ଆସିକା, ୨୮ା୧୧(ଡି.ଏନ୍.ଏ.)-ଆସିକା ସମବାୟ ଚିନିଶିଳ୍ପ ପରିଚାଳନା ପରିଷଦର ସାଧାରଣ ବୈଠକ ବୁଧବାର ମଧ୍ୟାହ୍ନରେ ଚିନିଶିଳ୍ପ ସଭାଗୃହରେ ଅନୁଷ୍ଠିତ ହୋଇଥିଲା। ପରିଚାଳନା ପରିଷଦ ସଭାପତି ବିପିନ ବିହାରୀ ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସାଧାରଣ ବୈଠକରେ ଆସିକା ସମବାୟ କେନ୍ଦ୍ର ବ୍ୟାଙ୍କ ସଭାପତି ବୀରେନ୍ଦ୍ର କେଶରୀ ଆରୁଖ ମୁଖ୍ୟଅତିଥି ରୂପେ ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ପରିଚାଳନା ନିର୍ଦ୍ଦେଶକ ଲକ୍ଷ୍ମୀକାନ୍ତ ବେହେରା, ସମ୍ପାଦକ ଆର୍. ଚନ୍ଦ୍ରଶେଖର ରେଡ୍ଡୀ, ଆଖୁ ପରିଚାଳକ ଭଗବାନ ପଣ୍ଡା, ହିସାବ ଅଧିକାରୀ ସନ୍ତୋଷ କୁମାର ପାତ୍ର, ବୈଷୟିକ ଅଧିକାରୀ ଏମ୍. ଗୁରୁନାଥନ୍, ସମବାୟ ବିଭାଗ ପ୍ରତିନିଧି ବିଜୟ କୁମାର ଦାସ ପ୍ରମୁଖ ମଞ୍ଚାସୀନ ଥିଲେ। ପ୍ରାଥମିକ ସେବା ସମିତିର ପ୍ରାୟ ୪୦ରୁ ଊର୍ଦ୍ଧ୍ୱ ପ୍ରତିନିଧି ବୈଠକରେ ଯୋଗ ଦେଇଥିଲେ। ଏହି ଅବସରରେ ୨୦୧୮-୧୯ ବାର୍ଷିକ ସାଧାରଣ ସଭା ଓ ବାର୍ଷିକ ସାଧାରଣ ପ୍ରଶାସନିକ ବିବରଣୀ ପଠନ ଓ ଅନୁମୋଦନ କରାଯାଇଥିଲା। ୨୦୧୯-୨୦ ବର୍ଷ ପାଇଁ କାରଖାନାର ବ୍ୟବସାୟିକ ଯୋଜନା ସମ୍ପର୍କରେ ଆଲୋଚନା କରାଯାଇଥିଲା। ବିଶେଷ କରି ଚିନିଶିଳ୍ପରୁ ପ୍ରସ୍ତୁତ ଦେଶୀ ମଦ ଯୋଗାଣ ଲାଗି ସରକାର ବର୍ତ୍ତମାନ ରାଜ୍ୟର ୯ଟି ଜିଲା ନିମନ୍ତେ ଅନୁମୋଦନ କରିଛନ୍ତି। ଚିନିଶିଳ୍ପର ସ୍ବାର୍ଥରକ୍ଷା ଦୃଷ୍ଟିରୁ ସମଗ୍ର ରାଜ୍ୟ ପାଇଁ ଏହି ବ୍ୟବସ୍ଥା କରିବାକୁ ପ୍ରସ୍ତାବ ଗୃହୀତ ହୋଇଥିଲା। ସେହିଭଳି ଚିନିଶିଳ୍ପର ଆଧୁନିକୀକରଣ ନିମନ୍ତେ ୪୨କୋଟି ଟଙ୍କାର ବ୍ୟୟ ଅଟକଳ କରାଯାଇ ରାଜ୍ୟ ସରକାରଙ୍କ ଅନୁମୋଦନ ନିମନ୍ତେ ପଠାଯାଇଛି। ଅନୁମୋଦନ ପରେ ଏହି କାରଖାନା ଉନ୍ନତମାନର ଅଧିକ ଚିନି ଉପତ୍ାଦନ କରି ସଂସ୍ଥାକୁ ଲାଭଜନକ ସ୍ଥିତିକୁ ଆଣିବ ବୋଲି ଆଲୋଚନା କରାଯାଇଥିଲା। ଏହି ଅବସରରେ ୨୦୧୯-୨୦ ଆର୍ଥତ୍କ ବର୍ଷ ଲାଗି ୧୭୦ କୋଟି ୧୩ ଲକ୍ଷ ଟଙ୍କାର ଏକ ବ୍ୟୟ ଅଟକଳ କରାଯାଇଥିବାବେଳେ ୩କୋଟି ୪୪ ଲକ୍ଷ ଟଙ୍କା ଲାଭ ହେବା ନେଇ ଆକଳନ କରାଯାଇଛି।
