ଯାଜପୁର ଟାଉନ,୨୨।୧୧(ଡିଏନଏ): ଯାଜପୁର ଜିଲା ଧର୍ମଶାଳା ଅଞ୍ଜିରା ଗ୍ରାମର ଗ୍ରାମବାସୀ ଭାରପ୍ରାପ୍ତ ଜିଲାପାଳଙ୍କୁ ଗୁରୁବାର ଭେଟି ସ୍ଥାୟୀ ଜମିପଟ୍ଟା ଓ ଭୂମିହୀନଙ୍କୁ ଘରଢ଼ିହ ଦେବାକୁ ଦାବିପତ୍ର ପ୍ରଦାନ କରିଛନ୍ତି। ଅଞ୍ଜିରା ପଞ୍ଚାୟତର ୧୬ଟି ଗ୍ରାମର ଗ୍ରାମବାସୀ ୧୯୫୪ ମସିହାରୁ ଜମିଦାରୀ ଉଚ୍ଛେଦ ପରେ ଯେଉଁମାନଙ୍କୁ ହାତପଟ୍ଟା ଦିଆଯାଇଥିଲା ଓଡ଼ିଶା ସରକାର ତାହା ତହସିଲ ମାଧ୍ୟମରେ ଜମା ଧାର୍ଯ୍ୟ କରି ଆରଆଇଙ୍କ ଦ୍ୱାରା ରାଜସ୍ବ ଆଦୟ କରୁଥିଲେ। ସେହିମାନଙ୍କ ନାମରେ ଟିଏଲ ମଧ୍ୟ ପ୍ରସ୍ତୁତ କରାଯାଇଥିଲା। ସେବେଠାରୁ ଏହି ଜମି ମାଲିକମାନେ ନିଜ ଜମିକୁ ବିକ୍ରି, ବଦଳି, ବ୍ୟାଙ୍କରେ ବନ୍ଧକ ଆଦି କରିଆସୁଥିଲେ। ୧୯୮୪ ମସିହାରେ ରିଭିଜନ୍ ବନ୍ଦୋବସ୍ତ କାର୍ଯ୍ୟ ଆରମ୍ଭ କରାଯାଇଥିଲା। ବଳରାମପୁର ସର୍କଲରେ ୩୦/୪୦ଟି ମୌଜା କାର୍ଯ୍ୟ କରାଯାଉଥିବାବେଳେ ୧୯୯୭-୯୮ ମସିହା ମଧ୍ୟରେ ୫ଟି ମୌଜା ବ୍ୟତୀତ ଅନ୍ୟ ସମସ୍ତ ମୌଜା ବନ୍ଦୋବସ୍ତ କାର୍ଯ୍ୟ ସମାପ୍ତ ହୋଇ ସେମାନଙ୍କ ନାମରେ ରେକର୍ଡ କରାଯାଇଛି। ୨୦୧୩ରେ ଅଞ୍ଜିରା ସମେତ ୪ଟି ମୌଜା ପଟ୍ଟା ପ୍ରଦାନ କରାଯାଇଥିଲା ଯାହାକି ସମସ୍ତ ଅନାବାଦି ଖାତାରେ ରଖାଯାଇଥିଲା। ଫଳରେ ଏହି ମୌଜାବାସୀ ପଟ୍ଟା ପାଇବାକୁ ବଞ୍ଚତ୍ତ ହେଲେ। ବିଶେଷ କରି ଅଞ୍ଜିରା ପଞ୍ଚାୟତର ଶ୍ୟାମସୁନ୍ଦରପୁର, ଗୋଡିପାଟିଆ, ବାଉଁଶଡ଼ୋଳ , ମୁରାରୀପୁର, ଗମ୍ଭାରିଆ, ଗୁରୁସାହି, ବାଲିସାହି ସମେତ ୧୨ଟି ଗ୍ରାମର ଲୋକଙ୍କ ଜମି ପତିତ/ଅନାବାଦି ଖାତାଭୁକ୍ତ କରାଯାଇଛି। ଦଖଲ କରୁଥିବା ଲୋକଙ୍କ ପାଖରେ ଜମିଜମା ମାଲିକାନାର କୌଣସି କାଗଜ ନ ଥିବାରୁ ସେମାନେ ନିଜ ନାମରେ ଘରବାରୀରୁ ବଞ୍ଚତ୍ତ ହୋଇଛନ୍ତି। ଅଞ୍ଜିରା ମୌଜାର ହଜାର ହଜାର ଲୋକଙ୍କ ଜମି ତ୍ରୁଟିପୂର୍ଣ୍ଣ ବନ୍ଦୋବସ୍ତ ଯୋଗୁ ସରକାରୀ ଖାତାକୁ ଚାଲିଯାଇଛି ବୋଲି ଅଭିଯୋଗ କରାଯାଇ ପୁନଃ ବନ୍ଦୋବସ୍ତ କରାଯାଇ ଜମି ମାଲିକାନା, ଭୂମିହୀନଙ୍କୁ ପଟ୍ଟା ପ୍ରଦାନ ପାଇଁ ନିବେଦନ କରିଛନ୍ତି। ଏ ସମ୍ପର୍କରେ ମୁଖ୍ୟମନ୍ତ୍ରୀ, ରାଜସ୍ବମନ୍ତ୍ରୀ, ଆରଡିସିଙ୍କୁ ମଧ୍ୟ ଦାବିପତ୍ର ପ୍ରଦାନ କରାଯାଇଛି। ଅଞ୍ଜିରା ଗ୍ରାମପଞ୍ଚାୟତର ସରପଞ୍ଚ ଜ୍ୟୋର୍ତିମୟୀ ସେଠୀ, ଜିଲା ପରିଷଦ ସଭ୍ୟା ସୁରେଖା ନାୟକ, ଦେବକୀ ସ୍ବାଇଁ, ବାସନ୍ତି ଦଳାଇ ପ୍ରମୁଖ ଭାରପ୍ରାପ୍ତ ଜିଲାପାଳ ମିହିର ପ୍ରସାଦ ମହାନ୍ତିଙ୍କୁ ଭେଟି ଦାବିପତ୍ର ପ୍ରଦାନ କରିବା ସହ ତୁରନ୍ତ ଏ ଦିଗରେ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛନ୍ତି।
