ସ୍ତ୍ରୀଙ୍କୁ ନେଇଗଲେ ବାପଘର ଲୋକେ: ସ୍ବାମୀ ଥାନାର ଦ୍ୱାରସ୍ଥ
7:22 amJuly 13, 2019June 5, 2020 / 21

ଅନୁଗୋଳ ଅଫିସ, ୧୩।୭ – ଅନୁଗୋଳ ଜିଲା କଲିୟରୀ ଥାନା ଅଞ୍ଚଳର ରବି ବିଶ୍ୱାଳଙ୍କ ସ୍ତ୍ରୀଙ୍କୁ ବାପଘର ଲୋକେ ଜବରଦସ୍ତ ନେଇଯାଇଥିବା ରବି ଥାନାରେ ଅଭିଯୋଗ କରିଛନ୍ତି। ଏପରି କି ପୋଲିସ ତାଙ୍କ ଅଭିଯୋଗକୁ ଗୁରୁତ୍ୱ ଦେଉ ନ ଥିବା ରବି କହିଛନ୍ତି। ଅପରପକ୍ଷରେ ଥାନା ଅଧିକାରୀ ସବ୍ୟସାଚୀ ରାଉତ କହିଛନ୍ତି, ରବିଙ୍କ ଅଭିଯୋଗ ଉପରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଚାଲିଛି। ହେଲେ ରବି ଯେଉଁ ଯୁବତୀଙ୍କୁ ସ୍ତ୍ରୀ ବୋଲି ଦାବି କରୁଛନ୍ତି ସେ ତାଙ୍କର ପ୍ରେମିକା। ରବି ତାଙ୍କୁ ବିବାହ କରି ନ ଥିଲେ ମଧ୍ୟ ଏକାଠି ରହୁଥିଲେ। ସମ୍ପୃକ୍ତା ଯୁବତୀଙ୍କ ବାପା ତାଳଚେର ଥାନାରେ ପୂର୍ବରୁ ଏକ ଅପହରଣ ଅଭିଯୋଗ କରିଥିଲେ। ପୋଲିସ ଯୁବତୀଙ୍କ ସହ ଯୋଗାଯୋଗ କରିବା ପରେ ସେ ତାଙ୍କ ପ୍ରେମିକଙ୍କ ସହ ଥିବା ଜାଣିବାକୁ ପାଇଥିଲା। ତେବେ ରବି ଓ ତାଙ୍କ ପ୍ରେମିକାଙ୍କୁ ରେଜେଷ୍ଟ୍ରି ବିବାହ ପାଇଁ ପୋଲିସ ଡାକିଥିଲେ ମଧ୍ୟ ଦୁହେଁ ଆସି ନ ଥିଲେ। ରବି ପୂର୍ବରୁ ଦୁଇଟି ବିବାହ କରିଛନ୍ତି। ପ୍ରଥମ ସ୍ତ୍ରୀଙ୍କ କୌଣସି ସନ୍ତାନ ନ ଥିବାବେଳେ ଦ୍ୱିତୀୟ ସ୍ତ୍ରୀଙ୍କ ଗୋଟିଏ ୧୧ ବର୍ଷର ପୁତ୍ର ଅଛି। ଦୁଇ ସ୍ତ୍ରୀଙ୍କୁ ଛାଡ଼ପତ୍ର ଦେଇ ନ ଥିବା ରବି ସମ୍ପୃକ୍ତା ଯୁବତୀଙ୍କ ସହ ରହୁଥିଲେ। ରବି ଘରେ ନ ଥିବା ବେଳେ ଯୁବତୀଙ୍କୁ ବାପା ଓ ଭାଇ କବାଟ ଖୋଲିବାକୁ କହିଥିଲେ। ସେ କବାଟ ଖୋଲିବା ପରେ ତାଙ୍କୁ ଘରକୁ ନେଇଯାଇଛନ୍ତି। ତଥାପି ଏହି ଘଟଣାର ତଦନ୍ତ ଚାଲିଥିବା ଥାନା ଅଧିକାରୀ କହିଛନ୍ତି। କବାଟ କାଟି ଘରୁ ଅପହରଣ କରି ନେବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି ଥାନା ଅଧିକାରୀ କହିଛନ୍ତି।