ନୂଆଦିଲ୍ଲୀ, ୧୩-୯: ନିଜ ସମ୍ପତ୍ତିର ଏକ ବୃହତ୍ ଅଂଶକୁ ପରୋପକାର କାର୍ଯ୍ୟ ଲାଗି ଖର୍ଚ୍ଚ କରିବାକୁ ବିଶିଷ୍ଟ ଶିଳ୍ପପତି ଅଜିମ ପ୍ରେମଜୀ ଚଳିତ ବର୍ଷ ଘୋଷଣା କରିଥିଲେ। ଏହି ଧାରାରେ ସେ ଓ୍ବିପ୍ରୋର ୭,୩୦୦ କୋଟି ଟଙ୍କାର ଅଂଶଧନକୁ ବିକ୍ରି କରିଥିବା ଜଣାପଡ଼ିଛି। ବାଏବ୍ୟାକ୍ କାର୍ଯ୍ୟକ୍ରମ ଅନ୍ତର୍ଗତ ପ୍ରେମଜୀ ପ୍ରମୋଟରଙ୍କୁ ଏହି ଶେୟାର ବିକ୍ରି କରିଛନ୍ତି। ୨୧ ଜୁନରେ ଶେୟାର ପିଛା ୩୨୫ ଟଙ୍କା ମୂଲ୍ୟରେ ୩୨ କୋଟି ପୂର୍ଣ୍ଣ ପେଡ୍ ଅପ୍ ଇକ୍ୱିଟି ଶେୟାର ଲାଗି ପୋଷ୍ଟବାଏ ବ୍ୟାକ୍ ଅଫର ଘୋଷଣା କରାଯାଇଥିଲା ବୋଲି ଷ୍ଟକ ଏକ୍ସଚେଞ୍ଜକୁ କମ୍ପାନୀ ପକ୍ଷରୁ ସୂଚନା ଦିଆଯାଇଛି। ଏହି ଅଫର ଗତ ମାସରେ ଶେଷ ହୋଇଥିବା ବେଳେ ଶେୟାର ବ୍ୟାଏବ୍ୟାକ ନେଇ ଓ୍ବିପ୍ରୋ ବୋର୍ଡ ପକ୍ଷରୁ ଚଳିତ ବର୍ଷ ଏପ୍ରିଲରେ ଘୋଷଣା କରାଯାଇଥିଲା। ଶେୟାର ବାଏବ୍ୟାକରୁ ମିଳୁଥିବା ଅର୍ଥ ମଧ୍ୟରୁ ସିଂହଭାଗ ଅଂଶ ଅଜିମ ପ୍ରେମଜୀ ଫାଉଣ୍ଡେଶନ ଦ୍ୱାରା ଜନ କଲ୍ୟାଣକାରୀ କାର୍ଯ୍ୟରେ ଖର୍ଚ୍ଚ କରାଯିବ। ଏହି ଫାଉଣ୍ଡେଶନ ଦୁନିଆର ପଞ୍ଚମ ବୃହତ ଏବଂ ଏସିଆର ସବୁଠାରୁ ବୃହତ ଦାତବ୍ୟ ଅନୁଷ୍ଠାନ।
ଅଜିମ ପ୍ରେମଜୀ ଚଳିତବର୍ଷ ଜୁଲାଇରେ ଓ୍ବିପ୍ରୋର କାର୍ଯ୍ୟନିର୍ବାହୀ ଅଧ୍ୟକ୍ଷ ପଦବୀରୁ ଅବସର ନେଇଛନ୍ତି। ଏହାପରେ କମ୍ପାନୀର ଦାୟିତ୍ୱ ତାଙ୍କ ପୁତ୍ର ରିଷଦ ପ୍ରେମଜୀଙ୍କ ଉପରେ ନ୍ୟସ୍ତ କରାଯାଇଛି। ବ୍ଲୁମବର୍ଗ ବିଲିୟନାରୀ ସୂଚୀ ମୁତାବକ ଅଜୀମ ପ୍ରେମଜୀଙ୍କ ନିକଟରେ ମୋଟ ୧୮ ବିଲିୟନ ଡଲାରର ସମ୍ପତ୍ତି ରହିଛି। ଚଳିତ ବର୍ଷ ମାର୍ଚ୍ଚରେ ଓ୍ବିପ୍ରୋରେ ଥିବା ନିଜର ଅଂଶଧନରୁ ଆସିଥିବା ଲାଭକୁ ଅଜିମ ପ୍ରେମଜୀ ଫାଉଣ୍ଡେଶନକୁ ଦେବା ଲାଗି ଘୋଷଣା କରିଥିଲେ। ବର୍ତ୍ତମାନ ଏହାର ଭାଲ୍ୟୁ ୧.୪୫ ଲକ୍ଷ କୋଟି ଟଙ୍କା ହେବ। ସମାଜ କଲ୍ୟାଣ ଲାଗି ବୃହତ୍ତ ପରିମାଣର ସମ୍ପତ୍ତି ଦାନ କରିଥିବା ବିଶ୍ୱର ପ୍ରମୁଖ ବ୍ୟକ୍ତି ଯଥା-ବିଲ୍ ଗେଟ୍ସ, ଓ୍ବାରେନ ବଫେଟ ଏବଂ ଜର୍ଜ ସୋରସଙ୍କ ଭଳି ବ୍ୟକ୍ତିଙ୍କ ସହ ପ୍ରେମଜୀଙ୍କ ନାମକୁ ସମକକ୍ଷ ମାନାଯାଇଥାଏ। ପ୍ରେମଜୀ ଫାଉଣ୍ଡେଶନ ଏକ ଚାରିଟେବୁଲ ଟ୍ରଷ୍ଟ ହୋଇଥିବା ବେଳେ ସରକାରଙ୍କ ସହ ମିଳିତ ହୋଇ ବିଭିନ୍ନ ରାଜ୍ୟରେ ପ୍ରାଥମିକ ଶିକ୍ଷାର ଗୁଣବତ୍ତା ବୃଦ୍ଧି ଦିଗରେ କାର୍ଯ୍ୟ କରୁଛି। ଦେଶର ବିଭିନ୍ନ ପ୍ରାନ୍ତରେ ଥିବା ପଛୁଆ ଅଞ୍ଚଳରେ ଏହା ଅନେକ କାମ କରିଛି। ବାଙ୍ଗାଲୋରଠାରେ ଫାଉଣ୍ଡେଶନ ପକ୍ଷରୁ ପ୍ରେମଜୀ ବିଶ୍ୱବିଦ୍ୟାଳୟ ସ୍ଥାପନା କରାଯାଇଛି। ଦେଶ ବିଭାଜନ ସମୟରେ ପ୍ରେମଜୀଙ୍କ ପରିବାର ଭାରତ ଚାଲି ଆସିଥିଲେ। ପାକିସ୍ତାନରେ ରହିବା ନେଇ ଏହାର ପ୍ରତିଷ୍ଠାତା ମହମ୍ମଦ ଅଲ୍ଲୀ ଜିନ୍ନାଙ୍କ ପ୍ରସ୍ତାବକୁ ପ୍ରେମଜୀଙ୍କ ପରିବାର ଅଗ୍ରାହ୍ୟ କରି ଭାରତରେ ରହିବାକୁ ପସନ୍ଦ କରିଥିଲେ। ଅଜିମ ପ୍ରେମଜୀଙ୍କ ବାପା ମହମ୍ମଦ ହାସିନ ପ୍ରେମଜୀଙ୍କ ଜିନ୍ନା ପାକିସ୍ତାନର ଅର୍ଥମନ୍ତ୍ରୀ କରିବା ଲାଗି ପ୍ରସ୍ତାବ ଦେଇଥିଲେ। ମାତ୍ର ଉକ୍ତ ପ୍ରସ୍ତାବକୁ ଅଗ୍ରାହ୍ୟ କରି ସେ ପରିବାର ସହ ଭାରତ ଚାଲି ଆସିିଥିଲେ।
