୍କୁ ଗାଁ ବାହାରକୁ ପଢାଇବାକୁ ପଠାଉଛନ୍ତି। ପୂରା ଗାଁରେ ୪ଟି ପରିବାରରେ ଟିଭି ରହିଥିଲେ ବି ପ୍ରଭାବଶାଳୀ ବ୍ୟକ୍ତିମାନେ ଚାପ ପକାଇ ସେଥିରୁ ତିନୋଟି ବନ୍ଦ କରିଦେଇଛନ୍ତି। କେବଳ ୨୦୧୪ରୁ ଆବିଦା ଟିଭି ଆଣିଥିଲେ ଓ ଏବେ ଲୁଚି ଲୁଚି ଦେଖୁଛନ୍ତି। ରାଜ୍ୟ ତଥା ଦେଶବିଦେଶର ଖବର ଗାଁ ଲୋକେ ଜାଣିପାରୁନାହାନ୍ତି। ଏହି ଗାଁରେ ଜଣେ ହେଲେ ବ୍ୟକ୍ତି କଲେଜ ଦୁଆର ମୁହଁ ମାଡିନାହାନ୍ତି। ଜଣେ ହେଲେ ବି ସରକାରୀ ଚାକିରି କରିନାହାନ୍ତି। ଗାଁରେ ୫ମ ଯାଏ ସ୍କୁଲ ରହିଛି। ସ୍କୁଲ୍ର ୭୦ରୁ ୮୦ ଜଣ ପିଲାଙ୍କ ମଧ୍ୟରେ ୪ ଜଣ ଝିଅ ପଢୁଛନ୍ତି। ୫ମ ପରେ ବେଶି ପିଲା ପାଠ ଛାଡ଼ିଦେଉଛନ୍ତି।
