ଗୋଆ,୨୪।୧୦(ପି.ଟି.): ଚଳିତ ହିରୋ ଇଣ୍ଡିଆନ ସୁପର ଲିଗରେ ଏକ ଦମଦାର ବିଜୟ ସହିତ ଅଭିଯାନ ଆରମ୍ଭ କରିଛି ଗତ ବର୍ଷର ରନର୍ସଅପ ଏଫସି ଗୋଆ I ସ୍ଥାନୀୟ ଜବାହରଲାଲ ନେହେରୁ ଷ୍ଟାଡିୟମଠାରେ ବୁଧବାର ଖେଳାଯାଇଥିବା ମ୍ୟାଚରେ ଘରୋଇ ଦଳ ଗୋଆ ୩-୦ ଗୋଲରେ ଚେନ୍ନାଇୟିନ ଏଫସିକୁ ପରାସ୍ତ କରିଛି। ଗୋଆ ପ୍ରଥମାର୍ଦ୍ଧରେ ଗୋଟିଏ ଏବଂ ଦ୍ୱିତୀୟାର୍ଦ୍ଧରେ ଦୁଇଟି ଗୋଲ ସ୍କୋର କରିଥିଲା I
ଗୋଆ ଦଳ ମ୍ୟାଚ ଆରମ୍ଭରୁ ଆକ୍ରମଣାତ୍ମକ ରଣନୀତି ଆପଣାଇ ତୃତୀୟ ମିନିଟରେ ଗୋଲ ଦେବାର ସୁଯୋଗ ସୃଷ୍ଟି କରିଥିଲା I କିନ୍ତୁ ମର୍ଟଡା ଫଲ ବାଇସାଇକେଲ ଶଟ୍ ଜରିଆରେ କରିଥିବା ଉଦ୍ୟମ ବ୍ୟର୍ଥ ହୋଇଥିଲା I ୧୫ତମ ମିନିଟରେ ଗୋଆର ଲେନି ରଡରିଗସଙ୍କୁ ବିପଜ୍ଜନକ ଖେଳ ପାଇଁ ରେଫରି ହଳଦିଆ କାର୍ଡ ଦେଖାଇଥିଲେ I ପ୍ରଥମାର୍ଦ୍ଧରେ ଚେନ୍ନାଇୟିନ ଗୋଲରକ୍ଷକ ବିଶାଳ କାଇଥ ଦମ୍ଦାର ପ୍ରଦର୍ଶନ କରି ଦଳକୁ ଏକାଧିକ ବିପଦରୁ ରକ୍ଷା କରିଥିଲେ I ଚେନ୍ନାଇୟିନ ଦଳ ମଧ୍ୟ ଗୋଲ ଦେବାର ଏକାଧିକ ସୁଯୋଗ ପାଇଥିଲେ ମଧ୍ୟ ସଫଳ ହୋଇ ନ ଥିଲା I
୩୦ତମ ମିନିଟରେ ଲେନ ଡଙ୍ଗେଲ ମ୍ୟାଚର ପ୍ରଥମ ଗୋଲ ଦେଇ ହାଫ୍ ଟାଇମ୍ ସୁଦ୍ଧା ଗୋଆକୁ ୧-୦ ରେ ଅଗ୍ରଣୀ କରାଇଥିଲେ I ଆଇଏସଏଲରେ ଏହା ଥିଲା ତାଙ୍କର ଅଷ୍ଟମ ଗୋଲ I ଦ୍ୱିତୀୟାର୍ଦ୍ଧରେ ମଧ୍ୟ ଗୋଆ ଦଳ ତା’ର ଆକ୍ରମଣ ଜାରି ରଖି ପ୍ରତିପକ୍ଷ ଉପରେ ପ୍ରବଳ ଚାପ ପକାଇଥିଲା I ବିଶେଷକରି ଫେରାନ କରୋମିଆନ୍ସ ଓ ଲେନ ଡଙ୍ଗେଲଙ୍କ ଯୋଡି ଚେନ୍ନାଇୟିନ ସମସ୍ୟାରେ ପକାଇଥିଲେ I ମ୍ୟାଚର ୬୨ତମ ମିନିଟରେ କରୋମିଆନ୍ସ ଗୋଆ ପକ୍ଷରୁ ଦ୍ୱିତୀୟ ଗୋଲ ସ୍କୋର କରିଥିଲେ I
ଘରୋଇ ଦଳ ୨-୦ରେ ଅଗ୍ରଣୀ ହେବା ପରେ ମଧ୍ୟ ଆକ୍ରମଣାତ୍ମ ଖେଳ ଜାରି ରଖିଥିଲା। ମ୍ୟାଚ୍ର ୮୧ତମ ମିନିଟରେ କାର୍ଲସ ପେନା ଦଳ ପକ୍ଷରୁ ତୃତୀୟ ଗୋଲ ସ୍କୋର କରିଥିଲେ ଓ ଦଳକୁ ବୃହତ୍ ବିଜୟ ପ୍ରଦାନ କରିଥିଲେ। ଗୋଆ ଗୋଲରକ୍ଷକ ମହମ୍ମଦ ନୱାଜ ମ୍ୟାଚର ଉଦୀୟମାନ ଖେଳାଳି ପୁରସ୍କାର ଲାଭ କରିଥିଲେ। ସେହିପରି ତାଙ୍କ ସାଥି ଖେଳାଳି ସେରିଟନ ଫର୍ନାଣ୍ଡେଜ ହିରୋ ମ୍ୟାନ ଅଫ ଦି ପୁରସ୍କାର ଲାଭ କରିଥିଲେ।
