କଟକ ଅଫିସ, ୨୬।୧୦: ସମାଜରେ କନ୍ୟା ସନ୍ତାନଙ୍କ ପ୍ରତି ଥିବା ହୀନମନ୍ୟତା ବଢିବାରେ ଲାଗିଛି, ଯାହାର ଏକ ଉଦାହରଣ ଏସ୍ସିବି ମେଡିକାଲରେ ଦେଖିବାକୁ ମିଳିଛି। ଗତ ୩ରେ ଯାଜପୁର ଅଞ୍ଚଳର ଜଣେ ମହିଳା ପ୍ରସବ ନିମନ୍ତେ ଏସ୍ସିବି ମେଡିକାଲର ସ୍ତ୍ରୀ ଓ ପ୍ରସୂତି ବିଭାଗରେ ଭର୍ତ୍ତି ହୋଇଥିଲେ। ମହିଳାଙ୍କର ଏକ କନ୍ୟା ସନ୍ତାନ ଜନ୍ମ ହୋଇଥିଲା। ଶିଶୁଟିର ସ୍ବାସ୍ଥ୍ୟାବସ୍ଥା ଭଲ ନ ଥିବାରୁ ତାଙ୍କୁ ମେଡିକାଲର ଏସ୍ଏନ୍ସିୟୁ (ସିକ୍ ନିଓନାଟାଲ କେୟାର ୟୁନିଟ୍)ରେ ଭର୍ତ୍ତି କରାଯାଇଥିଲା। ସେଠାରେ ଶିଶୁ ଚିକିତ୍ସିତ ହେଉଥିବା ସମୟରେ ଜନ୍ମଦାତ୍ରୀ ମା’ ତାଙ୍କୁ ଛାଡ଼ି ଘରକୁ ପଳାଇଥିଲେ। ଏସ୍ଏନ୍ସିୟୁ କର୍ମଚାରୀମାନେ ବହୁ ଖୋଜାଖୋଜି କରି ତାଙ୍କ ମା’ଙ୍କୁ ନ ପାଇବା ପରେ ଘଟଣା ସମ୍ପର୍କରେ ମେଡିକାଲ ଅଧୀକ୍ଷକଙ୍କୁ ଜଣାଇଥିଲେ। ମେଡିକାଲର ଆଡମିଶନ ରେଜିଷ୍ଟରରୁ ମହିଳାଙ୍କ ଠିକଣା ମିଳିଥିଲା। ଉକ୍ତ ଠିକଣାରେ ମେଡିକାଲ କର୍ମଚାରୀମାନେ ଦୀର୍ଘ ୨୦ ଦିନ ହେବ ଯୋଗାଯୋଗ କରୁଥିଲେ ମଧ୍ୟ ପରିବାର ଲୋକେ ଧରାଛୁଅଁା ଦେଉନାହାନ୍ତି। ଫଳରେ ଘଟଣା ସମ୍ପର୍କରେ ଯାଜପୁର ପୋଲିସକୁ ଅବଗତ କରାଯାଇଛି ବୋଲି ଏସ୍ସିବି ମେଡିକାଲ ମ୍ୟାନେଜର ସୌମ୍ୟା ମହାନ୍ତି କହିଛନ୍ତି। ମା’ଙ୍କ ଅନୁପସ୍ଥିତିରେ ଶିଶୁକନ୍ୟା ଏବେ ଏସ୍ଏନ୍ସିୟୁର ନର୍ସମାନଙ୍କ ହେପାଜତରେ ରହିଛନ୍ତି।
