ଜୋହାନ୍ସବର୍ଗ, ୧୭।୪(ପି.ଟି.): ପୂର୍ବତନ ଅଧିନାୟକ ଗ୍ରେମ୍ ସ୍ମିଥ୍ଙ୍କୁ ଆଉ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଛି। ତାଙ୍କୁ କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ)ର ସ୍ଥାୟୀ ନିର୍ଦ୍ଦେଶକ ରୂପେ ନିଯୁକ୍ତ ପ୍ରଦାନ କରାଯାଇଛି। ତାଙ୍କୁ ଆଗାମୀ ୨ ବର୍ଷ ପାଇଁ ତାଙ୍କୁ ଏହି ଗୁରୁଦାୟିତ୍ୱ ପ୍ରଦାନ କରାଯାଇଛି। ଗତବର୍ଷ ଡିସେମ୍ବରରୁ ମଧ୍ୟବର୍ତ୍ତୀକାଳୀନ ଭାବେ ଏହି ସ୍ଥାୟୀ ନିର୍ଦ୍ଦେଶକ ପଦ ସୃଷ୍ଟି କରାଯାଇଛି।
ଦକ୍ଷିଣ ଆଫ୍ରିକା କ୍ରିକେଟର ପୂର୍ବ ଗୌରବ ଫେରାଇଆଣିବା ପାଇଁ ୩୯ ବର୍ଷୀୟ ସ୍ମିଥ୍ଙ୍କ ଉପରେ ବୋର୍ଡ ଭରସା କରିଛି। ସ୍ମିଥ୍ ମଧ୍ୟ ନିଜ ଅଭିଜ୍ଞତା, ଉତ୍ସାହ, କଠିନ ପରିଶ୍ରମ ଓ କ୍ରିକେଟ ପ୍ରତି ଥିବା ଅଙ୍ଗୀକାରବଦ୍ଧତା ପାଇଁ ଏହି ପଦରେ ଅସ୍ଥାୟୀ ଭାବେ କାର୍ଯ୍ୟ କରି ଦକ୍ଷିଣ ଆଫ୍ରିକା କ୍ରିକେଟକୁ ଆଗକୁ ବଢାଇଛନ୍ତି ବୋଲି ସିଏସ୍ଏର କାର୍ଯ୍ୟକାରୀ ମୁଖ୍ୟ କାର୍ଯ୍ୟନିର୍ବାହୀ ଜ୍ୟାକ କାଲିସ୍ କହିଛନ୍ତି। କେତେକ ସ୍ଥଳରେ ଆହୁରି ବହୁ ପରିମାଣରେ କାର୍ଯ୍ୟ କରିବା ବାକି ରହିଛି। ସ୍ମିଥ୍ ତାଙ୍କ ଦାୟିତ୍ୱ ତୁଲାଇବାରେ ସକ୍ଷମ ହେବେ ଓ ଦକ୍ଷିଣ ଆଫ୍ରିକା କ୍ରିକେଟକୁ ଆଗକୁ ନେବାରେ ନିର୍ଣ୍ଣାୟକ ଭୂମିକା ଗ୍ରହଣ କରିବେ ବୋଲି କାଲିସ୍ ଦୃଢତାର ସହ କହିଛନ୍ତି।
ଉଲ୍ଲେଖଥାଉ କି, ୨୦୦୩ରୁ ୨୦୧୪ ମଧ୍ୟରେ ସ୍ମିଥ୍ ୧୦୮ଟି ଟେଷ୍ଟ ମ୍ୟାଚ୍ରେ ଦକ୍ଷିଣ ଆଫ୍ରିକାର ନେତୃତ୍ୱ ନେଇଛନ୍ତି। ସେ ୧୧୭ଟି ଟେଷ୍ଟ, ୧୯୭ ଦିନିକିଆ ଓ ୩୩ଟି ଟି୨୦ ଖେଳିଛନ୍ତି। ନିର୍ଦ୍ଦେଶକ ପଦରେ ସ୍ଥାୟୀ ଭାବେ ନିଯୁକ୍ତି ପାଇଥିବାରୁ ସ୍ମିଥ୍ ମଧ୍ୟ ଖୁସି ଜାହିର କରିଛନ୍ତି। ଏବେ କ୍ରିକେଟର ଉନ୍ନତି ପାଇଁ ଯୋଜନା ଅନୁଯାୟୀ କିଛି କରିବାକୁ ହେବ ଓ ଯଦି ସବୁକିଛି ଠିକ୍ଠାକ ଚାଲେ ଆମେ ଦକ୍ଷିଣ ଆଫ୍ରିକା କ୍ରିକେଟକୁ ଟ୍ରାକ୍କୁ ଆଣିବାରେ ସକ୍ଷମ ହେବୁ ବୋଲି ସେ କହିଛନ୍ତି।
