ହାଇଦ୍ରାବାଦ,୨୭ା୫: ତେଲଙ୍ଗାନାର ଓ୍ବାରାଙ୍ଗଲରେ ଘଟିଛି ସିରିଜ୍ ମର୍ଡର। ପୋଲିସ ଏହାର ଖୋଳତାଡ଼ କରି ଜଣେ ବିହାରୀ ଯୁବକଙ୍କୁ ଗିରଫ କରିବାରେ ସଫଳ ହୋଇଛି। ଲିଭ୍ ଇନ୍ରେ ରହୁଥିବା ଜଣେ ମହିଳାଙ୍କ ସହ ଶାରୀରିକ ସମ୍ପର୍କ ରଖି ଶେଷରେ ତାଙ୍କୁ ହତ୍ୟା କରିବା ପରେ ସେ ତାଙ୍କ ପରିବାରର ୯ ଜଣଙ୍କୁ ମାରିଥିବା ସ୍ବୀକାର କରିଛନ୍ତି। ପୋଲିସ କମିଶନର ଭି. ରବିନ୍ଦର କହିଛନ୍ତି ଯେ, ଘଟଣା ମେ ୨୧, ୨୨ର। ବିହାରୀ ଯୁବକ ସଞ୍ଜୟ କୁମାର ଯାଦବ(୨୪) ଏହି କାଣ୍ଡ ଭିଆଇଛନ୍ତି। ମୃତକଙ୍କ ମଧ୍ୟରେ ଗୋଟିଏ ପରିବାରର ୬ ଜଣ ଥିବା ସେ ପ୍ରକାଶ କରିଛନ୍ତି। ଖାଦ୍ୟରେ ନିଶା ଔଷଧ ଦେଇ ମାରିବା ପରେ ସଞ୍ଜୟ ସେମାନଙ୍କୁ ନିକଟସ୍ଥ ଗୋରେଖୁଣ୍ଟା ଗ୍ରାମର ଏକ କୂଅରେ ପକାଇ ଦେଇଥିଲେ। ସଞ୍ଜୟ ପଶ୍ଚିମବଙ୍ଗର ସ୍ବାମୀ ପରିତ୍ୟକ୍ତା ରଫିକା(୩୭) ନାମକ ଜଣେ ମହିଳାଙ୍କ ସହ ପ୍ରେମ ସମ୍ପର୍କ ରଖିଆସୁଥିଲେ। ପରେ ଦୁହିଁଙ୍କ ମଧ୍ୟରେ ଝଗଡ଼ା ହେବାରୁ ରଫିକାକୁ ଜୀବନରେ ମାରିଦେଇଥିଲେ। ପରେ ସେ ରଫିକାଙ୍କ ଘରକୁ ଯାଇ ଖାଦ୍ୟରେ ନିଶା ମିଶାଇ ୯ ଜଣଙ୍କୁ ମାରି କୂଅରେ ଫିଙ୍ଗିଦେଇଥିଲେ। ପୋଲିସ ସିସିଟିଭି ଫୁଟେଜ୍ରୁ ତଥ୍ୟ ସଂଗ୍ରହ କରି ତଦନ୍ତ କରିବା ସହ ସଞ୍ଜୟଙ୍କୁ ଗିରଫ କରିଥିଲା।
