ନୂଆଦିଲ୍ଲୀ, ୧୨।୭: ଲାଗୁଛି ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ସମୟ ଏବେ ଭଲ ନାହିଁ। ଗୋଟିଏ ପରେ ଗୋଟିଏ ଖରାପ ଖବରର ତାଙ୍କୁ ସାମ୍ନା କରିବାକୁ ପଡୁଛି। ଲୋକସଭା ନିର୍ବାଚନରେ ଦଳର ଶୋଚନୀୟ ପରାଜୟ ପରେ ଏବେ ଅନେକ ଗୁଡ଼ିଏ ମାନହାନି ମାମଲାର ରାହୁଲ ସାମ୍ନା କରୁଛନ୍ତି। ଗତ ୮ଦିନ ଭିତରେ ୩ଟି ମାନହାନି ମକଦ୍ଦମାର ସାମ୍ନା କରିସାରେଲଣି ରାହୁଲ। ପ୍ରଥମ ଦୁଇଟିରେ ସେ ଜାମିନ ପାଇସାରିଥିବାବେଳେ ଶୁକ୍ରବାର ଅହମଦାବାଦ କୋର୍ଟରେ ହାଜର ହେବେ। ସୂଚନାଯୋଗ୍ୟ, ନୋଟବନ୍ଦୀ ସମୟରେ ଅହମଦାବାଦ ଜିଲା କୋପରେଟିଭ ବ୍ୟାଙ୍କ ୭୪୫.୫୯ କୋଟି ଟଙ୍କାର କଳା ଟଙ୍କାକୁ ଧଳା କରିଛି ଅଭିଯୋଗ କରିଥିଲେ ରାହୁଲ ଗାନ୍ଧୀ ଏବଂ କଂଗ୍ରେସ ମୁଖପାତ୍ର ରଣଦୀପ ସୁରଜେୱାଲା। ପରେ ବ୍ୟାଙ୍କ ଏବଂ ବ୍ୟାଙ୍କର ଅଧ୍ୟକ୍ଷ ଏପରି ଅଭିଯୋଗକୁ ଖଣ୍ଡନ କରିଥିଲେ ଏବଂ ଏହି ଦୁଇ କଂଗ୍ରେସ ନେତାଙ୍କ ବିରୋଧରେ ମାନହାନି ମକଦ୍ଦମା ରୁଜୁ କରିଥିଲେ। ଏପ୍ରିଲ ୯ରେ ଉଭୟଙ୍କୁ ଅହମଦାବାଦ କୋର୍ଟ ନୋଟିସ ପଠାଇଥିଲେ। ମେ ୨୭ରେ ରାହୁଲଙ୍କୁ ହାଜର ହେବା ପାଇଁ ନୋଟିସ ହୋଇଥିଲା କିନ୍ତୁ ସେ ହାଜର ହେବା ପାଇଁ ଅଧିକ ସମୟ ମାଗିଥିଲେ। ପରେ ଆଜି କୋର୍ଟରେ ହାଜର ହୋଇ ଉଭୟ ରାହୁଲ ଏବଂ ସୁରଜେୱାଲା ନିଜ ପକ୍ଷ ରଖିବେ।
