ହଲଦଓ୍ବାନି,୨୮।୭: ଉତ୍ତରାଖଣ୍ଡର ସରକାରୀ ହସ୍ପିଟାଲରେ ଗତ ୯ ବର୍ଷ ମଧ୍ୟରେ ପ୍ରାୟ ୧୩ହଜାର ୧୮୭ ରୋଗୀଙ୍କ ମୃତ୍ୟୁ ହୋଇଥିବା ଏକ ରିପୋର୍ଟରୁ ଜଣାପଡିଛି। ଆର୍ଟିଆଇ କର୍ମୀ ହେମନ୍ତ ଗୌନିଆଙ୍କ ପ୍ରଶ୍ନରେ ମେଡିକାଲ ପକ୍ଷରୁ ଏହି ରିପୋର୍ଟ ପ୍ରଦାନ କରାଯାଇଛି। ଏବେ ଲୋକେ ଉତ୍ତରାଖଣ୍ଡର ସରକାରୀ ହସ୍ପିଟାଲକୁ ଯିବାକୁ ଭୟ କରୁଛନ୍ତି ବୋଲି କୁହାଯାଉଛି। ସରକାର ଏହି ହସ୍ପିଟାଲକୁ ୧୩ କୋଟି ଟଙ୍କା ପ୍ରଦାନ କରିଥିବା ବେଳେ ଏହା ଠିକ୍ ଭାବେ ଖର୍ଚ୍ଚ ନ ହେବାରୁ ଏତେ ସଂଖ୍ୟକ ରୋଗୀଙ୍କ ମୃତ୍ୟୁ ହୋଇଥିବା ଗୌନିଆ କହିଛନ୍ତି। ଏଠାରେ ୨୦୧୫ରେ ସର୍ବାଧିକ ୧୭୮୪ ଜଣଙ୍କ ମୃତ୍ୟୁ ହୋଇଥିବା ବେଳେ ୨୦୧୦ରେ ସର୍ବନିମ୍ନ ୮୧୫ ଜଣଙ୍କ ମୃତ୍ୟୁ ହୋଇଥିଲା। ୨୦୧୯ ଏପ୍ରିଲ ସୁଦ୍ଧା ଏଠାରେ ୪୯୦ ଜଣଙ୍କ ମୃତ୍ୟୁ ହୋଇ ସାରିଲାଣି। ଏଏନ୍ଆଇର ରିପୋର୍ଟ ଅନୁଯାୟୀ, ସେଠାରେ ଥିବା ଜଣେ ଡାକ୍ତର କହିଛନ୍ତି ଯେତେବେଳେ ଜଣେ ରୋଗୀ ଅତ୍ୟଧିକ ଅସୁସ୍ଥ ହେଉଛନ୍ତି ସେତେବେଳେ ଅନ୍ୟ ସରକାରୀ ଓ ଘରୋଇ ହସ୍ପିଟାଲ ତାଙ୍କୁ ଏଠାକୁ ପଠାଇ ଦେଉଥିବାରୁ ସେମାନଙ୍କର ମୃତ୍ୟୁ ହେଉଛି।
