ଲଣ୍ଡନ,୧୫।୫(ପି.ଟି.): କୋଭିଡ୍-୧୯ ମହାମାରୀର ଆତଙ୍କ ଜାରି ରହିଥିବା ବେଳେ ଆସନ୍ତା ସପ୍ତାହରେ ଇଂଲଣ୍ଡ କ୍ରିକେଟର ମାନେ ଟ୍ରେନିଂ ଆରମ୍ଭ କରିବାକୁ ଯାଉଛନ୍ତି। ଆଗକୁ ଓ୍ବେଷ୍ଟଇଣ୍ଡିଜ ଓ ପାକିସ୍ତାନ ବିପକ୍ଷ ସିରିଜ ଥିବାରୁ ଟ୍ରେନିଂ ଆରମ୍ଭ କରିବାକୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ନିଷ୍ପତ୍ତି ନେଇଛି। ତେବେ କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଟ୍ରେନିଂ ବେଳେ ଖେଳାଳିଙ୍କ ପାଇଁ ବିଭିନ୍ନ ନିୟମ ଜାରି କରାଯାଇଛି। ଦିଆଯାଇଥିବା କେତୋଟି ବଲ୍ରେ ଖେଳାଳିମାନଙ୍କୁ ଅଭ୍ୟାସ କରିବାକୁ ହେବ। ପୁଣି ବଲ୍ ଉପରେ ଖେଳାଳିମାନେ ଲାଳ ଲଗାଇପାରିବେ ନାହିଁ।
କୋଡିଡ୍-୧୯ ମହାମାରୀ କାରଣରୁ ଇସିବି ଜୁଲାଇ ପର୍ଯ୍ୟନ୍ତ ସବୁ ପ୍ରକାର କ୍ରିକେଟ କାର୍ଯ୍ୟକଳାପକୁ ବାତିଲ କରିଥିଲା। ଦେବେ ୩୦ ଜଣ ଖେଳାଳି ଅଗାମୀ କେତୋଟି ସିରିଜ ପାଇଁ ଟ୍ରେନିଂ ଆରମ୍ଭ କରିବ ବୋଲି ଇସିବି ଗୁରୁବାର ଘୋଷଣା କରିଛି। ସରକାରଙ୍କ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀ ଅନୁଯାୟୀ ଏହି ଟ୍ରେନିଂ ଆୟୋଜନ ହେବ। ସୁପର ମାର୍କେଟକୁ ଯିବା ଅପେକ୍ଷା ପ୍ରାକ୍ଟିସ୍କୁ ଯିବା ଶ୍ରେୟସ୍କର ବୋଲି ଇସିବି କ୍ରିକେଟ ନିର୍ଦ୍ଦେଶକ ଆଶଲେ ଜାଇଲ୍ସ କହିଛନ୍ତି। ୧୧ଟି କାଉଣ୍ଟି ଗ୍ରାଉଣ୍ଡରେ ଭିନ୍ନଭିନ୍ନ ସମୟରେ ସାମାଜିକ ଦୂରତ୍ୱ ରକ୍ଷା କରି ନିଜ ନିଜର ବଲ ବ୍ୟବହାର କରିପାରିବେ ବୋଲି କୁହାଯାଇଛି। ଯେତେ ସମ୍ଭବ ରିସ୍କ କମ୍ କରିବାକୁ ଆମେ ପ୍ରୟାସ କରିବୁ। ଗୋଟିଏ ଭେନ୍ୟୁରେ ବ୍ୟକ୍ତିଗତ ଭାବେ ଜଣେ ଖେଳାଳି ଟ୍ରେନିଂ ଜାରି ରଖିପାରିବ। ତେଣେ କୋଚ୍ଙ୍କ ସହିତ ୪ରୁ ୫ ବୋଲର ଅଭ୍ୟାସ କରିପାରିବେ। ଦିଆଯାଇଥିବା କେତୋଟି ବଲ୍କୁ ଖେଳାଳିମାନେ ବ୍ୟକ୍ତିଗତ ଭାବେ ବ୍ୟବହାର କରିପାରିବେ। ବ୍ୟବହାର କରା ନ ଗଲେ ସେଗୁଡିକୁ କିଟ୍ରେ ରଖିବାକୁ କୁହାଯାଇଛି ବୋଲି ସେ କହିଛନ୍ତି।
ବୁଧବାରଠାରୁ ବୋଲରମାନେ ଜଣକ ପରେ ଜଣେ କୋଚ୍ଙ୍କ ସହ ଅଭ୍ୟାସ କରିବେ ଓ ଦୁଇ ସପ୍ତାହ ପରେ ବ୍ୟାଟ୍ସମ୍ୟାନ ନେଟ୍ସରେ ପ୍ରବେଶ କରିବେ। ଖେଳାଳିମାନେ କାରରେ ଆସିବେ ଓ ନିଜ ଦ୍ୱାରା ଚିହ୍ନିତ ପାଣି ବୋତଲ ବ୍ୟବହାର କରିବେ। ହାତକୁ ନିୟମିତ ଅନ୍ତରରେ ସାନିଟାଇଜ୍ କରିବେ ଓ ଯଥାଶୀଘ୍ର ପ୍ରସ୍ତାନ କରିବେ। କୋଚ୍ ଓ ଫିଜିଓଙ୍କ ତତ୍ତ୍ୱାବଧାନରେ ଖେଳାଳିଙ୍କ ତାପମାନର ଯାଞ୍ଚ୍ କରାଯିବ। ୨ ମିଟର ଦୂରତା କୋଚ୍ ଓ ଖେଳାଳିମାନେ ବଜାୟ ରଖିବେ। ତେବେ ଫିଜିଓ ଗୋଟିଏ ପିପିଇ କିଟ୍ ବ୍ୟବହାର କରିବେ। ନେଟ୍ସରେ ବ୍ୟାଟ୍ସମ୍ୟାନ ବଲକୁ ହାତରେ ଧରିବେ ନାହିଁ ଓ ଗୋଡରେ କୋଚ୍ଙ୍କୁ ବଲ୍ ଫେରାଇବେ ଜାଇଲ୍ସ କହିଛନ୍ତି।
