ଜଗତ୍ସିଂହପୁର ଅଫିସ, ୭ା୮: ୨୦୧୪ ମସିହାରେ ଜଗତ୍ସିଂହପୁର ଜିଲା ରଘୁନାଥପୁର ଥାନା ଅନ୍ତର୍ଗତ ଗୋପାଳପୁର କୁମ୍ଭାର ସାହିର ସୁରେନ୍ଦ୍ର ବେହେରା (୫୫) ହତ୍ୟାକାଣ୍ଡ ମାମଲାର ରାୟ ପ୍ରକାଶ ପାଇଛି। ମାମଲାର ବିଚାର କରି ଜଗତ୍ସିଂହପୁର ଜିଲା ଜଜ୍ ଆନନ୍ଦ ଚନ୍ଦ୍ର ବେହେରା ଅଭିଯୁକ୍ତ ଖୋର୍ଦ୍ଧା ଜିଲା ବାଲିଅନ୍ତା ଥାନା ଅନ୍ତର୍ଗତ ନହରକଣ୍ଟା ହରିଦାଶପୁର ଶୁଣ୍ଢି ସାହିର ଅଜୟ ଖଟୁଆ ଓରଫ ମକରା (୨୦)ଙ୍କୁ ଆଜୀବନ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୫ ହଜାର ଟଙ୍କା ଜରିମନା ଧାର୍ଯ୍ୟ କରିଛନ୍ତି। ଏହି ରାଶି ମୃତ ସୁରେନ୍ଦ୍ରଙ୍କ ପୁଅଙ୍କୁ ଦିଆଯିବାକୁ ନିର୍ଦ୍ଦେଶ ରହିଛି। ଜରିମାନା ରାଶି ଅନାଦେୟ ହେଲେ ଅଭିଯୁକ୍ତ ମକରାଙ୍କୁ ଅଧିକ ୬ ମାସ ଜେଲ ଦଣ୍ଡ ଭୋଗିବାକୁ ପଡ଼ିବ ବୋଲି ରାୟରେ ଉଲ୍ଲେଖ ଥିବା ପିପି (ପବ୍ଲିକ ପ୍ରସିକ୍ୟୁଟର) ନଳିନୀକାନ୍ତ ମହାରଣା ସୂଚନା ଦେଇଛନ୍ତି।
ମହାରଣା କହିଛନ୍ତି, ୨୦୧୪ରେ ରଘୁନାଥପୁରରେ ଶ୍ରଦ୍ଧାଞ୍ଜଳି ବାର୍ ଚାଲିଥିଲା। ଏଥିରେ ମକରା ୱେଟର ହିସାବରେ କାମ କରୁଥିଲେ। ପାର୍ଶ୍ୱରେ ସୁରେନ୍ଦ୍ର ଏକ ଜଳଖିଆ ଦୋକାନ କରିଥିଲେ। ବାର୍ର ମାଲିକ ବିବେକାନନ୍ଦ ମହାପାତ୍ରଙ୍କ ଝିଅ ବାହାଘର ଥିବାରୁ ସେ ସୁରେନ୍ଦ୍ରଙ୍କୁ ମିଠା ତିଆରି ଦାୟିତ୍ୱ ଦେଇଥିଲେ। ୨୭ା୬ା୧୪ରେ ସୁରେନ୍ଦ୍ର ବାର୍ ଭିତରେ ମିଠା ତିଆରି କରୁଥିଲେ। ଏହି ସମୟରେ ସେ ପରିଶ୍ରା କରିବା ପାଇଁ ବାହାରକୁ ଯାଇ ଷ୍ଟୋର ରୁମ୍କୁ ଫେରିଲା ବେଳେ ପୂର୍ବ ପ୍ରସ୍ତୁତିରେ ଥିବା ମକରା ହଠାତ୍ ଏକ ଚାପଡ (ଚିକେନ୍ କଟାଯାଉଥିବା ଚାପଡ)ରେ ଆକ୍ରମଣ କରିଥିଲେ। ସେତେବେଳେ ସମୟ ପାଖାପାଖି ରାତି ୧୨ଟା୩୦ ହୋଇଥିଲା। ସୁରେନ୍ଦ୍ର ଜୀବନ ବିକଳରେ ବାହାରକୁ ଯାଇ ନିକଟରେ ଥିବା ନରେନ୍ଦ୍ରଙ୍କ ଦୋକାନ କବାଟ ବାଡେଇଥିଲେ। ସାହୁ ତାଙ୍କ ସ୍ତ୍ରୀଙ୍କ ସହ କବାଟ ଖୋଲି ସୁରେନ୍ଦ୍ରଙ୍କ ରକ୍ତ ଜୁଡୁବୁଡୁ ଅବସ୍ଥା ଦେଖି କିଏ ଏଭଳି କରିଛି ବୋଲି ବୁଝିଥିଲେ। ସେତେବେଳେ ଅଭିଯୁକ୍ତ ମକରା ଖସି ଯାଇଥିଲେ। ଏହାପରେ ସାହୁ ଗାଁ ଲୋକଙ୍କୁ ଡାକି ନିକଟସ୍ଥ ସ୍ବାସ୍ଥ୍ୟକେନ୍ଦ୍ରକୁ ନେବା ବ୍ୟବସ୍ଥା କରିଥିଲେ। ଅବସ୍ଥା ସଙ୍କଟାପନ୍ନ ଥିବାରୁ ସୁରେନ୍ଦ୍ରଙ୍କୁ କଟକ ବଡ ଡାକ୍ତରଖାନା ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କର ମୃତ୍ୟୁ ହୋଇଥିଲା। ୨୮ା୬ରେ ବାର୍ ପରିଚାଳକ ପ୍ରମୋଦ ସ୍ବାଇଁଙ୍କ ଅଭିଯୋଗକ୍ରମେ ରଘୁନାଥପୁର ପୋଲିସ ମାମଲା ସଂଖ୍ୟା-୬୮/୧୪ ରୁଜୁ କରି ତଦନ୍ତ କରିଥିଲା। ମୃତଦେହ ବ୍ୟବଚ୍ଛେଦ ସମୟରେ ସୁରେନ୍ଦ୍ରଙ୍କ ଶରୀରର ୧୨ଟି ସ୍ଥାନରେ କ୍ଷତ ଥିବା ଦେଖାଯାଇଥିଲା। ଏହି ମାମଲାରେ ୨୯ ଜଣ ସାକ୍ଷ୍ୟ ଓ ପ୍ରମାଣକୁ ଭିତ୍ତିକରି ବିଚାରପତି ଉପରୋକ୍ତ ରାୟ ଶୁଣାଇଛନ୍ତି।
