ଖପ୍ରାଖୋଲ, ୨୩ା୮ (ଡି.ଏନ୍.ଏ):ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ମହରାପଦର ପଁଚେତ୍ ବାଗଝରନ୍ ଗଁାର ସମାରୁ ଭୋଇକଁର ଝି’ ପଦ୍ମିନୀ(୩୦) ଆର ପୁଓ ପୁସ୍ତମ(୨୫) ଅଜନା ରୋଗ୍ରେ ପୀଡ଼ିତ ଅଛନ୍। ପାଖାପାଖି ୧୫ ବଛର ହେଲା ଦୁଇ ଭାଇ ବହେନ୍ ଚାଲବୁଲ କି କଥା କହି ନାଇଁ ପାରବାର। ଯେନ୍ଥିରଲାଗି ଭାଇ ଭହେନ୍କୁ ଗଧାମଖା, ଖାନାପିନା, ଝାଡ଼ାଝପଟ ସବୁରେ ମା’ବାପ୍ର ସାହାଯ୍ ଦରକାର ପଡ଼ୁଛେ। ଗଲା ୧୫ ବଛର ହେଲା ସମାରୁ ଝି’ପୁଓକେ ଭିନେ ଭିନେ ଡାକ୍ତରଖାନା ନେଇ ଚିକିଛା କରଉଛନ୍। ହେଲେ ଆଏଜ୍ତକ ଦୁଇ ଭାଇ ବହେନ୍କେ କାଏଁ ରୋଗ୍ ହେଇଛେ ଜନା ନାଇଁ ପଡ଼ବାର। ଛୋଟ ବେଲୁ ଭାଇ ବହେନ୍ ନିରୁଜ୍ ଥିଲେ, ଘରେ ଚାଷ୍ବାସରେ ବି ସହଯୋଗ କରୁଥିଲେ। ଦରକାର ପଡ଼ଲେ ଉନିଅଁା ଲୁକ୍କର କାମ୍ବୁତା କରି ଦୁଇ ପଏସା କମଉଥିଲେ। ଏନ୍ତା କି ମା’ବାପ୍ ସଂଗେ ଦାଦନ୍ ଯାଇ କାମ୍ କରୁଥିଲେ। ହେଲେ ଆଏଜ୍କେ ପାଖାପାଖି ୧୫ ବଛର ତଲୁ ଦୁଇ ଭାଇ ବହେନ୍କର ଦିହିପା ଦୁରବଲ ହେବାର ସଂଗେ ତାକର ଗୋଡ଼ହାତ୍ ଠିକ୍ରେ କାମ୍ ନାଇଁ କଲା। ଦିନୁଦିନ୍କେ ଦୁଇଝନ କଥା କହେବାର ଶକ୍ତି ବି ହରେଇ ଦେଲେ। ଏହେଦେ ରୋଗ୍ ପରଭାବରେ ଦୁଇ ଭାଇ ଭହେନ୍ ମାନ୍ସିକ, ଶାରୀରିକ୍ ସ୍ତରରେ ଦୁରବଲ ହେବାର ସଂଗେ ଭିନ୍ନକ୍ଷମ ପାଲଟିଯାଇଛନ୍। ଏନ୍ତାଥି ମା’ବାପ୍ ଝି’ପୁଓର ସେବା ଯତନ୍ କରବାରେ ଦିନ୍ ଯାଉଛେ। ଇଆଡ଼େ ପଦ୍ମିନୀକେ ସରକାରୀ ଯୋଜନାରେ ଚାଉଲ ଆର ଭତା ମିଲୁଥିଲବେଲେ ପୁସ୍ତମ ଏଭ୍ତକ ଭତାରୁ ବଁଚିତ୍ ହେଇ ରହିଛନ୍। ଉପେ ଶୂଇନ୍ ଗରିବ୍ ମା’ବାପ୍ ଗଣମାଧ୍ୟମ ଜରିଆରେ ଜିଲା ପରଶାସନକେ ଝି’ପୁଓର ଚିକିଛା ସାହାଯ୍ ଲାଗି ଗୁହାରି କରିଛନ୍। ଇ ବାବ୍ଦେ ଖପ୍ରାଖୋଲ ବିଡିଓ ତରଣୀ ସୁନାକୁଁ ପଚରାଲାରୁ ଆପଣକଁରନୁ ଇ ସୂଚନା ପାଇଲି। ଭାଇ ବହେନ୍ର ଦିହିପା ବାବ୍ଦେ ସ୍ବାସ୍ଥ୍ୟ ବିଭାଗ ସଂଗେ ଆଲୋଚନା କରମି ଆର ଯେନ୍ଟା ହେବା ସାହାଯ୍ ଯୁଗେଇ ଦେବାର ବେବସ୍ତା କରାଯିବା। ଯେତେ ଜଲ୍ଦି ହେବା ପୁସ୍ତମକେ ଭତା ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ।
