ନୂଆଦିଲ୍ଲୀ/କାଠମାଣ୍ଡୁ, ୧୩।୬: ଆତଙ୍କବାଦ ବିରୋଧରେ ଭାରତ ସ୍ବତନ୍ତ୍ର ଯୋଜନା ଉପରେ କାର୍ଯ୍ୟଧାରା ଜାରି ରଖିଛି। ଏହାକୁ ଦୃଷ୍ଟିରେ ରଖି ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ଏବେ ଜମ୍ମୁ-କଶ୍ମୀର ବାଟେ ଆତଙ୍କବାଦୀଙ୍କୁ ଭାରତରେ ଅନୁପ୍ରବେଶ ନ କରି ନେପାଳ ସୀମାରେ ଲଶ୍କର ମଡ୍ୟୁଲ୍ ଉପରେ ନୂଆ ଯୋଜନା କରୁଥିବା କୁହାଯାଉଛି। ଏନେଇ ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଭାରତ-ନେପାଳ ସୀମାରେ ଆଇଏସ୍ଆଇ ପକ୍ଷରୁ ସ୍ଲିପର ସେଲ୍ ଗଠନ ପାଇଁ କମାଣ୍ଡର ଓମାର ସମସ ଓରଫ୍ ଓମର ମଦନିଙ୍କୁ ଦାୟିତ୍ୱ ଦିଆଯାଇଛି। ନେପାଳର ତରାଇ ଅଞ୍ଚଳରେ ମୁସଲମାନ୍ ଯୁବକଙ୍କ ବ୍ରେନ୍ଓ୍ବାଶ୍ କରାଯାଇ ସେମାନଙ୍କୁ ପାକିସ୍ତାନରେ ଟ୍ରେନିଂ ଦେବାକୁ ପଠାଇବାର ଯୋଜନା କରାଯାଉଛି। ଲଶ୍କର-ଇ-ତୋଏବା ଆତଙ୍କବାଦୀ ସଂଗଠନ ସହିତ ଜଡିତ ଥିବା ମଦନି ଏଠାରେ ନେପାଳ ଏଜୁକେଶନ୍ ଆଣ୍ଡ୍ ଓ୍ବେରଫେୟାର ସୋସାଇଟି ସହାୟତାରେ ଭାରତ ବିରୋଧୀ କାର୍ଯ୍ୟ କଳାପ ଜାରି ରଖିଛି। ଭାରତ ନେପାଳ ମଧ୍ୟରେ ଥିବା ଏକ ହଜାର ୭ଶହ ୫୧ କିଲୋମିଟରର ଦୀର୍ଘ ସୀମାର ଉପଯୋଗ କରିବା ପାଇଁ ଆଇଏସ୍ଆଇ ଯୋଜନା କରିଥିବା ଗୋଇନ୍ଦା ରିପୋର୍ଟରେ ଦର୍ଶାଯାଇଛି।
