ଭୁବନେଶ୍ୱର, ୩୧ା୮(ବ୍ୟୁରୋ): ଲକ୍ଷ୍ମୀସାଗର ଥାନା ଅଞ୍ଚଳରେ ଜଣେ ଛାତ୍ରୀଙ୍କୁ ଅସଦାଚରଣ ଘଟଣାରେ ଅଭିଯୁକ୍ତଙ୍କୁ ଚିହ୍ନଟ କରିବା ପରେ ଶୁକ୍ରବାର ରାତିରେ ତାଙ୍କୁ ଗିରଫ କରିଛି ପୋଲିସ। ତାଙ୍କୁ ଏବେ ଏକ ଅଜ୍ଞାତ ସ୍ଥାନରେ ରଖାଯାଇ ପଚରାଉଚରା କରାଯାଉଛି। ଶନିବାର ତାଙ୍କୁ ଘଟଣାସ୍ଥଳକୁ ନିଆଯାଇ ଟିଆ ପରେଡ କରାଯିବ ବୋଲି ପୋଲିସ କମିଶନର ସୁଧାଂଶୁ ଷଡଙ୍ଗୀ କହିଛନ୍ତି।
ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ଜଣଙ୍କ ଲକ୍ଷ୍ମୀସାଗର ଅଞ୍ଚଳର ଜଣେ ଜଣାଶୁଣା ବ୍ୟକ୍ତି ହୋଇଥିବାବେଳେ ତାଙ୍କର ରାଜନୈତିକ ଲିଙ୍କ୍ ରହିଛି। ଏପରି କି ଏକାଧିକ ରାଜନେତାଙ୍କ ସହ ଅଭିଯୁକ୍ତଙ୍କ ଫଟୋ ସୋସିଆଲ ମିଡିଆରେ ଘୂରିବୁଲୁଛି। ଏଥିସହ ସମ୍ପୃକ୍ତ ବ୍ୟକ୍ତି ଦୁଇଟି ବ୍ୟବସାୟୀ ସଂଘର ସମ୍ପାଦକ ରହିଥିବା ଜଣାପଡ଼ିଛି। ଏ ନେଇ ପୋଲିସ ଅଧିକ ତଥ୍ୟ ଦେଉ ନ ଥିବା ବେଳେ ଅଭିଯୁକ୍ତ ଫେରାର ଥିବା କୁହାଯାଉଛି। ପୋଲିସ ସିସିଟିଭି ଫୁଟେଜକୁ ସ୍ଥାନୀୟ ଅଞ୍ଚଳର କେତେକ ଯୁବକଙ୍କୁ ଦେଖାଇବା ପରେ ତାଙ୍କୁ ଚିହ୍ନଟ କରାଯାଇଛି। ଗୁରୁବାର ରାତିରେ ଲକ୍ଷ୍ମୀସାଗର ଥାନା ପୋଲିସ ଅଭିଯୁକ୍ତଙ୍କ ଘରକୁ ଯାଇଥିଲା। ଘରେ ସେ ନ ଥିବାରୁ ତାଙ୍କ ପରିବାର ଲୋକଙ୍କୁ ଥାନାକୁ ଆଣି ପଚରାଉଚରା କରିଥିଲା। ପରେ ଅଭିଯୁକ୍ତଙ୍କ ବାପାଙ୍କୁ ପୋଲିସ ଆଣି ଥାନାରେ ଅଟକ ରଖିଥିଲା। ତେବେ ସ୍ଥାନୀୟ ଜଣେ ବ୍ୟକ୍ତିଙ୍କ ମୁଚାଲିକାରେ ତାଙ୍କୁ ଛାଡ଼ି ଦିଆଯାଇଛି।
ସୂଚନାଯୋଗ୍ୟ, ରାଜଧାନୀର ଏକ ଘରୋଇ ଇଂଲିଶ ମିଡିୟମ ସ୍କୁଲରେ ଛାତ୍ରୀ ଜଣଙ୍କ ଅଷ୍ଟମ ଶ୍ରେଣୀରେ ପାଠ ପଢନ୍ତି। ଗତ ୨୧ ତାରିଖ ସକାଳ ପ୍ରାୟ ୫.୪୫ରେ ସେ ସାଇକେଲରେ ଟ୍ୟୁଶନ୍ ଯାଉଥିଲେ। ଏହି ସମୟରେ ଅଭିଯୁକ୍ତ ଜଣଙ୍କ ଏକ ଆକ୍ଟିଭା ସ୍କୁଟିରେ ତାଙ୍କୁ ପିଛା କରିଥିଲେ। ବାଟରେ ତାଙ୍କ ଅଟକାଇ ତାଙ୍କ ନାମ, କେଉଁ ସ୍କୁଲରେ ପାଠ ପଢିବା ସହ ଘର ଠିକଣା ପଚାରିଥିଲେ। ନିଛାଟିଆ ରାସ୍ତାର ସୁଯୋଗରେ ଅଭିଯୁକ୍ତ ଜଣଙ୍କ ଛାତ୍ରୀଙ୍କୁ ଅଟକାଇ ଅସଦାଚରଣ କରିଥିଲେ। ଛାତ୍ରୀ ଜଣଙ୍କ ଲୋକ ଲଜ୍ଜାରେ ପରିବାର ଲୋକଙ୍କୁ ଏହା ଜଣାଇ ନ ଥିଲେ। ମାତ୍ର ସିସିଟିଭି ଫୁଟେଜରେ ଏସବୁ ଦୃଶ୍ୟ କଏଦ ହେବା ପରେ ପରିବାର ଲୋକେ ଅବଗତ ହୋଇ ଏ ନେଇ ଲକ୍ଷ୍ମୀସାଗର ଥାନାରେ ଅଭିଯୋଗ କରିଥିଲେ। ପୋଲିସ ଦଫା ୩୪୧, ୩୨୩,୩୫୪ ଓ ପୋକ୍ସୋ ଆକ୍ଟ (୨୦୧୨) ଲଗାଇ ଏକ କେସ୍ (ନଂ-୨୩୦/୧୯) ରୁଜୁ କରି ତଦନ୍ତ ଜାରି ରଖିଛି।
