ନୂଆଦିଲ୍ଲୀ, ୨୦।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆତ୍ମନିର୍ଭର ଭାରତ ଗଠନ ଉପରେ ଗୁରୁତ୍ୱାରୋପ କରିଛନ୍ତି। ଲୋକେ ସ୍ବଦେଶୀ ଉତ୍ପାଦ ବ୍ୟବହାର କଲେ ଦେଶର ଆର୍ଥତ୍କ ସ୍ଥିତିରେ ସୁଧାର ଆସିବାର ଆଶା ରହିଛି। ତେବେ ଆତ୍ମନିର୍ଭର ଭାରତ ବାଟରେ କଣ୍ଟା ସାଜିଛି ଚାଇନା ଉତ୍ପାଦ। ଭାରତୀୟ ବଜାରରେ କୋଟି କୋଟି ଟଙ୍କାର ଚାଇନା ସାମଗ୍ରୀ ରହିଛି। ଚାଇନା ଲାଗି ଭାରତୀୟ ବଜାର ଏକ ବୃହତ୍ ବ୍ୟବସାୟିକ କ୍ଷେତ୍ର ସୃଷ୍ଟି କରିଛି। ଦେଶର ସ୍ମାର୍ଟଫୋନ୍ ବଜାର ଆକାର ୨ ଲକ୍ଷ କୋଟି ଟଙ୍କାରୁ ଅଧିକ ଥିବାବେଳେ ଏଥିରେ ଚାଇନାର ୭୨ ପ୍ରତିଶତ ଶେୟାର ରହିଛି। ସେହିପରି ଟିଭି ବଜାରର ଆକାର ୨୫ ହଜାର କୋଟି ଥିବାବେଳେ ଏଥିରେ ଚାଇନାର ୪୫ ପ୍ରତିଶତ ଶେୟାର ଅଛି। ବାର୍ଷିକ ୧୨ ହଜାର କୋଟି ଟଙ୍କାର ଟେଲିକମ୍ ଯନ୍ତ୍ରାଂଶ କାରବାର ହେଉଥିବାବେଳେ ଏଥିରେ ୨୫ ଅଂଶ ଚାଇନା କମ୍ପାନୀର ରହିଛି। ଅପରପକ୍ଷରେ ଦେଶର ହୋମ୍ ଆପଲାଏନ୍ସ୍ ବଜାରରେ ବାର୍ଷିକ ୫୦ ହଜାର କୋଟି ଟଙ୍କାର କାରବାର ହେଉଛି। ସେଥିରେ ଚାଇନାର ୧୦ରୁ ୧୨ ପ୍ରତିଶତ ଶେୟାର ରହିଛି। ଦେଶର ୩୭,୯୧୬ ସୋଲାର ପାଓ୍ବାର ବଜାରରେ ଚାଇନାର ୯୦ ପ୍ରତିଶତ ଯୋଗଦାନ ରହିଛି। ସେହିପରି ୫୭ ଶହ କୋଟି ଅଟୋ ବଜାରରେ ଚାଇନାର ୨୬ ପ୍ରତିଶତ ଅଂଶ ରହିଛି। ଆପ୍ ୟୁଜରଙ୍କ ସଂଖ୍ୟା ୪୫ କୋଟି ଥିବାବେଳେ ୬୬ ପ୍ରତିଶତ ଚାଇନା ଆପ୍ ବ୍ୟବହାର କରୁଛନ୍ତି। ଦେଶର ଇସ୍ପାତ ବଜାରର ଆକାର ୧୦୮.୫ ନିୟୁତ ଟନ୍ ଥିବାବେଳେ ଏଥିରେ ଚାଇନାର ୧୮ରୁ ୨୦ ପ୍ରତିଶତ ଯୋଗଦାନ ରହିଛି। ସେହିପରି ୨ ଶହ କୋଟି ଫାର୍ମା ବଜାରରେ ଚାଇନାର ୬୦ ପ୍ରତିଶତ ପର୍ଯ୍ୟନ୍ତ ଶେୟାର ରହିଛି। ଏସବୁ ସାମଗ୍ରୀର ବ୍ୟବହାର ବନ୍ଦ କଲେ ଆତ୍ମନିର୍ଭର ଭାରତର ପଥ ସହଜ ହେବ ବୋଲି କୁହାଯାଉଛି।
