ଲଣ୍ଡନ,୨୮ା୮(ଏଏଫ୍ପି)-ଓ୍ବେଷ୍ଟଇଣ୍ଡିଜ କିମ୍ବଦନ୍ତୀ ଭିଭିଆନ ରିଚାର୍ଡ, ଗ୍ୟାରି ସୋବର୍ସ ଏବଂ ଫ୍ରାଙ୍କ୍ ଓରେଲ୍ଙ୍କ ଭଳି କିମ୍ବଦନ୍ତୀ ଖେଳାଳିଙ୍କ ସହିତ ଯଦିଓ ସମକକ୍ଷ ନୁହଁନ୍ତି କିନ୍ତୁ କ୍ରିକେଟରେ ଅଧିକ ଦିନ ଧରି ତିଷ୍ଠି ରହିବାରେ ଏହି ସମସ୍ତଙ୍କୁ ପଛରେ ପକାଇ ଦେଇଛନ୍ତି ସେସିଲ ରାଇଟ୍। ଏହି ଫାଷ୍ଟ ବୋଲର ଜଣକ ‘ସେସ୍’ ନାମରେ ପରିଚିତ। ଦୁଇ ସପ୍ତାହ ମଧ୍ୟରେ ୮୫ବର୍ଷ ବୟସରେ ସେ ଖେଳରୁ ଅବସର ନେବାକୁ ସ୍ଥିର କରିଛନ୍ତି। ରାଇଟ୍ ଅତୀତରେ ବାର୍ବାଡୋସ ବିପକ୍ଷରେ ଜମାଇକା ତରଫରୁ ଖେଳିଛନ୍ତି। ଯେଉଁ ଦଳରେ ସୋବର୍ସ ଏବଂ ଓ୍ବେସ୍ ହଲ୍ଙ୍କ ଭଳି ଖେଳାଳି ରହିଥିଲେ। ୧୯୫୯ରେ ସେ ଇଂଲଣ୍ଡ ପଳାଇଥିଲେ। ସେଠାରେ କ୍ରମ୍ପଟନ ଦଳ ତରଫରୁ ସେଣ୍ଟ୍ରାଲ ଲାଙ୍କାଶାୟାର ଲିଗ୍ରେ ଜଣେ ପ୍ରଫେସନାଲ ଭାବେ ଏକ କ୍ୟାରିୟର ଆରମ୍ଭ କରିଥିଲେ। ସେଠାରେ ତାଙ୍କ ଭାବି ସ୍ତ୍ରୀ ଏନିଡ୍ଙ୍କ ଭେଟ ହୋଇଥିଲା। ୩ବର୍ଷ ପରେ ସେ ଇଂଲଣ୍ଡରେ ଅବସ୍ଥାନ କରିବାକୁ ନିଷ୍ପତ୍ତି ନେଇଥିଲେ। ଦମ୍ପତିଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ୧୯୭୦ ଦଶକ ବିଳମ୍ବ ଏବଂ ୧୯୮୦ ଦର୍ଶକ ପ୍ରାରମ୍ଭରେ ରିଚାଡର୍ସ ଏବଂ ଜୋଏଲ ଗାର୍ନରଙ୍କ ସହିତ ଖେଳିଛନ୍ତି। ରାଇଟ୍ ତାଙ୍କ ଦୀର୍ଘ ୬୦ବର୍ଷ କ୍ୟାରିୟରରେ ୭,୦୦୦ରୁ ଊର୍ଦ୍ଧ୍ୱ ଉଇକେଟ ଅକ୍ତିଆର କରିଛନ୍ତି। ଏକଦା ସେ ୫ଟି ସିଜନରେ ୫୩୮ ଉଇକେଟ ଅକ୍ତିଆର କରିଥିଲେ। ହାରାହାରି ଗୋଟିଏ ଉଇକେଟ ପିଛା ତାଙ୍କ ବଲ୍ ସଂଖ୍ୟା ୨୭ ରହିଥିଲା। ତାଙ୍କ ହିସାବରେ ସେ ଦୁଇ ନିୟୁତରୁ ଅଧିକ ମ୍ୟାଚ ଖେଳିଛନ୍ତି। ରାଇଟ୍ କହିଛନ୍ତି, ସେ ଖାଲି ବସି ରହିବା ଅବା ଟିଭି ଦେଖିବାକୁ ପସନ୍ଦ କରି ନ ଥାନ୍ତି ବରଂ ଚଳାବୁଲା କରିବା କିମ୍ବା କୌଣସି କର୍ଯ୍ୟରେ ଲିପ୍ତ ରହିଥାନ୍ତି। ସେପ୍ଟେମ୍ବର ୭ରେ ସେ ତାଙ୍କ କ୍ୟାରିୟରର ଅନ୍ତିମ ମ୍ୟାଚ ଖେଳିବେ। ଅପରମିଲ୍ ତରଫରୁ ପେନାଇନ୍ ଲିଗ୍ ଦଳ ସ୍ପ୍ରିଙ୍ଗ୍ହେଡ୍ ବିପକ୍ଷରେ ଖେଳିବେ।
