ସାଉଥାମ୍ପଟନ, ୨୪ା୬ (ପି.ଟି.)-ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜ ପାଇଁ ଏଜାସ୍ ବାଓଲର ଜୈବ ସୁରକ୍ଷିତ ପରିବେଶରେ ପୂରାମାତ୍ରାରେ ଟ୍ରେନିଂ ପୂର୍ବରୁ ଇଂଲଣ୍ଡ କ୍ରିକେଟରମାନଙ୍କ ଦ୍ୱିତୀୟ ପର୍ଯ୍ୟାୟ କୋଭିଡ୍-୧୯ ଟେଷ୍ଟ ହେବ। ୧୦ ଦିନ ପୂର୍ବରୁ ପ୍ରଥମ ରାଉଣ୍ଡରେ ଏହି ସମସ୍ତ ୩୦ କ୍ରିକେଟରଙ୍କ ଫଳାଫଳ ନେଗେଟିଭ ଆସିଥିଲା। ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁସାରେ ଖେଳାଳିମାନଙ୍କ ବ୍ୟତୀତ ୧୫ ସହାୟକ କର୍ମଚାରୀଙ୍କର ମଧ୍ୟ ଏହି ଟେଷ୍ଟ ହେବ। ଖେଳାଳିମାନେ ବର୍ତ୍ତମାନ ଷ୍ଟାଡିୟମ ସହିତ ସଂଯୁକ୍ତ ହିଲ୍ଟନ ହୋଟେଲରେ ଅବସ୍ଥାନ କରୁଛନ୍ତି। ଓ୍ବେଷ୍ଟଇଣ୍ଡିଜ ବିପକ୍ଷ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଜୁଲାଇ ୮ରୁ ଆରମ୍ଭ ହେବ। କିନ୍ତୁ ଏହାପୂର୍ବରୁ ସମ୍ଭାବ୍ୟ ଖେଳାଳି ସଂଖ୍ୟା ୩୦ରୁ ୨୦କୁ ହ୍ରାସ କରାଯିବ। ମ୍ୟାଚ ଖେଳାଯିବାକୁ ଥିବା ଭେନ୍ୟୁରେ ଏହି ୨୦ ଖେଳାଳି ଦୁଇଟି ଦଳରେ ବିଭକ୍ତ ହୋଇ ଓ୍ବାର୍ମଅପ୍ ଗେମ୍ ଖେଳିବେ। ତିନି ଦିନିଆ ଅଭ୍ୟାସ ଗେମ୍ ଜୁଲାଇ ୩ରେ ଶେଷ ହେବ। ଗୁରୁବାରଠାରୁ ପ୍ରଥମ ରୁଦ୍ଧଦ୍ୱାର ଟ୍ରେନିଂ ସେସନ ଆରମ୍ଭ ହେବ। ଖେଳାଳିମାନଙ୍କର ଦୈନିକ ଥର୍ମାଲ ସ୍କ୍ରିନିଂ ବ୍ୟତୀତ ସପ୍ତାହକୁ ଦୁଇଥର ଟେଷ୍ଟ କରାଯିବ। ଏଜାସ୍ ବାଓଲକୁ ଦୁଇଟି ଜୋନ୍ରେ ବିଭକ୍ତ କରାଯାଇଛି। କେବଳ ଖେଳାଳି ଓ ମୁଖ୍ୟ ସହାୟକ କର୍ମଚାରୀଙ୍କୁ ନିର୍ଦ୍ଦିଷ୍ଟ ଅଞ୍ଚଳକୁ ଯିବା ଲାଗି ଅନୁମତି ମିଳିବ। ଦୁଇ ଦଳ ମଧ୍ୟରେ କ୍ୟାରିବିୟାନରେ ଅନୁଷ୍ଠିତ ଗତ ସିରିଜରେ ଆୟୋଜକ ଓ୍ବେଷ୍ଟଇଣ୍ଡିଜ ବିଜୟ ଲାଭ କରିଥିଲା। କୋଭିଡ୍-୧୯ ମହାମାରୀ ଯୋଗୁ ବିଶ୍ୱ କ୍ରୀଡ଼ା ସ୍ଥାଣୁ ପାଲଟିଯିବା ପରେ ପ୍ରଥମ ଥର ଏକ ଅନ୍ତର୍ଜାତୀୟ କ୍ରିକେଟ ସିରିଜ ଅନୁଷ୍ଠିତ ହେବାକୁ ଯାଉଛି।
