ହାଟଡ଼ିହୀ,୨୮।୮(ଡି.ଏନ୍.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ ଅଧୀନ ତିନୋଟି ସ୍ଥାନରେ ଆନନ୍ଦପୁର ବିଧାୟକ ଭାଗିରଥି ସେଠୀ ବୁଧବାର ପ୍ରଧାନମନ୍ତ୍ରୀ ଗ୍ରାମ୍ୟ ସଡକର ଶିଳାନ୍ୟାସ କରିଛନ୍ତି। ଛେନାପଦିରୁ ପଞ୍ଚୁଗୋଛିଆ ୬ କିମି ୨୦୦ ମି. ରାସ୍ତା ପାଇଁ ୨ କୋଟି ୪୧ ଲକ୍ଷ ଟଙ୍କା ବ୍ୟୟ ଅଟକଳ ହୋଇଛି। ସେହିପରି ନିଉଦାନିରୁ ମଉଦା ପର୍ଯ୍ୟନ୍ତ ୫ କିମି ୨୦୦ ମି. ରାସ୍ତା ପାଇଁ ୨ କୋଟି ୯ ଲକ୍ଷ ଏବଂ ବରାଙ୍ଗରୁ ସୁନ୍ଦରାପାଳ ପାଇଁ ୧ କୋଟି ୭୦ ଲକ୍ଷ ଟଙ୍କାର ବ୍ୟୟ ଅଟକଳ ହୋଇଛି। ଏହି ତିନୋଟି ରାସ୍ତା ହାଟଡିହୀ ଅଞ୍ଚଳର ବେଶ ଗୁରୁତ୍ୱପୁର୍ଣ୍ଣ ରାସ୍ତା ଭାବେ ଜଣାଶୁଣା।
ପ୍ରଥମେ ବିଧାୟକ ଛେନାପଦି ବିଶ୍ୱ ତାରିଣୀ ମନ୍ଦିରରେ ପୂଜାର୍ଚ୍ଚନା କରିବା ପରେ ଛେନାପଦୀ, ସୋସୋ, ଜମ୍ଭୀରା ପ୍ରଭୃତି ଅଞ୍ଚଳ ଗସ୍ତକରି ସେଠାରେ ରାସ୍ତାର ଶିଳାନ୍ୟାସ କରିଛନ୍ତି। ଏହି ଅବସରରେ ବିଜେଡି ଜିଲା ସଭାପତି ବିମ୍ବାଧର ବିଶ୍ୱାଳ, ଠିକାଦାର ଧବଳେଶ୍ୱର ପଟ୍ଟନାୟକ ଓ ସଂଗ୍ରାମ ଲେଙ୍କା, ଯନ୍ତ୍ରୀ ଦଶରଥ ସେଠୀ, କ୍ଷୀରୋଦ ଚନ୍ଦ୍ର ବେହେରାଙ୍କ ସମେତ ବହୁକର୍ମୀ ଉପସ୍ଥିତ ଥିଲେ।
