ଗାବୋରୋନେ,୯।୨: କେଉଁଠି କେଉଁଠି ହାତୀଙ୍କ ସଂଖ୍ୟା କମିଯିବା ଶୁଣାଯାଉଥିବା ବେଳେ ଏମାନେ ଖାଦ୍ୟାଭାବରୁ ଜଙ୍ଗଲ ଛାଡି ଜନବସତି ମୁହାଁ ହେଉଥିବା ମଧ୍ୟ ଦେଖାଯାଇଛି। ବେଳେ ବେଳେ ହାତୀ ମଣିଷର ଲଢେଇରେ ଅନେକ ଲୋକଙ୍କ ଜୀବନ ଯିବା ଖବର ମଧ୍ୟ ଆସିଛି। ହେଲେ ଏବେ ଏମିତି ଏକ ଦେଶ ହାତୀଙ୍କୁ ମାରିବାକୁ ନିର୍ଦ୍ଦେଶ ଦେବା ଘଟଣା ଚର୍ଚ୍ଚାର ବିଷୟ ପାଲଟିଛି। ଏବେ ବୋଟସଓ୍ବାନା ଦେଶରେ ସରକାର ୬୦ ହାତୀଙ୍କୁ ମାରିବାକୁ ନିର୍ଦ୍ଦେଶ ଦେଇଥିବା ଜଣାପଡିଛି। ଆଉ ଏଥିପାଇଁ ସରକାରଙ୍କ ପକ୍ଷରୁ ଲାଇସେନ୍ସ ମଧ୍ୟ ଜାରି କରାଯାଇଛି। ଯେଉଁ ସଂସ୍ଥା ବା ଏଜେନ୍ସି ହାତୀ ମାରିବାକୁ ଚାହିଁବେ ସେମାନଙ୍କ ପାଖରେ ଲାଇସେନ୍ସ ଥିବା ସହ ଏମାନେ ଗୋଟିଏ ହାତୀ ମାରିବାକୁ ପ୍ରାୟ ୩୧ ଲକ୍ଷ ଟଙ୍କା ଜମା କରିବାକୁ ପଡିବ ବୋଲି ସରକାର କହିଛନ୍ତି। ଏମିତି ୬୦ ହାତୀଙ୍କୁ ମାରିଲେ ସରକାର ପାଖାପାଖି ୧୮.୬୦ କୋଟି ଟଙ୍କା ଲାଭ କରିବେ ବୋଲି କୁହାଯାଏ। ବୋଟସଓ୍ବାନାର ରାଷ୍ଟ୍ରପତି ମୋକଓ୍ବେଟସି ମାସିସି ଗତ ୫ ବର୍ଷର ନିର୍ଦ୍ଦେଶକୁ ଫେରାଇ ନେଇ ଏହି ନିର୍ଦ୍ଦେଶ ଜାରି କରିଛନ୍ତି। ଏହାର କାରଣ ହେଉଛି ଏବେ ବୋଟସଓ୍ବାନାରେ ହାତୀଙ୍କ ସଂଖ୍ୟା ବହୁ ପରିମାଣରେ ବୃଦ୍ଧି ଘଟିଛି। ସେଠାରେ ୧୯୯୦ରେ ହାତୀଙ୍କ ସଂଖ୍ୟା ପ୍ରାୟ ୮୦ ହଜାର ଥିବା ବେଳେ ଏବେ ଏହା ୧.୩୦ ଲକ୍ଷରେ ପହଞ୍ଚିଲାଣି। ତେଣୁ ଏମାନେ ଜନବସତି ଭିତରକୁ ଚାଲି ଆସି ଧନଜୀବନ ନଷ୍ଟ କରୁଥିବାରୁ ସରକାର ଏମାନଙ୍କୁ ମାରିବାକୁ ନିର୍ଦ୍ଦେଶ ଦେଇଛନ୍ତି। ତେବେ ହାତୀ ମାରୁଥିବା ଏଜେନ୍ସି ପରେ ହାତୀର ବିଭିନ୍ନ ଅଙ୍ଗ ବିକ୍ରିକରି ସେଥିରୁ ଆୟ କରିବ। ସେଥିପାଇଁ ହାତୀ ମାରିବାକୁ ହେଲେ ସରକାରଙ୍କ ନିକଟରେ ଟଙ୍କା ଜମା କରିବାକୁ କୁହାଯାଉଇଛି। ଏହାଦ୍ୱାରା ହାତୀ ବଂଶ ବୃଦ୍ଧିକୁ ଅଟକାଇ ହେବ।
