ନୂଆଦିଲ୍ଲୀ,୧୮-୬: ସୋସିଆଲ ମିଡିଆ ଓ୍ବେବସାଇଟ ଫେସ୍ବୁକ୍ ୨୦୨୦ରେ ନିଜସ୍ବ କ୍ରିପ୍ଟୋକରେନ୍ସି ‘ଲିବ୍ରା’ ଲଞ୍ଚ କରିବାକୁ ଯାଉଛି ବୋଲି ମଙ୍ଗଳବାର ଘୋଷଣା କରିଛି। ସ୍ମାର୍ଟ ଡିଭାଇସ୍ ଜରିଆରେ ଉପଲବ୍ଧ ହେବାକୁ ଥିବା ଏହି ଲୋ କଷ୍ଟ୍ ଗ୍ଲୋବାଲ ପେମେଣ୍ଟ ସିଷ୍ଟମ ତିଆରି କରିବା କମ୍ପାନୀର ଉଦ୍ଦେଶ୍ୟ ବୋଲି କୁହାଯାଇଛି। ସାରା ବିଶ୍ୱରେ ଏହାର ୨୦୦କୋଟି ୟୁଜର ଏହାକୁ ବ୍ୟବହାର କରିପାରିବେ ବୋଲି କମ୍ପାନୀ କହିଛି। ଲିବ୍ରାକୁ ପ୍ରାୟ ୨୫ ପାର୍ଟନର୍ସର ସମର୍ଥନ ରହିଛି। ଯେଉଁଥିରେ ନନ୍ ପ୍ରଫିଟେବଲ କମ୍ପାନୀ, ଫାଇନାନ୍ସିଆଲ ସର୍ଭିସେସ୍ ଏବଂ ଅନ୍ଲାଇନ ଇ-କମର୍ସ କମ୍ପାନୀ ରହିଛନ୍ତି। ଓ୍ବାଲ୍ ଷ୍ଟ୍ରିଟ୍ ଜର୍ନାଲର ଏକ ରିପୋର୍ଟ ଅନୁଯାୟୀ, ଏଥିରେ ଭିସା, ମାଷ୍ଟରକାର୍ଡ, ପେପଲ୍ ଓ ଓବର ଭଳି କମ୍ପାନୀ ସାମିଲ ହୋଇଛନ୍ତି। ସେମାନେ ଭେଞ୍ଚର କ୍ୟାପିଟାଲିଷ୍ଟ ଏବଂ ଟେଲିକମ୍ କମ୍ପାନୀଙ୍କ ସହିତ ମିିଶି କ୍ରିପ୍ଟୋକରେନ୍ସି ଲାଗି ୧ କୋଟି ଡଲାର ନିବେଶ କରିବେ। ଫେସ୍ବୁକ୍ର ଘୋଷଣା ଅନୁଯାୟୀ, କ୍ରିପ୍ଟୋକରେନ୍ସି ଲିବ୍ରାକୁ ରିଏଲ ଆସେଟ୍ସ ଓ ରେଗୁଲେଟର୍ସଙ୍କ ସମର୍ଥନ ରହିଛି। ବିବିସିର ରିପୋର୍ଟ ଅନୁଯାୟୀ, ଫେସ୍ବୁକ ନିଜର କ୍ରିପ୍ଟୋକରେନ୍ସି ଲାଗି ଆମେରିକା ଟ୍ରେଜେରୀ ଓ ବ୍ୟାଙ୍କ ଅଫ୍ ଇଂଲଣ୍ଡରୁ ଅନୁମତି ନେଇସାରିଛି। ଏହି କ୍ରିପ୍ଟୋକରେନ୍ସି ଫେସ୍ବୁକର ଡିଜିଟାଲ ଓ୍ବାଲେଟ ଓ ଅନ୍ୟ ସେବା ଜରିଆରେ ଉପଲବ୍ଧ ହେବ। ଏହାର ଓ୍ବାଲେଟ୍ର ନାମ କାଲିବ୍ରା ରଖାଯାଇଛି। ଭର୍ଚୁଆଲ କଏନକୁ ଡଲାର ଓ ୟୁରୋ ମୁଦ୍ରା ସହ ସମକକ୍ଷ କରି ଗ୍ରାହକଙ୍କ ମଧ୍ୟରେ ବିଶ୍ୱାସ ସ୍ଥାପନ ପାଇଁ ପ୍ରୟାସ କରାଯିବ। ଏହି ନୂଆ କ୍ରିପ୍ଟୋକରେନ୍ସି ଦ୍ୱାରା ବିଟ୍କଏନ ଭଳି ବ୍ଲକ୍ଚେନ ପ୍ରଯୁକ୍ତି ଆଧାରିତ ମୁଦ୍ରାରେ ଦେଖାଦେଉଥିବା ଅସ୍ଥିରତାରୁ ରକ୍ଷା ପାଇ ହେବ ବୋଲି ଫେସ୍ବୁକ୍ ମନେ କରୁଛି।
