କଟକ ଅଫିସ,୧୪ା୧୨: ସ୍ମାର୍ଟ ଫୋନରେ କାର୍ଟୁନ୍, ଗୀତ, ଭିଡିଓ ଗେମ୍ ସହିତ ଟିକ୍ଟକ୍ ମାୟାରେ ପିଲାଠୁ ବୟସ୍କଙ୍କ ପର୍ଯ୍ୟନ୍ତ ବାୟା। ଏପରି କି ପିଲା ଅଝଟ କଲେ ମା’ ବାପାମାନେ ସ୍ମାର୍ଟ ଫୋନ ଧରାଇ ଦେଇ ଶାନ୍ତ କରୁଛନ୍ତି। କିନ୍ତୁ ଏହା ଯେ ପିଲା ଉପରେ କୁପ୍ରଭାବ ପକାଉଛି ତାହା ଅନେକଙ୍କୁ ଅଜଣା ଅଛି। ଏକ ଅଧ୍ୟୟନରୁ ଜଣାପଡିଛି, ଏହାଦ୍ୱାରା ପିଲାଙ୍କର ମାନସିକ ଓ ଶାରୀରିକ ସ୍ବାସ୍ଥ୍ୟ ବ୍ୟାପକ ଭାବେ ପ୍ରଭାବିତ ହେଉଛି। ଏସ୍ସିବି ମେଡିକାଲ ମାନସିକ ରୋଗ ପ୍ରତିଷ୍ଠାନର ବିଶେଷଜ୍ଞ ଡା. ସତ୍ୟକାମ ମହାପାତ୍ର ଏକ ଅଧ୍ୟୟନ ରିପୋର୍ଟକୁ ଆଧାର କରି ଏଭଳି କଥା କହିଛନ୍ତି। ଡା. ମହାପାତ୍ରଙ୍କ କହିବା ଅନୁଯାୟୀ, ମୋବାଇଲ ଫୋନର ଅତ୍ୟଧିକ ବ୍ୟବହାର ଯୋଗୁ ପିଲାମାନଙ୍କର ବ୍ୟବହାରରେ ଅନେକ ପରିବର୍ତ୍ତନ ଦେଖାଦେଉଛି। ଯେମିତି କି ଅଧିକ ଚିଡିଚିଡା ହେବା, ପାଠପଢାରେ କମ୍ ଧ୍ୟାନ ଦେବା, ପରିବାରର ସଦସ୍ୟ ଓ ସାଙ୍ଗସାଥୀଙ୍କ ସହିତ ମିଳାମିଶା କମ୍ କରିବା, ଏକୁଟିଆ ରହିବାକୁ ପସନ୍ଦ କରିବା, ସ୍ମରଣଶକ୍ତି ହ୍ରାସ ପାଇବା, ନିଦ କମିଯିବା, ଖାଦ୍ୟ କମ୍ ଖାଇବା, ଛୋଟ ଛୋଟ କଥାରେ ଭୟଭୀତ ହୋଇଯିବା ଆଦି ଘଟଣା ନଜରକୁ ଆସୁଛି। ଛୋଟ ପିଲାମାନେ ମୋବାଇଲ ଫୋନର ଅତ୍ୟଧିକ ବ୍ୟବହାର ଯୋଗୁ ସେମାନଙ୍କର କଥା କହିବା ଆରମ୍ଭ କରିବାରେ ବିଳମ୍ବ ହେଉଥିବା ଡା. ମହାପାତ୍ର କହିଛନ୍ତି। ଏପରି କି କିଛି ପିଲାଙ୍କର ମସ୍ତିଷ୍କ ଠିକ୍ ଭାବେ ବିକାଶ କରିବାରେ ବାଧାପ୍ରାପ୍ତ ହୋଇଥାଏ। ମାତ୍ରାଧିକ ସ୍ମାର୍ଟ ଫୋନ ବ୍ୟବହାର ଯୋଗୁ ମାନସିକ ଚାପ, ଡିପ୍ରେସନ, ଆଙ୍ଗ୍ଜାଇଟି ଓ ଏଡିଏଚ୍ଡି (ଆଟେନସନ ଡେଫିସିଟ୍ ହାଇପରଆକ୍ଟିଭିଟି ଡିଜ୍ଅର୍ଡର) ସମସ୍ୟା ସହିତ କେତେକ ଶାରୀରିକ କୁପ୍ରଭାବ ମଧ୍ୟ ପଡ଼ିଥାଏ। ଏଗୁଡ଼ିକ ହେଲା ମୁଣ୍ଡବିନ୍ଧା, ହାତଗଣ୍ଠି ଓ ଆଙ୍ଗୁଳି ବିନ୍ଧା ହେବା, ବେକ ଓ ଅଣ୍ଟା ଦରଜ ହେବା ଓ ଆଖି ଉପରେ କୁପ୍ରଭାବ ପଡ଼ିବା ଆଦି। କିଛିଦିନ ପୂର୍ବରୁ ସ୍ମାର୍ଟ ଫୋନରେ ବିଭିନ୍ନ ଅନ୍ଲାଇନ ଗେମ ଖେଳି ଅନେକ ଛୋଟ ପିଲା ଆତ୍ମହତ୍ୟା ମଧ୍ୟ କରିଥିଲେ। ମୋବାଇଲ ଫୋନର ଅତ୍ୟଧିକ ବ୍ୟବହାର ଯୋଗୁ ପିଲାମାନେ ଅଯଥା ଅନେକ ସମୟ ନଷ୍ଟ କରୁଛନ୍ତି, ଯାହାଦ୍ୱାରା ସେମାନଙ୍କର ପାଠପଢା ଉପରେ କୁପ୍ରଭାବ ପଡୁଛି।
ଡା. ମହାପାତ୍ରଙ୍କ କହିବା ଅନୁଯାୟୀ, ୧୨ ବର୍ଷରୁ କମ୍ ବୟସ୍କ ପିଲାଙ୍କୁ ସ୍ମାର୍ଟ ଫୋନ ବ୍ୟବହାର ପାଇଁ ଦିଅନ୍ତୁ ନାହିଁ। ସନ୍ଧ୍ୟା ପରେ ପିଲାକୁ ମୋବାଇଲ ଫୋନ ନ ଦେବାକୁ ଡାକ୍ତର ବାରଣ କରିଛନ୍ତି। ପିଲାଙ୍କୁ ୧ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ମୋବାଇଲ ଫୋନ ବ୍ୟବହାର ପାଇଁ ଦିଆ ନ ଯାଉ, ପିଲା ମୋବାଇଲ ଫୋନ ବ୍ୟବହାର କରୁଥିବା ବେଳେ ତାକୁ ଏକୁଟିଆ ନ ଛାଡ଼ିବା ପାଇଁ ସେ କହିଛନ୍ତି। ପିଲାମାନେ ମାତାପିତାଙ୍କ ଅନେକ ବ୍ୟବହାରକୁ ଅନୁସରଣ କରିଥାନ୍ତି। ତେଣୁ ଅଭିଭାବକମାନେ ମଧ୍ୟ ନିଜ ମୋବାଇଲ ଫୋନର କମ୍ ବ୍ୟବହାର କରନ୍ତୁ। ଯଦି ପିଲା ମାତ୍ରାଧିକ ମୋବାଇଲ ଫୋନ୍ ବ୍ୟବହାର କରୁଥାଏ ଓ ତାହାର ବ୍ୟବହାରରେ ପରିବର୍ତ୍ତନ ଦେଖାଯାଏ ତେବେ ପିଲାକୁ ମାନସିକ ରୋଗ ବିଶେଷଜ୍ଞଙ୍କ ପାଖକୁ ନେଇ ପରାମର୍ଶ କରିବା ପାଇଁ ଡା. ମହାପାତ୍ର କହିଛନ୍ତି।
