ବ୍ରହ୍ମପୁର ଅଫିସ,୬ା୩- ନାଗରିକତ୍ୱ ସଂଶୋଧନ ଆଇନ-୨୦୧୯(ସିଏଏ), ଜାତୀୟ ନାଗରିକ ପଞ୍ଜିକା(ଏନ୍ଆରସି), ଜାତୀୟ ଜନସଂଖ୍ୟା ପଞ୍ଜିକା(ଏନ୍ପିଆର)କୁ ନେଇ ଏବେ ସାରାଦେଶରେ ହିଂସା ଦେଖାଦେଇଛି। ଓଡ଼ିଶାରେ ଏନ୍ପିଆର, ଏନ୍ଆରସି, ସିଏଏକୁ କାର୍ଯ୍ୟକାରୀ ନ କରିବାକୁ ଦାବି ହୋଇଛି। ଏନେଇ ବିଧାନସଭାରେ ପ୍ରସ୍ତାବ ଆଗତ କରିବାକୁ ଗୁରୁବାର ଗୋଷାଣୀନୂଆଗଁା ସନ୍ତୋଷୀମା’ ମନ୍ଦିର କଲ୍ୟାଣମଣ୍ଡପରେ ମର୍ଯ୍ୟାଦାର ସହ ବଞ୍ଚିବାର ଅଭିଯାନ ଓ ଜନ ଜାଗରଣ ଅଭିଯାନ ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ଦାବି କରାଯାଇଛି।
୧ରୁ କେନ୍ଦ୍ର ସରକାର ଜାତୀୟ ଜନସଂଖ୍ୟା ପଞ୍ଜିକା(ଏନ୍ପିଆର) ସର୍ଭେ ଆରମ୍ଭ କରିବାକୁ ଯାଉଛନ୍ତି। ଏଥିରେ ନାଗରିକତ୍ୱ ପ୍ରମାଣ ପାଇଁ ସରକାର ୨୧ ପ୍ରମାଣପତ୍ର ଦେଖାଇବାକୁ ବାଧ୍ୟତା ମୂଳକ କରିଛନ୍ତି। ଓଡିଶାରେ ଏହା ଲାଗୁ ହେଲେ ଆଦିବାସୀ, ଦଳିତମାନେ ନିଜର ନାଗରିକତ୍ୱ ପ୍ରମାଣ ପାଇଁ ନାନା ସମସ୍ୟାର ସମ୍ମୁଖୀନ ହେବା ସହ ନାଗରିକତ୍ୱ ହରାଇବେ ବୋଲି ଅଭିଯାନ ପକ୍ଷରୁ କୁହାଯାଇଛି। ଫେବୃୟାରୀ ୧୯ ରୁ ଅଭିଯାନ ପକ୍ଷରୁ ଗଞ୍ଜାମ ଜିଲାର ୬ ବ୍ଲକରେ ଆୟୋଜିତ ହୋଇଥିବା ୬୪ ଗ୍ରାମସଭାରେ ଏନ୍ପିଆର, ଏନ୍ଆର୍ସି ସିଏଏକୁ ବିରୋଧ କରାଯାଇଛି। ଏହା ଓଡିଶାରେ ଲାଗୁ ନ କରିବାକୁ ରିଜୋଲ୍ୟୁଶନ ଆଗତ କରାଯାଇଛି। ଏପ୍ରିଲ ୧ରୁ ସେପ୍ଟେମ୍ବର ୩୦ ମଧ୍ୟରେ ହେବାକୁ ଥିବା ଜାତୀୟ ଜନସଂଖ୍ୟା ପଞ୍ଜିକା ସର୍ଭେ ଲାଗୁ କରା ନ ଯିବା ଦାବିରେ ମାର୍ଚ୍ଚ ୧୨ରେ ୬ ବ୍ଲକ ଘେରାଉ କରାଯିବ। ମାର୍ଚ୍ଚ ୧୮ରେ ବିଧାନସଭା ଘେରାଉ କରାଯିବା ସହ ଭବତ ସିଂଙ୍କ ଶହୀଦ ଦିବସରେ ଆରଡିସିଙ୍କ କାର୍ଯ୍ୟାଳୟ ଘେରାଉ କରିବା ନେଇ ଅଭିଯାନ ପକ୍ଷରୁ ସମ୍ମିଳନୀରେ ଚେତାବନୀ ଦିଆଯାଇଛି। ଖବରଦାତା ସମ୍ମିଳନୀରେ ମଧୁସୂଦନ ସେଠୀ, ବିଜୟ ସ୍ବାଇଁ, ଶ୍ରୀନିବାସ ରାଓ, ପ୍ରଫୁଲ୍ଲ ଶବର, ଗୋପାଳ କୃଷ୍ଣ ମଲ୍ଲିକ ଓ ହାଡୁଆ ମଣ୍ଡଳ ପ୍ରମୁଖ ଉପସ୍ଥିତ ଥିଲେ।
