ଭୁବନେଶ୍ୱର,୧୯।୧(ବ୍ୟୁରୋ)- ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରର ଉନ୍ନତୀକରଣ ସହ ରନ୍ଓ୍ବେକୁ ଆହୁରି ବଢ଼ାଯିବ। ଏଥିପାଇଁ ବିମାନବନ୍ଦର ପାର୍ଶ୍ୱରେ ଥିବା ଦୁଇଟି ବସ୍ତିକୁ ହଟାଇବା ପାଇଁ ନିର୍ଦ୍ଦେଶ ଆସିବା ପରେ ବିଡିଏ ଯୋଜନା ଆରମ୍ଭ କରିଥିଲା। ପୂର୍ବରୁ ଗୋଟିଏ ବସ୍ତି ଉଚ୍ଛେଦ ହୋଇଥିବାବେଳେ ରବିବାରଠାରୁ ଫାର୍ମ ଗେଟ୍ ବସ୍ତି ଉଚ୍ଛେଦ କରାଯିବ ବୋଲି ବିଡିଏ ପକ୍ଷରୁ ସୂଚନା ମିଳିଛି। ଆସନ୍ତା ୨୨ ତାରିଖରେ ବିମାନବନ୍ଦର କାର୍ଯ୍ୟ ନେଇ ବୈଠକ ବସିବାର ରହିଛି। ତେଣୁ ଏହା ପୂର୍ବରୁ ବସ୍ତି ଉଚ୍ଛେଦ କରିବାକୁ ବିଡିଏ ତତ୍ପରତା ପ୍ରକାଶ କରିଛି। ଏ ସଂକ୍ରାନ୍ତରେ ଏକ ବୈଠକ ବସିବା ସହ ଶନିବାର ସ୍ଥାନୀୟ ଅଞ୍ଚଳରେ ପ୍ରଚାର ମାଧ୍ୟମରେ ଲୋକଙ୍କୁ ଅବଗତ କରାଯାଇଛି। ମାତ୍ର ଏଭଳି ତରବରିଆ ଉଚ୍ଛେଦକୁ ବସ୍ତିବାସିନ୍ଦା ବିରୋଧ କରିବେ ବୋଲି ସୂଚନା ମିଳିଛି। ଆଗକୁ ସେମାନଙ୍କ ପିଲାଙ୍କର ମାଟ୍ରିକ ସହ ବିଭିନ୍ନ ପରୀକ୍ଷା ରହିଛି। ବସ୍ତି ଭଙ୍ଗାହେଲେ ଶୀତ କାକରରେ ସେମାନେ କେଉଁଠି ରହିବେ, ପିଲାମାନେ କିପରି ପାଠପଢ଼ିବେ। ପିଲାଙ୍କ ଭବିଷ୍ୟତ କଥା ଭାବି ବସ୍ତିବାସିନ୍ଦାମାନେ ଚିନ୍ତାରେ ରହିଛନ୍ତି। ପରୀକ୍ଷା ସରିବା ପରେ ସେମାନେ ଅନ୍ୟତ୍ର ପଳାଇବେ ଓ ସେପର୍ଯ୍ୟନ୍ତ ଉଚ୍ଛେଦ ନ କରିବାକୁ ସେମାନେ ନିବେଦନ କରିଛନ୍ତି। ଯଦି ବସ୍ତି ଉଚ୍ଛେଦ ପାଇଁ ଉଦ୍ୟମ ହୁଏ, ତେବେ ଘୋର୍ ବିରୋଧ କରାଯିବ। ଆବଶ୍ୟକ ପଡ଼ିଲେ ଆଇନ୍କୁ ହାତକୁ ନେବୁ ବୋଲି ବସ୍ତିବାସିନ୍ଦା ଚେତାବନୀ ଦେଇଛନ୍ତି।
