ନୂଆଦିଲ୍ଲୀ,୨୩।୫: କୋଭିଡ୍-୧୯ ମହାମାରୀର ଆତଙ୍କ ଜାରି ରହିଥିବାବେଳେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଗାଇଡ୍ଲାଇନ୍ ତଥା ନିର୍ଦ୍ଦେଶନାମା ପାଳନ କରିବା ସହଜ ନୁହେଁ ବୋଲି ପୂର୍ବତନ ଅଷ୍ଟ୍ରେଲୀୟ ଦ୍ରୁତ ବୋଲର ବ୍ରେଟ୍ ଲି କହିଛନ୍ତି। ବଲରେ ଲାଳ ଲଗାଇବାକୁ ଆଇସିସି ବାରଣ କରିଛି। ତେବେ ଏହାକୁ ବ୍ୟବହାରିକ ଭାବେ ଲାଗୁ କରିବା ସେତେଟା ସହଜ ନୁହଁ ବୋଲି ସେ ସ୍ପଷ୍ଟ କରିଛନ୍ତି।
ଅନିଲ କୁମ୍ବଲେଙ୍କ ଅଧ୍ୟକ୍ଷତାରେ ଆଇସିସି କ୍ରିକେଟ କମିଟି ଏହି ମହାମାରୀ ପାଇଁ ବଲ୍ରେ ଲାଳ ନ ଲଗାଇବାକୁ ପରାମର୍ଶ ଦେଇଛି। ଏହି ନିର୍ଦ୍ଦେଶନାମା ଶୁକ୍ରବାର ଜାରି କରାଯାଇଛି। ବଲକୁ ଚମ୍କାଇବା ପାଇଁ ଲାଳ ବ୍ୟବହାର ନ କରିବାକୁ କୁହାଯାଇଛି। ଜଣେ ବୋଲର ପୂରା ଜୀବନ ୮,୯,୧୦ ବର୍ଷ ବଲରେ ଲାଳ ଲଗାଇ ଆସିଛି। ଅଙ୍ଗୁଳିରେ ଛେପ ଲଗାଇ ବଲକୁ ଚମ୍କାଇବାକୁ ପ୍ରୟାସ କରିଆସିଛି। ଏଭଳି ସ୍ଥିତିରେ ଏହାକୁ ରାତାରାତି ଏପରି ନ କରିବା ବା ଭୁଲିବା ସମ୍ଭବ ନୁହେଁ। ତେଣୁ ଆଇସିସି ଏଥିରେ ନିୟମ କୋହଳ କରିବା ଉଚିତ୍। ଏ ସଂକ୍ରାନ୍ତରେ ଲିଙ୍କୁ ଦକ୍ଷିଣ ଆଫ୍ରିକା ଅଧିନାୟକ ଫାଫ୍ ଡୁପ୍ଲେସି ସମର୍ଥନ ଜଣାଇଛନ୍ତି। ଫିଲ୍ଡରମାନଙ୍କୁ ମଧ୍ୟ ଏହି ନିୟମ ପାଳନ କରିବାକୁ ହେବ। ଭାରତୀୟ ଅଭିଜ୍ଞ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ମଧ୍ୟ ସମାନ କଥା କହିଛନ୍ତି। ବଲରେ ଲାଳ ଲଗାଇବା ଏକ ଅଭ୍ୟାସରେ ପରିଣତ ହୋଇଛି। ତେଣୁ ହଠାତ୍ ଏହି ଅଭ୍ୟାସ ଛାଡିବା ଏକ ବଡ଼ ଚ୍ୟାଲେଞ୍ଜ୍ ବୋଲି ସେ କହିଛନ୍ତି।
