ଶ୍ରୀନଗର,୧୮ା୭: ଖରାପ ପାଗ ଏବଂ ରାସ୍ତା ଧସିବା ଯୋଗୁ ଅମରନାଥ ଯାତ୍ରାକୁ ଗୋଟିଏ ଦିନ ପାଇଁ ବନ୍ଦ ହୋଇଥିଲା। ଯାହା ପରେ ଆଜି ଅର୍ଥାତ୍ ଶୁକ୍ରବାର ପୁଣି ଏହି ଯାତ୍ରା ଆରମ୍ଭ ହୋଇଛି। ଆଜି ସକାଳେ ବାଲତାଲ ଏବଂ ପହଲଗାମ ଉଭୟ ରୁଟ୍ରେ ଯାତ୍ରା ପୁଣି ଆରମ୍ଭ କରାଯାଇଛି। ଅଧିକାରୀମାନେ କହିଛନ୍ତି ଯେ, ଆଜି ଶହ ଶହ ତୀର୍ଥଯାତ୍ରୀଙ୍କୁ ହିମାଳୟରେ ଥିବା ପବିତ୍ର ଗୁମ୍ଫା ଦର୍ଶନ କରିବାକୁ ଅନୁମତି ଦିଆଯାଇଛି।
ସୂଚନାଯୋଗ୍ୟ,ସତର୍କତାମୂଳକ ପଦକ୍ଷେପ ସ୍ବରୂପ, ଗୁରୁବାର ଉଭୟ ବେସ୍ କ୍ୟାମ୍ପରୁ କୌଣସି ତୀର୍ଥଯାତ୍ରୀଙ୍କୁ ଗୁମ୍ଫା ମନ୍ଦିର ଆଡ଼କୁ ଯିବାକୁ ଅନୁମତି ଦିଆଯାଇ ନଥିଲା, କିନ୍ତୁ ମାର୍ଗ ମଧ୍ୟରେ ବିଭିନ୍ନ ସ୍ଥାନରେ ଅଟକି ରହିଥିବା ୫୧୧୦ ତୀର୍ଥଯାତ୍ରୀଙ୍କୁ ସେମାନଙ୍କର ଯାତ୍ରା ଶେଷ କରିବାକୁ ଏବଂ ଦର୍ଶନ କରିବାକୁ ଅନୁମତି ଦିଆଯାଇଥିଲା।
ଅଧିକାରୀମାନେ କହିଛନ୍ତି, ଲଗାତର ବର୍ଷା ଯୋଗୁ ଭୂସ୍ଖଳନ ହୋଇଥିଲା ଏବଂ ଟ୍ରେକିଂ ପଥଗୁଡ଼ିକ ଅସୁରକ୍ଷିତ ହୋଇଥିଲା, ଯାହା ଫଳରେ କର୍ତ୍ତୃପକ୍ଷଙ୍କୁ ଅସ୍ଥାୟୀ ଭାବରେ ତୀର୍ଥଯାତ୍ରାକୁ ସ୍ଥଗିତ ରଖିବାକୁ ବାଧ୍ୟ କରାଯାଇଥିଲା। ପ୍ରଭାବିତ ଅଂଶଗୁଡ଼ିକର ମରାମତି ଏବଂ ତୀର୍ଥଯାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ତୁରନ୍ତ ମରାମତି କାର୍ଯ୍ୟ ଆରମ୍ଭ କରାଯାଇଥିଲା। ଉଦ୍ଧାରକାରୀ ଦଳ ଏବଂ ସୀମା ସଡ଼କ ସଂଗଠନ (BRO) ପଥଗୁଡ଼ିକୁ ସୁଗମ କରିବା ପାଇଁ ଅକ୍ଲାନ୍ତ ପରିଶ୍ରମ କରିଥିଲେ ଏବଂ ଗୁରୁବାର ସକାଳେ ହିଁ ଟ୍ରାକକୁ ଚଢ଼ିବା ପାଇଁ ଠିକ୍ କରାଯାଇଥିଲା। ପାଗକୁ ଦୃଷ୍ଟିରେ ରଖି, ଯାତ୍ରାକୁ ସ୍ଥଗିତ ରଖିବା ଉଚିତ ବୋଲି ବିବେଚନା କରାଯାଇଥିଲା।
ଅଧିକାରୀମାନେ ଏହା ମଧ୍ୟ କହିଛନ୍ତି, ପାଗରେ ଉନ୍ନତି ହେବା ଏବଂ ସମ୍ପୃକ୍ତ ସଂସ୍ଥାଗୁଡ଼ିକଠାରୁ ଅନୁମୋଦନ ମିଳିବା ପରେ ଆଜି ସକାଳେ ନୁନଓ୍ବାନ (ପହଲଗାମ) ଏବଂ ବାଲତାଲ ବେସ କ୍ୟାମ୍ପରୁ ଯାତ୍ରା ପୁଣି ଆରମ୍ଭ ହୋଇଥିଲା। ସରକାରୀ ସଂଖ୍ୟା ଅନୁଯାୟୀ, ଚଳିତ ବର୍ଷର ଯାତ୍ରାର ପ୍ରଥମ ୧୫ ଦିନ ମଧ୍ୟରେ ୨.୫୬ ଲକ୍ଷରୁ ଅଧିକ ତୀର୍ଥଯାତ୍ରୀ ବାବାଙ୍କୁ ଦର୍ଶନ କରିଛନ୍ତି।
ଅଧିକାରୀମାନେ କହିଛନ୍ତି, ଶୁକ୍ରବାର ସକାଳେ କଡ଼ା ସୁରକ୍ଷା ମଧ୍ୟରେ ଜମ୍ମୁର ଭଗବତୀ ନଗର ବେସ କ୍ୟାମ୍ପରୁ ୭୯୦୮ ଅମରନାଥ ତୀର୍ଥଯାତ୍ରୀଙ୍କ ୧୬ ତମ ଦଳ କଡ଼ା ସୁରକ୍ଷା ମଧ୍ୟରେ ବାହାରିଛି।
