ସିଡ୍ନୀ,୧୩।୩- ଅଷ୍ଟ୍ରେଲିଆନ ଦ୍ରୁତ ବୋଲର କେନ ରିଚାର୍ଡସନଙ୍କଠାରେ କରୋନା ଭାଇରସର ଲକ୍ଷଣ ଦେଖାଦେଇଛି। ତାଙ୍କର ସ୍ବାବ ପରୀକ୍ଷା ମଧ୍ୟ କରାଯାଇଛି। ଏବେ ରିପୋର୍ଟକୁ ଅପେକ୍ଷା। ଏହି କାରଣରୁ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆରେ ତାଙ୍କୁ ବିଶ୍ରାମ ଦିଆଯାଇଛି। ଚଳିତ ସପ୍ତାହରେ ଅଷ୍ଟ୍ରେଲିଆ ଦଳ ସହ ଦକ୍ଷିଣ ଆଫ୍ରିକାରୁ ଫେରିଥିବା ଡାହାଣହାତୀ ପେସର ତଣ୍ଟିରେ ଯନ୍ତ୍ରଣା ଅନୁଭବ କରୁଥିବା ମେଡିକାଲ ଷ୍ଟାପଙ୍କୁ ଜଣାଇଥିଲେ। ଆମ ମେଡିକାଲ ଷ୍ଟାଫ ଏହାକୁ ତଣ୍ଟି ସଂକ୍ରମଣ ଭାବେ ଚିକିତ୍ସା କରୁଛନ୍ତି। କିନ୍ତୁ ଅଷ୍ଟ୍ରେଲିଆ ସରକାରଙ୍କ ନିର୍ଦ୍ଦେଶ ଅନୁଯାୟୀ, ଦଳର ଅନ୍ୟ ଖେଳାଳିଙ୍କଠାରୁ ରିଚାର୍ଡସନଙ୍କୁ ଦୂରେଇ ରଖାଯାଉଛି। ତାଙ୍କ ସ୍ବାବ ପରୀକ୍ଷା ରିପୋର୍ଟ ଆସିବା ପରେ ହିଁ ଅଧିକ ସୂଚନା ପ୍ରଦାନ କରାଯିବ ବୋଲି କ୍ରିକେଟ ଅଷ୍ଟ୍ରେଲିଆ ପ୍ରବକ୍ତା କହିଛନ୍ତି। ୨୯ ବର୍ଷୀୟ ପେସରଙ୍କ ସ୍ଥାନରେ ସିନ ଆବଟଙ୍କୁ ବଦଳ ଖେଳାଳି ଭାବେ ଚୟନ କରାଯାଇଛି।
