ଯାଜପୁର ଅଫିସ,୧୬ା୧୨- ଶହେ ଦିନର କାମ ନିଶ୍ଚିତ କରିବା ପାଇଁ କେନ୍ଦ୍ର ସରକାରଙ୍କ ପ୍ରଣୀତ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା(ଏମ୍ଜିଏନ୍ଆରଇଜିଏସ୍) ଯାଜପୁର ଜିଲାରେ ଅନିଶ୍ଚିତ ହୋଇପଡ଼ିଛି। ଗତ ନଭେମ୍ବର ୮ରେ ଯେଉଁଠି ମାତ୍ର ୧୮୪ଜଣ ୧୦୦ଦିନର କାମ ପାଇଥିଲେ ସେଠାରେ ଏବେ ୩୮୬ ଜଣ ୧୦୦ଦିନର କାମ ପୂର୍ଣ୍ଣ କରିଛନ୍ତି। ଅର୍ଥାତ ମାତ୍ର ୩୭ଦିନ ମଧ୍ୟରେ ଜିଲାରେ ୧୦୦ଦିନର କାମ ସମ୍ପୂର୍ଣ୍ଣ କରିବାରେ ୨୦୨ ପରିବାରଙ୍କ ବୃଦ୍ଧି ଘଟିଛି। ଗ୍ରାମ୍ୟ ଉନ୍ନୟନ ବିଭାଗରୁ ଏଭଳି ତଥ୍ୟ ମିଳିଛି। ଏନେଇ ଏକ ଉଚ୍ଚସ୍ତରୀୟ ନିରପେକ୍ଷ ତଦନ୍ତ କରାଗଲେ ବାସ୍ତବ ତଥ୍ୟ ଜଣାପଡ଼ନ୍ତା ବୋଲି ମତ ପ୍ରକାଶ ପାଇଛି।
ଚଳିତ ଆର୍ଥିକବର୍ଷ ୨୦୧୯-୨୦ ବର୍ଷର ୯ ମାସ ଚାଲିଥିଲେ ମଧ୍ୟ ଡିସେମ୍ବର ୧୫ ତାରିଖ ସୁଦ୍ଧା ଜିଲାର ପଞ୍ଜୀକୃତ ଶ୍ରମିକଙ୍କ ସଂଖ୍ୟା ୬,୪୬,୩୯୫। ତେବେ ଚଳିତ ବର୍ଷ ୧୧୯୪ ପରିବାରଙ୍କ ଜବ୍କାର୍ଡ କାଟି ଦିଆଯାଇଥିବାବେଳେ ସମୁଦାୟ ୨,୯୪,୧୪୨ ପରିବାରଙ୍କୁ ଜବକାର୍ଡ ବଣ୍ଟନ ହୋଇଛି। ସେଥିରୁ ୪୫,୭୮୭ ପରିବାର କାମ ପାଇଁ ଆବେଦନ କରିଥିବାବେଳେ ୪୦,୨୯୬ ପରିବାରଙ୍କୁ କାମ ଯୋଗାଇ ଦିଆଯାଇଥିବା ରିପୋର୍ଟରେ ଉଲ୍ଲେଖ କରାଯାଇଛି। ତେବେ ଏମ୍ଜିଏନ୍ଆରଇଜିଏସ୍ର ନିର୍ଦ୍ଧାରିତ ୧୦୦ ଦିନର କାମ ୩୮୬ ପରିବାର ସମ୍ପୂର୍ଣ୍ଣ କରିଛନ୍ତି। ଡିସେମ୍ବର ୧୫ ତାରିଖ ରିପୋର୍ଟ ଅନୁସାରେ ସୁକିନ୍ଦା ବ୍ଲକରେ ସର୍ବନିମ୍ନ ୬ ପରିବାର ରହିଥିବାବେଳେ ଦାନଗଦୀ ବ୍ଲକରେ ୧୦, ବଡ଼ଚଣା ଓ ଧର୍ମଶାଳାରେ ୧୨ ପରିବାର ଲେଖାଏ, ରସୁଲପୁର ବ୍ଲକରେ ୧୪ ଓ ବରୀ ବ୍ଲକରେ ୧୮ ପରିବାର ୧୦୦ଦିନର କାମ ସମ୍ପୂର୍ଣ୍ଣ କରିଛନ୍ତି। ଦଶରଥପୁର ବ୍ଲକରେ ସର୍ବାଧିକ ୧୨୭ ଓ ବିଞ୍ଝାରପୁର ବ୍ଲକରେ ୧୧୯ ପରିବାର ୧୦୦ଦିନର କାମ ସମ୍ପୂର୍ଣ୍ଣ କରି ପାରିଛନ୍ତି। ତେବେ ଗତ ନଭେମ୍ବର ୮ ତରିଖ ରିପୋର୍ଟ ଅନୁସାରେ କେବଳ ୧୮୪ ପରିବାର ୧୦୦ଦିନର କାମ ସମ୍ପୂର୍ଣ୍ଣ କରିଥିଲେ। ଏଥିରେ ଧର୍ମଶାଳା ବ୍ଲକ ଖାତା ଖୋଲି ପାରି ନ ଥିଲାବେଳେ ସୁକିନ୍ଦା ବ୍ଲକରେ ୧ପରିବାର ରହିଥିଲେ। ଏହି ଅନୁସାରେ ୩୭ ଦିନରେ କିଭଳି ଭାବରେ ୧୦୦ଦିନ କାମ ସମ୍ପୂର୍ଣ୍ଣ କରିବାରେ ୨୦୨ପରିବାର ସାମିଲ ହୋଇଛନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ମିଥ୍ୟା ମଷ୍ଟରରୋଲ ବ୍ୟବହାର କରି ମେଶିନ ଜରିଆରେ ଶ୍ରମିକଙ୍କ ନାମରେ ଯୋଜନା ଅନ୍ତର୍ଗତ ଅର୍ଥ ହଡ଼ପ କରି ଏଭଳି ଜାଲ ରିପୋର୍ଟ ପ୍ରସ୍ତୁତ ହୋଇଥିବା ସନ୍ଦେହ କରାଯାଇଛି। ଏସଂକ୍ରାନ୍ତରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକଙ୍କୁ ଫୋନ ଯୋଗେ ରବିବାର ସନ୍ଧ୍ୟାରେ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ମତାମତ ମିଳି ପାରିନାହିଁ।
