ଦୈନନ୍ଦିନ ୪୫ ମିନିଟ୍ ପର୍ଯ୍ୟନ୍ତ ବ୍ୟାୟାମ୍ କରିବା ଦ୍ୱାରା ଅବସାଦ ଦୂରେଇଥାଏ। ଏଥିପାଇଁ ସପ୍ତାହକୁ ତିନି ଦିନ ଏରୋବିକ୍ସ ବ୍ୟାୟାମ୍ କରିବା ଉଚିତ୍। ଅବସାଦ ଏଭଳି ଏକ ମାନସିକ ସମସ୍ୟା। ଯେଉଁଥିରୁ ବାହାରିବା ଆଦୌ ସହଜ କାମ ନୁହେଁ। ଏହା ବ୍ୟକ୍ତିର ମାନସିକ ଏବଂ ଶାରୀରିକ ସ୍ବାସ୍ଥ୍ୟକୁ ପ୍ରଭାବିତ କରିଥାଏ। ଅବସାଦରେ ଗ୍ରସିତ ବ୍ୟକ୍ତି ସବୁବେଳେ ଏକୁଟିଆ ଏବଂ ଉଦାସ ରହିଥାଏ। ଏହାସହ ମନରେ ଅଜବ ଚିନ୍ତାଧାରା ଉତ୍ପନ୍ନ ହୋଇଥାଏ। ପୀଡ଼ିତର ମନକୁ ବୁଝିପାରିବା ଜଣେ ସାଧାରଣ ମଣିଷ ପକ୍ଷେ ସହଜ ହୋଇ ନ ଥାଏ। ଏହାର ଚିକିତ୍ସା ପାଇଁ ଅନେକ ଲୋକ ଥେରାପିଷ୍ଟଙ୍କ ସାହାଯ୍ୟ ନେଇଥାନ୍ତି। ଏମିତିକି ହଜାର ହଜାର ଟଙ୍କା ଖର୍ଚ୍ଚ କରି ଔଷଧ ସେବନ କରିଥାନ୍ତି। କିନ୍ତୁ ଏସବୁଥିରେ ଅବସାଦମୁକ୍ତ ହେବାକୁ ଢେର୍ ସମୟ ଲାଗିଥାଏ। ହୁଏତ ଭଲ ହେବା ପୂର୍ବରୁ ଅବସାଦଗ୍ରସ୍ତ ବ୍ୟକ୍ତି କିଛି ଭୁଲ୍ ପଦକ୍ଷେପ ଉଠାଇପାରେ। ଏଣୁ ଏଭଳି ସମସ୍ୟାରୁ ତୁରନ୍ତ ରକ୍ଷାପାଇବାରେ ଏରୋବିକ୍ସ ବ୍ୟାୟାମ୍ ବେଶ୍ ସହାୟତା କରିଥାଏ। ଦୌଡ଼, ପହଁରା, ଚାଲିବା ଏବଂ ଜୁମ୍ବା ଭଳି ବ୍ୟାୟାମ୍ ଅବସାଦଗ୍ରସ୍ତଙ୍କ ମନକୁ ଭୁଲାଇବା ସହ ଶରୀରକୁ ସୁସ୍ଥ ରଖିଥାଏ।
