ବନ୍ତଳା,୨ା୬- ସାତ ଭଉଣୀଭାଇଙ୍କ ମଧ୍ୟରୁ ସେ ହେଉଛନ୍ତି ପାଞ୍ଚ ନମ୍ବର। ଘର ବି ନିପଟ ମଫସଲି ଜଙ୍ଗଲ ଅଧ୍ୟୁଷିତ ଏକ ଗଁ। ରେ। ହେଲେ ଦୃଢ଼ ଇଚ୍ଛାଶକ୍ତି ଓ କଠୋର ପରିଶ୍ରମ ବଳରେ ସେ ଅନୁଗୋଳ ସହରରେ ପାଇପାରିଛନ୍ତି ପ୍ରତିଷ୍ଠା। ନିଜ ପରିଚୟ ଗଢ଼ିଛନ୍ତି ନିଜେ। ସହରରେ କରିଥିବା ଏକ ଟେଲର ଦୋକାନରୁ ଭଲ ଆୟ କରୁଥିବା ବେଳେ ଗଁାରେ ଦୁଇଟି କୁକୁଡ଼ା ଫାର୍ମ ତାଙ୍କୁ ଦେଇଛି ସଫଳ କୁକୁଡ଼ା ଚାଷୀର ପରିଚୟ। ଏଥିପାଇଁ ତାଙ୍କୁ ଜିଲାସ୍ତରୀୟ ପୁରସ୍କାର ମଧ୍ୟ ମିଳିସାରିଛି।
ଆତ୍ମନିର୍ଭରଶୀଳ ହେବାକୁ ଚାହଁୁଥିବା ମହିଳାମାନଙ୍କ ପାଇଁ ଉଦାହରଣ ସାଜିଥିବା ଏହି ମହିଳା ହେଲେ ଅନୁଗୋଳ ଜିଲା ବନ୍ତଳା ବଡକନ୍ତକୁଳ ପଞ୍ଚାୟତ ନୂଆଖେତାର ସୁଜାତା ପ୍ରଧାନ(୪୧)। ହେମନ୍ତ କୁମାର ପ୍ରଧାନଙ୍କ ପାଞ୍ଚ ନମ୍ବର ଝିଅ ସୁଜାତା ପାଠପଢ଼ିବା ବେଳୁ ହିଁ ନିଜ ଗୋଡ଼ରେ ଛିଡା ହେବାକୁ ଯୋଜନା କରିଥିଲେ। ୧୯୯୭ରେ ସେ ବନ୍ତଳା ମହାବିଦ୍ୟାଳୟରୁ ସ୍ନାତକ ଡିଗ୍ରୀ ଅର୍ଜନ କରିଥିଲେ। ସେହି ସମୟରେ ଅନୁଗୋଳ ବ୍ଲକ ତରଫରୁ ଖିଣ୍ଡାଠାରେ ଟେଲରିଂ ତାଲିମ ଦିଆଯାଉଥିଲା। ସୁଜାତା ମଧ୍ୟ ସେଥିରେ ଯୋଗଦେଇ ତାଲିମ ନେଇଥିଲେ। ୨୦୦୪ରେ ପ୍ରଶାସନ ପକ୍ଷରୁ ଏକ ଏନ୍ଜିଓରେ ତାଙ୍କୁ ଟେଲରିଂ ଟ୍ରେନିଂ ମାଷ୍ଟର ଭାବେ ନିଯୁକ୍ତି ଦିଆଯାଇଥିଲା। କିଛି ବର୍ଷ କାମ କରିବା ପରେ ସେ ଗଁାରେ କୁକୁଡ଼ା ଫାର୍ମ କରିବାକୁ ଇଚ୍ଛା କଲେ। ୨୦୦୯ରେ ଖିଣ୍ଡା ଗ୍ରାମ୍ୟ ବ୍ୟାଙ୍କରୁ ସବ୍ସିଡରେ ୯୮ ହଜାର ଟଙ୍କା ଋଣ ନେଇ ଗାଁରେ କୁକୁଡ଼ା ଫାର୍ମଟିଏ କଲେ। ସେଥିରୁ ଲାଭ ମିଳିବା ପରେ ଉକ୍ତ ଋଣ ପରିଶୋଧ କରି ୨୦୧୨ରେ ତୁରଙ୍ଗ ୟୁନିୟନ ବ୍ୟାଙ୍କରୁ ଏକ ଲକ୍ଷ ଟଙ୍କା ଋଣ ଆଣି ଆଉ ଏକ କୁକୁଡ଼ା ଫାର୍ମ କଲେ। ସୁଜାତାଙ୍କ ଏହି ସଫଳତା ପାଇଁ କୃଷି ବିଭାଗ ପକ୍ଷରୁ ତାଙ୍କୁ ଜିଲାସ୍ତରୀୟ ଶ୍ରେଷ୍ଠ ଚାଷୀ ଭାବେ ପୁରସ୍କୃତ କରାଯାଇଥିଲା। ହେଲେ ଏତିକିରେ ସେ ଅଟକି ଯାଇ ନ ଥିଲେ। ୨୦୧୩ରେ ଏନ୍ଜିଓ ଛାଡି ନିଜେ ଅନୁଗୋଳ ସହରରେ ଏକ ଟେଲରିଂ ଦୋକାନ ଖୋଲିଲେ। ନିଜେ ମାଷ୍ଟର ହୋଇଥିବା ବେଳେ ଆଉ କେତେଜଣ ଝିଅଙ୍କୁ ରଖି କାମ ଶିଖାଇଲେ। ଭଲ କାମ ଜାଣିଥିବାରୁ ଖୁବ୍ କମ୍ ସମୟ ମଧ୍ୟରେ ଗ୍ରାହକଙ୍କ ନିକଟରେ ସେ ସ୍ବତନ୍ତ୍ର ଭାବେ ପରିଚିତ ହୋଇପାରିଲେ। ଏବେ ତାଙ୍କ ଦୋକାନକୁ ଅଧିକ ଗ୍ରାହକ ଆସୁଛନ୍ତି। ସବୁ ଖର୍ଚ୍ଚ ଯାଇ ମାସିକ ୨୦ ହଜାରରୁ ଅଧିକ ଆୟ ସେ କେବଳ ଟେଲରିଂ ଦୋକାନରୁ କରିପାରୁଛନ୍ତି। ନିଜ ପାଇଁ କିଛି ଟଙ୍କା ସଞ୍ଚୟ କରିବା ସହିତ ସହରରେ ଏକ ଜାଗା କିଣି ସେଥିରେ ଯୁବତୀମାନଙ୍କୁ ସିଲେଇ ତାଲିମ ଦେବାକୁ ନିଷ୍ପତ୍ତି ନେଇଛନ୍ତି। କାହା ଉପରେ ବୋଝ ହୋଇ ରହିବା ଅପେକ୍ଷା ନିଜ ଗୋଡ଼ରେ ଠିଆ ହୋଇ ଖୁସିରେ ଅଛନ୍ତି ବୋଲି ସୁଜାତା ପ୍ରକାଶ କରିଛନ୍ତି।
