ପୁରୀ ଅଫିସ, ୫ା୧୨: ଚନ୍ଦ୍ରଭାଗାରେ ଚାଲିଛି ଅନ୍ତର୍ଜାତୀୟ ବାଲୁକା କଳା ମହୋତ୍ସବ। ଏଥିରେ ଦେଶ ବିଦେଶର ବାଲୁକା ଶିଳ୍ପୀ ଭାଗ ନେଇଛନ୍ତି। ଏହି ମହୋତ୍ସବ ଦେଖିବାକୁ ପ୍ରତ୍ୟହ ଯାତ୍ରୀ, ପର୍ଯ୍ୟଟକଙ୍କ ଭିଡ଼ ହେଉଛି। ଦେଶ ବିଦେଶର ପର୍ଯ୍ୟଟକ ଆସୁଥିବାରୁ ଚନ୍ଦ୍ରଭାଗା ବେଳାଭୂମିକୁ ଯେପରି ସବୁ ସମୟରେ ସ୍ବଚ୍ଛ ଓ ପରିଷ୍କାର ରଖାଯାଇପାରିବ ସେ ଦିଗରେ ଭିନ୍ନ ପ୍ରୟାସ କରିଛି ୱାଇଲ୍ଡ ଗ୍ରାସ୍ ରେଷ୍ଟୁରାଣ୍ଟ। ବାଲୁକା କଳା ମହୋତ୍ସବ ଉପଲକ୍ଷେ ଏଠାରେ ୱାଇଲ୍ଡ ଗ୍ରାସ୍ ରେଷ୍ଟୁରାଣ୍ଟ ପକ୍ଷରୁ ଖାଦ୍ୟ ଷ୍ଟଲ ଖୋଲାଯାଇଛି। କିନ୍ତୁ ଏହି ଷ୍ଟଲରେ ସମସ୍ତଙ୍କ ପାଇଁ ଏକ ନିଆରା ଅଫର ରହିଛି। ତାହା ହେଉଛି ବେଳାଭୂମିକୁ ସଫା ରଖନ୍ତୁ, ମାଗଣାରେ ଜଳଖିଆ ଖାଆନ୍ତୁ। ଅର୍ଥାତ୍ ବେଳାଭୂମିରେ ପଡ଼ିଥିବା ଅଳିଆ ଆବର୍ଜନା ଆଣି ଯେଉଁମାନେ ଷ୍ଟଲ ପାଖରେ ପହଞ୍ଚୁଛନ୍ତି ସେମାନେ ଏହି ଅଫରର ସୁବିଧା ପାଉଛନ୍ତି।
ବେଳାଭୂମିକୁ ସ୍ବଚ୍ଛ ରଖିବା ଉଦ୍ଦେଶ୍ୟରେ ମୋ ବିଚ୍, ଓଡ଼ିଶା ଇକୋ ଟୁରିଜମ ଫାଉଣ୍ଡେଶନ ଏବଂ ହେରିଟେଜ ଟୁର୍ସ ସହଯୋଗରେ ୱାଇଲ୍ଡ ଗ୍ରାସ୍ ପକ୍ଷରୁ ଏହି ଭିନ୍ନ ପ୍ରୟାସ କରାଯାଇଛି। ରେଷ୍ଟୁରାଣ୍ଟର ମାଲିକ ଯୁଗବ୍ରତ କର କହିଛନ୍ତି, ବର୍ତ୍ତମାନ ମହୋତ୍ସବ ଚାଲିଥିବାରୁ ଏଠାକୁ ଦେଶ ବିଦେଶର ପର୍ଯ୍ୟଟକ ଆସୁଛନ୍ତି। ଚନ୍ଦ୍ରଭାଗା ବେଳାଭୂମି ଯଦି ଅପରିଷ୍କାର ରୁହେ ତେବେ ସେମାନେ ତିକ୍ତ ଅନୁଭୂତି ସାଉଣ୍ଟିବେ। ତେଣୁ ବେଳାଭୂମି କିପରି ସବୁବେଳେ ସଫା ରହିବ ସେହି ଉଦ୍ଦେଶ୍ୟ ନେଇ ଏହି ଅଫର ରଖାଯାଇଛି। ଅର୍ଥାତ୍ ଯଦି କେହି ବେଳାଭୂମିରେ ପଡ଼ିିଥିବା ୨ଟି ଖାଲି ପ୍ଲାଷ୍ଟିକ ବୋତଲ ଆଣି ଷ୍ଟଲରେ ପହଞ୍ଚନ୍ତି ସେମାନଙ୍କୁ ଗୋଟିଏ ମିଠା ଦିଆଯିବ। ସେହିପରି ୫ଟି ବୋତଲ ପାଇଁ ଗୋଟିଏ ରୋଲ୍ ଏବଂ ଏକ କିଲୋ ଆବର୍ଜନା ପାଇଁ ବିରିୟାନି (ଚିକେନ କିମ୍ବା ଭେଜ) ଗୋଟିଏ ପ୍ଲେଟ ରହିଛି। ଅନେକ ଦେଖଣାହାରି ଏହାର ସୁଯୋଗ ନେଲେଣି ବୋଲି କର କହିଛନ୍ତି।
