ଫିଲ୍ମ ‘୮୩’ରେ ୧୯୮୩ ବିଶ୍ୱକପର ହିରୋ କପିଳ ଦେବଙ୍କ ଲୁକରେ ନଜର ଆସିବେ ରଣବୀର ସିଂ। କପିଳଙ୍କ ଲୁକରେ ରଣବୀରଙ୍କୁ ଠିକ ଭାବରେ ଚିହ୍ନି ମଧ୍ୟ ହେଉନାହିଁ। ଲୁକରେ ରଣବୀର ପୂରା କପିଲଙ୍କ ଭଳି ଦେଖାଯାଉଛନ୍ତି। ଫଟୋରେ ରଣବୀରଙ୍କ ଆଖିରେ ମଧ୍ୟ କପିଳଙ୍କ ଭଳି ଜୋଶ ଦେଖିବାକୁ ମିଳିଛି। ହରିୟାଣାର ହରିକେନ କୁହାଯାଉଥିବା କପିଳ ଦେବ ଭଳି ସଟ୍ ଲଗାଇବା ପାଇଁ ରଣବୀରଙ୍କୁ ଅନେକ ପରିଶ୍ରମ କରିବାକୁ ପଡିଛି। ତାଙ୍କ ସଟ୍ ଲଗାଉଥିବା ଏକ ଫଟୋ ରଣବୀର ନିଜ ସୋସିଆଲ ମିଡିଆରେ ଅପଲୋଡ କରିଛନ୍ତି। ତାଙ୍କ ଏଭଳି ଲୁକ୍କୁ ଦର୍ଶକ ବେଶ୍ ପସନ୍ଦ କରିଛନ୍ତି। ଏହି ଫିଲ୍ମଟି ୧୯୮୩ ବିଶ୍ୱକପକୁ ନେଇ ନିର୍ମାଣ ହୋଇଛି। ୧୯୮୩ରେ କପିଳଙ୍କ ନେତୃତ୍ୱରେ ଭାରତ ବିଶ୍ୱକପ ବିଜେତା ହୋଇଥିଲା। ଯାହାର ଝଲକ ଏହି ଫିଲ୍ମରେ ଦେଖିବାକୁ ମିଳିବ। ଏହାଛଡା ବିଶ୍ୱକପର ଆଉ କିଛି ଭିତିରି କଥା ମଧ୍ୟ ଫିଲ୍ମରେ ଦେଖିବାକୁ ମିଳିବ। ରଣବୀରଙ୍କ ବ୍ୟତୀତ ଫିଲ୍ମରେ କପିଳଙ୍କ ପତ୍ନୀ ରୋମି ଦେବୀଙ୍କ ଭୂମିକାରେ ରଣବୀରଙ୍କ ରିଅଲ ଲାଇଫ ପାର୍ଟନର ଦୀପିକା ପାଦୁକୋନ ଅଭିନୟ କରୁଛନ୍ତି।ଇଂଲଣ୍ଡରେ ଏବେ ଫିଲ୍ମଟିର ସୁଟିଂ ଚାଲିଛି । ତେବେ ଏହି ଫିଲ୍ମ ପାଇଁ ରଣବୀରଙ୍କୁ ମଧ୍ୟ ବେଶ ପରିଶ୍ରମ କରିବାକୁ ପଡିଛି। ଫିଲ୍ମକୁ ଜୀବନ୍ତ କରିବା ପାଇଁ କପିଳଙ୍କ ସହ ମଧ୍ୟ ବେଶ କିଛି ସମୟ ବିତାଇଛନ୍ତି ରଣବୀର। ପ୍ରାୟ ୧୦ ଦିନ କପିଳଙ୍କ ଘରେ ରହି ତାଙ୍କର ବ୍ୟାଟିଂ ଓ ବୋଲିଂ କଳା ଶିଖିବାକୁ ପ୍ରୟାସ କରିଛନ୍ତି ରଣବୀର। କପିଳଙ୍କ ଷ୍ଟାଇଲକୁ କିପି କରିବାକୁ କ୍ରିକେଟ ମୈଦାନରେ ମଧ୍ୟ ଅନେକ ସମୟରେ ପ୍ରାକ୍ଟିସ କରୁଥିବାର ରଣବୀରଙ୍କୁ ଦେଖିବାକୁ ମିଳିଛି। ଏପରିକି ପୂର୍ବତନ କ୍ରିକେଟର ବଲବିନ୍ଦର ସିଂ ସନ୍ଧୁଙ୍କ ଠାରୁ ମଧ୍ୟ କ୍ରିକେଟ ଟ୍ରେନିଂ ନେଇଛନ୍ତି ରଣବୀର। ଏହି ଫିଲ୍ମଟି ଆସନ୍ତା ବର୍ଷ ଏପ୍ରିଲ ୧୦ ତାରିଖରେ ରିଲିଜ ହେବ।
