ଅହମ୍ମଦାବାଦ, ୮।୭-ଇଣ୍ଟରକଣ୍ଟିନେଣ୍ଟାଲ କପ୍ ଫୁଟ୍ବଲ ଟୁର୍ନାମେଣ୍ଟର ଉଦ୍ଘାଟନୀ ମ୍ୟାଚରେ ଶନିବାର ଭାରତ ୨-୪ ଗୋଲ ବ୍ୟବଧାନରେ ତାଜିକ୍ସ୍ତାନଠାରୁ ହାରିଯାଇଛି। ମ୍ୟାଚରେ ସୁନୀଲ ଛେତ୍ରୀ ଦୁଇଟି ଗୋଲ୍ ସ୍କୋର କରି ଭାରତକୁ ପ୍ରଥମାର୍ଦ୍ଧ ସୁଦ୍ଧା ୨-୦ ଗୋଲରେ ଅଗ୍ରଣୀ କରିଥିଲେ। ମାତ୍ର ଦ୍ୱିତୀୟାର୍ଦ୍ଧରେ ତାଜିକ୍ସ୍ତାନ ଚମତ୍କାର ପ୍ରତ୍ୟାବର୍ତ୍ତନ ସହ ୪ଟି ଗୋଲ ଦେଇ ମ୍ୟାଚ ଜିତିନେଇଥିଲା। ଦଳ ପକ୍ଷରୁ କୋମରୋନ୍ ତୁର୍ସୁନୋଭ (୫୬ତମ ମିନିଟ), ଶେରିଡିନ୍ ବୋବୋଏଭ୍ (୫୮ତମ), ମୁହାମାଜନ ରହିମୋଭ୍ (୭୧ତମ), ଶାହରମ ସାମିୟେଭ (୭୪ତମ) ଗୋଲ ସ୍କୋର କରିଥିଲେ। ଖେଳ ଆରମ୍ଭ ହେବାର ଚତୁର୍ଥ ମିନିଟ୍ରେ ଲାଲଲିଆନଜୁଆଲା ଛାଙ୍ଗ୍ଟେଙ୍କୁ ଏକ ପେନାଲ୍ଟି ମିଳିଥିଲା। ଛେତ୍ରୀ ଏହାକୁ ସହଜରେ ଗୋଲରେ ପରିଣତ କରିଦେଇଥିଲେ। ଏହି ଗୋଲ ପରେ ତାଜିକ୍ସ୍ତାନ ଭାରତୀୟ ଡିଫେନ୍ସ ଉପରେ ଚାପ ସୃଷ୍ଟି କରିଥିଲା। ମାତ୍ର ଦଳ ଏଥିରୁ ଫାଇଦା ଉଠାଇପାରି ନ ଥିଲା। ୪୧ତମ ମିନିଟ୍ରେ ଛେତ୍ରୀ ତାଙ୍କର ଦ୍ୱିତୀୟ ଗୋଲ ସ୍କୋର କରିଥିଲେ।
